រាជធានីភ្នំពេញ ៖ គ្រាប់ស្វាយចន្ទីកម្ពុជា ស្ថិតក្នុងចំណោមគ្រាប់ធញ្ញជាតិល្អបំផុត នៅលើពិភពលោក ហើយចក្រភពអង់គ្លេសមានមោទនភាព ដែលបានគាំទ្រក្រុមហ៊ុន Ample Agro ចែករំលែករសជាតិដ៏អស្ចារ្យ…
រាជធានីភ្នំពេញ ៖ គ្រាប់ស្វាយចន្ទីកម្ពុជា ស្ថិតក្នុងចំណោមគ្រាប់ធញ្ញជាតិល្អបំផុត នៅលើពិភពលោក ហើយចក្រភពអង់គ្លេសមានមោទនភាព ដែលបានគាំទ្រក្រុមហ៊ុន Ample Agro ចែករំលែករសជាតិដ៏អស្ចារ្យ នៃគ្រាប់ស្វាយចន្ទីកម្ពុជា ទៅកាន់ពិភពលោក នេះបើយោងតាមហ្វេសប៊ុកផេកផ្លូវការរបស់ British Embassy in Cambodia នៅរសៀលថ្ងៃទី៤ ខែកញ្ញា ឆ្នាំ២០២៥ ។
ស្ថានទូតចក្រភពអង់គ្លេស ប្រចាំកម្ពុជា បានឲ្យដឹងបន្តថា ៖ «តាមរយៈកម្មវិធីភាពជាដៃគូពាណិជ្ជកម្មរបស់ចក្រភពអង់គ្លេស ដែលអនុវត្តន៏ដោយមជ្ឈមណ្ឌលពាណិជ្ជកម្មអន្តរជាតិ ចក្រភពអង់គ្លេសបានធ្វើការយ៉ាងជិតស្និទ្ធជាមួយអាជីវកម្មកសិឧស្សាហកម្ម ដើម្បីពង្រឹងម៉ាកយីហោ ទីផ្សារ និងយុទ្ធសាស្ត្រនាំចេញរបស់ពួកគេ។ ពីការចូលរួមក្នុងពិព័រណ៍ពាណិជ្ជកម្មអន្តរជាតិ ដល់ការភ្ជាប់ទំនាក់ទំនងជាមួយអ្នកទិញដែលមានសក្តានុពល និងប្រើប្រាស់គ្រោងការណ៍ពាណិជ្ជកម្ម នៃប្រទេសកំពុងអភិវឌ្ឍន៍របស់ចក្រភពអង់គ្លេស កិច្ចខិតខំប្រឹងប្រែងទាំងនេះ កំពុងទទួលបានផ្លែផ្ការួចហើយ ជាមួយនឹងការនាំចេញ ការបង្កើតការងារ និងការរីកលូតលាស់ នៃការទទួលស្គាល់ផលិតផលកសិកម្មឆ្នើមរបស់កម្ពុជា» ។
នៅព្រឹកថ្ងៃនេះ លោកឯកអគ្គរាជទូត Dominic Williams បានទៅទស្សនកិច្ចនៅក្រុមហ៊ុន Ample Agro ដើម្បីបញ្ជូនគ្រាប់ស្វាយចន្ទីកម្ពុជាគុណភាពខ្ពស់ទៅកាន់អឺរ៉ុប ដែលជាព្រឹត្តិការណ៍ដ៏សំខាន់មួយ ដែលអាចធ្វើទៅបានតាមរយៈការតភ្ជាប់ ដែលបង្កើតឡើងដោយកម្មវិធីដៃគូពាណិជ្ជកម្មរបស់ចក្រភពអង់គ្លេស។ ហើយចក្រភពអង់គ្លេសទន្ទឹងរង់ចាំឃើញផលិតផលកម្ពុជាជាច្រើនទៀត នៅលើធ្នើផ្សារទំនើបរបស់ចក្រភពអង់គ្លេសក្នុងពេលឆាប់ៗនេះ ហើយដើម្បីពង្រឹងទំនាក់ទំនងរវាងប្រទេសទាំងពីរ ឱ្យកាន់តែស៊ីជម្រៅតាមរយៈពាណិជ្ជកម្ម ការច្នៃប្រឌិត និងភាពជោគជ័យរួមគ្នា ៕
ចែករំលែកព័តមាននេះ