កំណើនពីមួយថ្ងៃទៅមួយថ្ងៃនៃការឃាត់ខ្លួនជនល្មើសទាក់ទងនឹងបទល្មើសគ្រឿងញៀនអាចនឹងធ្វើឲ្យបណ្តាពន្ធនាគារនៅក្នុងប្រទេសពិបាកនិងរងបន្ទុលធ្ងន់ទៅៗ ពីព្រោះបទល្មើសនេះនៅតែច្រើនហើយមានជនសង្ស័យនិងជនដែលត្រូវកាត់ទោសមួយថ្ងៃៗមានរាប់សិបនាក់ ។ ជាក់ស្តែងនៅក្នុងរយៈពេលតែ២ថ្ងៃនៃដើមខែកញ្ញា ឆ្នាំ២០២៥នេះ សមត្ថកិច្ចបានបង្ក្រាបគ្រឿងញៀន នេះរហូតដល់ទៅ ៧៨ករណី ដោយឃាត់ខ្លួនជនសង្ស័យសរុបប្រមាណជា៣០០នាក់ឯណោះ ។
តាមសេចក្តីរាយការណ៌របស់សមត្ថកិច្ចបានឲ្យដឹងថា នៅថ្ងៃទី១ នៃខែកញ្ញា សមត្ថកិច្ចបានបង្ក្រាប ៥៨ ករណី ដោយឃាត់ខ្លួនជនសង្ស័យសរុប ២៣៧ នាក់ មានទាំងអ្នកជួញដូរ និង អ្នកដែលប្រើប្រាស់ ហើយមួយថ្ងៃក្រោយមក គឺបង្ក្រាបបាន២០ ករណី ដោយឃាត់ខ្លួនជនសង្ស័យបាន ៦៧ នាក់បន្ថែមទៀត ។
នេះគឺជាស្ថិតិដែលសមត្ថកិច្ចបង្ក្រាបនៅ២ថ្ងៃនៃដើមខែកញ្ញា។ ប៉ុន្តែបើយោងតាមរបាយការណ៍៨ខែរបស់នាយកដ្ឋានជំនាញពោលគឺ នាយកដ្ឋានប្រឆាំងគ្រឿងញៀន បានឲ្យដឹងថា កម្ពុជាបានឃាត់ខ្លួនជនសង្ស័យពីបទពាក់ព័ន្ធនឹងគ្រឿងញៀនចំនួនដល់ទៅ ជាង១ម៉ឺន៧ពាន់នាក់ ជាមួយគ្រឿងញៀនសរុបចំនួន ៧,៧៦តោន ។
របាយការណ៍បានអះអាងថា អាជ្ញាធរមានសមត្ថកិច្ចកម្ពុជាបានឃាត់ខ្លួនជនសង្ស័យពាក់ព័ន្ធគ្រឿងញៀននៅក្នុងចំនួនសរុបគឺ១៧.៤៨០ ។ តួរលេខនេះឃើញថា មានការធ្លាក់ចុះ បន្តិច គឺ ០,៥ ភាគរយ បើធៀបនឹងចំនួន ជនសង្ស័យសរុប ប្រមាណជា ១៧.៥៧៤ នាក់ ដែលសមត្ថកិច្ចចាត់ វិធានការណ៍នៅគ្នុងរយៈពេល៨ខែ ឆ្នាំ២០២៤កន្លងទៅ ។ របាយការណ៍បានបន្តថា ក្នុងចំណោមជនសង្ស័យទាំងនោះ សមត្ថកិច្ចបានកំណត់អត្តសញ្ញាណថាមានជនបរទេសចំនួន ៦៩៨ នាក់មាន ២០ សញ្ជាតិ។
ប្រភពដដែលបានបន្តថា ចំនួនជនសង្ស័យដែលពាក់ព័ន្ធនឹងគ្រឿងញៀនគឺមានការថយចុះបន្តិច ប៉ុន្តែ បើនិយាយអំពីចំនួនគ្រឿងញៀនដែលរឹបអូសវិញគឺនៅតែកើនឡើង ដោយនៅរយៈពេលនេះ អាជ្ញាធររឹបអូសបាន៧,៧៦ តោន ហើយកាលពី៨ខែឆ្នាំ២០២៤ គឺរឹបអូសបានត្រឹមតែ ៥,៧៥ តោន។ គ្រឿងញៀនដែលរឹបអូសបានភាគច្រើនរួមមាន ខេតាមីន អេកស្តាស៊ី ហេរ៉ូអ៊ីន មេតំហ្វេតាមីន គ្រីស្តាល់ ថ្នាំមេតំហ្វេតាមីន កូកាអ៊ីន និងកាធីណូន (cathinone) ឫ គេហៅថា កេតំហ្វេតាមីន (ketoamphetamine) ដែលជាប្រភេទគ្រឿងញៀនសំយោគ ។
តើគ្រឿងញៀនទាំងនេះផ្តល់ផលប៉ះពាល់យ៉ាងណាដល់ប្រជាពលរដ្ឋកម្ពុជា ?
តាមឯកសារនៃការស្រាវជ្រាវបានឲ្យដឹងថា សម្រាប់គ្រឿងញៀនដូចជា ខេតាមីន នៅពេលដែលប្រើ ប្រាស់វា គឺវាប៉ះពាល់ដល់ចិត្តនិងការគ្រប់គ្រងអារម្មណ៍ នាំឲ្យយើងបាត់បង់ការគ្រប់គ្រងខ្លួន អាចបណ្តាលឲ្យឆ្កួត ឫធ្លាក់ទឹកចិត្ត ។ ចំពោះ អេកស្តាស៊ី វាជាគ្រឿងញៀនធ្វើឲ្យមនុស្សសប្បាយ ចិត្ត និង លើកកម្លាំង ប៉ុន្តែកុំភ្លេចថា វាធ្វើឲ្យមនុស្សកើនសម្ពាធឈាម ប៉ះពាល់ដល់ខួរក្បាល បង្កភាពច្របូកច្របល់នៅក្នុងអារម្មណ៍ ហើយអាចបណ្តាលឲ្យស្លាប់ភ្លាមៗបើប្រើប្រាស់លើសកម្រិត ។
សម្រាប់ប្រភេទ ហេរ៉ូអ៊ីនវិញ ត្រូវបានគេដឹងថា គឺជាគ្រឿងញៀនខ្លាំង ហើយអ្នកដែលប្រើប្រាស់វា គឺអ្នកដែល ដល់កម្រិតដោយសារតែវាថ្លៃ ។ វាគឺជាគ្រឿងញៀន ដែលធ្វើឲ្យមនុស្សអាចបន្ថយចលនាដកដង្ហើម ហើយអាចឲ្យមនុស្សស្លាប់បាន ក្រៅពីនោះវាប៉ះពាល់ដល់សរសៃឈាម បេះដូង និងថ្លើម ។ ចំពោះមេតាហ្វេតាមីនឫគ្រីស្តាល់ គឺជាប្រភេទគ្រឿងញៀនលើកកម្លាំងដែរហើយ មិនធ្វើឲ្យមនុស្សងងុយគេង និយាយច្រើន ។
វាអាចប៉ះពាល់ ដល់សរសៃប្រាសាទ បាត់បង់ចំណង់អាហារ ធ្វើឲ្យខូចស្បែកនិងធ្មេញ ។ កូកាអ៊ីនវិញជាប្រភេទគ្រឿងញៀន ដែលគេនិយមហឺតតាមច្រមុះ ហើយពេលប្រើប្រាស់វា គឺបង្កើនសម្ពាធឈាម ដែលអាចឲ្យគាំងបេះដូង ឫ ដាច់សរសៃឈាម មានអារម្មណ៍ច្របូកច្របល់ ។ ចំពោះសារ ធាតុគ្រឿងញៀនចុងក្រោយ គឺកាធីណូន ឫ កេតំហ្វេតាមីន នេះ ជាពពួកគ្រឿងញៀន ដែលគេប្រើដើម្បីបង្កើនកម្លាំង ហើយអ្នកដែលប្រើប្រាស់ច្រើនក្លាហាន នាំឲ្យងាយកើតអំពើហិង្សា ។
ពពួកគ្រឿងញៀនទាំងនេះ មិនមែនជាឱសថឡើយ ប៉ុន្តែវាគឺជាសារធាតុដែលធ្វើឲ្យមនុស្ស ជាពិសេសគឺអ្នកដែលប្រើប្រាស់ពួកវាមានគ្រោះថ្នាក់ ដោយសារតែវាប៉ះពាល់ដល់សុខភាពរាងកាយ ពោលគឺតាំងពីបេះដូង សួត ថ្លើម តម្រង់នោម សូម្បីតែសរសៃប្រសាទ ។ អ្នកដែលប្រើប្រាស់ទោះតាមវិធីណាក៏ដោយ គឺវាតែងតែប៉ះពាល់ផ្លូវចិត្ត ពិបាកនៅក្នុងការបោះបង់ ហើយជាប្រភពគ្រោះថ្នាក់សង្គមជាច្រើនករណីថែមទៀត ។
សរុបទៅគ្រឿងញៀនគឺគ្រោះថ្នាក់ ហើយអ្នកដែលជួញដូរវិញ ទោះបីជាកម្ពុជាគ្មានទោសប្រហារជីវិត ក៏ពិតមែន ប៉ុន្តែតាមច្បាប់ អ្នកដែលរកឃើញពិរុទ្ធភាពពីការជួញដូរថ្នាំញៀនខុសច្បាប់លើសពី ៨០ ក្រាម អាចនឹងត្រូវជាប់ពន្ធនាគារអស់មួយជីវិត។ ដូច្នេះ សូមនៅឲ្យឆ្ងាយពីគ្រឿងញៀនទាំងនេះ៕
ចែករំលែកព័តមាននេះ