ទីក្រុងបាងកក៖ គណបក្សភឿថៃនៅដំណាក់កាលចុងក្រោយនេះចាប់ផ្ដើមបោះដៃទៅរកសម្ព័ន្ធមិត្តចាស់របស់ខ្លួនសាជាថ្មីបន្ទាប់ពីមានព្រឹត្តិការណ៍សំខាន់២កើតឡើង ទី១-ភឿថៃដឹងច្បាស់ថាសំណើដែលនាយករដ្ឋមន្ត្រីចាំផ្ទះ លោកភូមិថាម ដាក់ថ្វាយព្រះមហាក្សត្រដើម្បីរំលាយសភាត្រូវក្រុមប្រឹក្សាព្រះរាជបល្ល័ង្គច្រានចោល និងទី២-រដ្ឋសភាត្រៀមកោះប្រជុំនៅថ្ងៃស្អែកដើម្បីបោះឆ្នោតផ្ដល់សេចក្ដីទុកចិត្តជូនលោកអនុទីនជានាយករដ្ឋមន្ត្រីទី៣២របស់ប្រទេសថៃ។
ថ្ងៃនេះ គណបក្សភឿថៃចាប់ផ្ដើមអន្ទងចិត្តគណបក្សប្រជាជនដើម្បីឱ្យបែកបែរចិត្តពីគណបក្សភូមិចៃថៃ ហើយងាកមកគាំទ្រភឿថៃវិញម្ដង។ ភឿថៃថ្លែងថាបើសិនគណបក្សប្រជាជនយល់ព្រមបោះឆ្នោតគាំទ្រលោកឆៃកាសេមជានាយករដ្ឋមន្ត្រី អនាគតរដ្ឋាភិបាលដែលដឹកនាំដោយភឿថៃសន្យាថានឹងរំលាយសភាចោលភ្លាមៗតែម្ដង។ ពោលគឺមិនចាំបាច់រង់ចាំយូរដល់បួនខែដូចការសន្យារបស់លោកអនុទីនទេ។
ភឿថៃសន្យាថានឹងរំលាយចោលក្រោយពេលខ្លួនឡើងប្រកាសកម្មវិធីនយោបាយនៅក្នុងរដ្ឋសភារួច។ នេះបើយោងតាមការបញ្ជាក់របស់លោកសារ៉ាវង្ស ធានថង (Sorawong Thienthong) ជាអគ្គលេខាធិការគណបក្ស។ ភឿថៃនិយាយយ៉ាងទទូចនៅព្រឹកនេះថាខ្លួននៅតែមានសិទ្ធិតែងតាំងលោកឆៃកាសេមទៅសភាដើម្បីបោះឆ្នោតផ្ដល់សេចក្ដីទុកចិត្តពីសភានៅថ្ងៃស្អែក។ ភឿថៃថាលោកឆៃកាសេមនឹងមិនធ្វើសេចក្ដីថ្លែងការណ៍ជាសាធារណៈនៅក្នុងរដ្ឋសភាទេព្រោះគាត់មិនមែនជាអ្នកតំណាងរាស្ត្រ។
ក្រឡេកទៅមើលគណបក្សភូមិចៃថៃ និងប្រធានគណបក្សនេះគឺលោកអនុទីនវិញម្ដង នៅពេលនេះលោកគ្មានអ្វីដែលត្រូវខ្វល់ខ្វាយតទៅទៀតទេព្រោះគណបក្សរបស់លោកបានចុះអឹមអូយូ (MOU) ជាមួយគណបក្សប្រជាជនកាលពីម្សិលមិញ រួចហើយ ហើយត្រៀមធ្វើជានាយករដ្ឋមន្ត្រីថ្មី។ ដូច្នេះនៅក្នុងរដ្ឋសភាកាលពីព្រឹកមិញ គេឃើញថាលោកអង្គុយញញឹមបិទមាត់មិនជិតទេ។
ថ្វីដ្បិតចុះអឹមអូយូជាមួយគ្នារួចហើយមែន ប៉ុន្តែគណបក្សប្រជាជននៅដំណាក់កាលចុងក្រោយនេះចាប់ផ្ដើមអល់អែកមិនដឹងថាតើត្រូវយកមួយណាចោលមួយណា។ ហេតុនេះ ប្រធានគណបក្សប្រជាជន លោកណាត់ថាផុង រឿងផាន់យ៉ាវុទ្ធ (Natthapong Ruengpanyawut) បានអំពាវនាវឱ្យភឿថៃបញ្ជាក់ឱ្យបានច្បាស់ជាងនេះថាតើខ្លួនពិតជាចង់រំលាយសភាមែនឬយ៉ាងណាព្រោះភឿថៃបានដាក់សំណើលើកទីមួយឃើញថាបរាជ័យបាត់ទៅហើយ។ មូលហេតុដែលគណបក្សប្រជាជនចង់ដឹងរឿងនេះយ៉ាងអន្ទះសាព្រោះការរំលាយសភាដើម្បីបោះឆ្នោតឡើងវិញគឺជាគោលដៅធំបំផុតរបស់ខ្លួន។
លោកណាត់ថាផុងក៏បានស្នើសុំឱ្យគណបក្សនយោបាយចំនួន២ដែលចង់ប្ដឹងលោកលោកភូមិថាមទៅតុលាការពីបទប្រមាថព្រះមហាក្សត្រសូមបោះបង់គំនិតនេះចោលទៅ។ គណបក្សប្រជាជនក៏សូមការយោគយល់អធ្យាស្រ័យពីមនុស្សគ្រប់គ្នាដែលខ្លួនត្រៀមបោះឆ្នោតគាំទ្រលោកអនុទីនជានាយករដ្ឋមន្ត្រីថ្មី។ អនុប្រធានគណបក្សប្រជាជនចាត់ទុកថានេះជាការសម្រេចចិត្តដ៏ពិបាកមួយ។ មែនទែនទៅ លោកថាគណបក្សរបស់លោកមិនចង់បោះឆ្នោតឱ្យបេក្ខជនរូបណាទេ។ ប៉ុន្តែស្ថានការណ៍ប្រទេសជាតិតម្រូវឱ្យធ្វើអ្វីម៉្យាងដើម្បីបន្តដំណើរទៅមុខទៀត។ ខាងលើនេះជាការដកស្រង់ប្រភពពីខាវសត់ (Khaosod) និងប្រភពដទៃទៀត៕
ចែករំលែកព័តមាននេះ