ដោយសារតែលំហូរពលរដ្ឋបន្តវេចលុយទៅស្វែងរកសេវាវេជ្ជសាស្ត្រនៅក្រៅប្រទេសនៅតែបន្តមានជាហូរហែរជាបន្តបន្ទាប់ ទោះបីជាមន្ទីរពេទ្យនានានៅក្នុងប្រទេសខិតខំធ្វើទំនើបកម្មនិងបំពាក់ឧបករណ៍និងសម្ភារៈបច្ចេកទេសដែលទាន់សម័យនានានោះ ក្រសួងសុខាភិបាលបានចាប់ផ្តើមពិនិត្យកិច្ចការនេះ ហើយក៏ បានដាក់ចេញយុទ្ធសាស្ត្រខ្លះហើយ។ សូមរង់ចាំតាមដានស្ថានភាពទៅថ្ងៃមុខទាំងអស់គ្នា ។
តាមការប្រកាសរបស់ក្រសួងបានឲ្យដឹងថា កាលពីថ្ងៃទី២ ខែកញ្ញា ឆ្នាំ២០២៥ លោក ឈាង រ៉ា រដ្ឋមន្ត្រីក្រសួងសុខាភិបាល បានដឹកនាំកិច្ចប្រជុំមួយសំដៅពិភាក្សាអំពីបញ្ហានេះ ដោយមានការចូលរួមដោយមន្ត្រីនិងថ្នាក់ដឹកនាំជំនាញៗជាច្រើនរូប ។
នៅក្នុងកិច្ចប្រជុំនោះ គោលបំណងសំខាន់ គឺបំផុសគំនិត ដើម្បីរៀបចំយុទ្ធសាស្ត្រក្នុងការរក្សានិងលើកទឹកចិត្តឱ្យអ្នកជំងឺប្រើប្រាស់សេវាសុខាភិបាលក្នុងប្រទេស ជំនួសឲ្យការវេចលុយទៅស្វែងរក សេវាវេជ្ជសាស្ត្រនៅក្រៅប្រទេស ជាពិសេសក្នុងស្ថានភាពដែលរងការប៉ះពាល់ដោយជម្លោះព្រំដែនកម្ពុជា-ថៃ ដែលបង្កឱ្យមានការរាំងស្ទះក្នុងការទទួលសេវាថែទាំ និងព្យាបាលសម្រាប់អ្នកជំងឺដែលធ្លាប់ទៅប្រើប្រាស់សេវាសុខាភិបាលនៅក្រៅប្រទេស។
នៅក្នុងកិច្ចប្រជុំនោះ លោករដ្ឋមន្ត្រី បានបញ្ជាក់ពីសារៈសំខាន់នៃកិច្ចប្រជុំបំផុសគំនិត ដើម្បីប្រមូលមតិយោបល់ និងស្វែងរកដំណោះស្រាយក្នុងការលើកទឹកចិត្តឱ្យអ្នកជំងឺប្រើប្រាស់សេវាក្នុងប្រទេស តាមរយៈការបំផុសគំនិត និងការមូលមតិជារួមពីសមាជិកអង្គប្រជុំ ។
នាឱកាសនោះ លោករដ្ឋមន្ត្រីបានរំលេចនូវកត្តាសំខាន់ៗមួយចំនួនដើម្បីពង្រឹងការប្រើប្រាស់សេ
វាក្នុងប្រទេស៖ ១-ការលើកកម្ពស់គុណភាព និងសុវត្ថិភាពនៃសេវាថែទាំតាមរយៈប្រព័ន្ធទទួលស្គាល់គុណភាពរបស់ក្រសួងសុខាភិបាល (Accreditation), ២-ពង្រឹងធនធាន និងសមត្ថភាពផ្នែកសេវាឯកទេស, ៣-រៀបចំហេដ្ឋារចនាសម្ព័ន្ធ និងពង្រឹងបដិសណ្ឋារកិច្ចក្នុងមូលដ្ឋានសុខាភិបាល, ៤-ផ្តល់ការថែទាំដែលផ្តោតលើអ្នកជំងឺជាចម្បង (patient-centered care), ៥-បង្កើនលទ្ធភាពក្នុងការទទួលសេវាថែទាំ។
យោងតាមអ្វីដែលរដ្ឋមន្ត្រីសុខាភិបាលបានបង្ហាញ គោលនយោបាយថ្មីៗរបស់ក្រសួងដើម្បីផ្តោតលើការលើកកម្ពស់គុណភាព និងសុវត្ថិភាពនៃសេវាសុខាភិបាលក្នុងប្រទេស ដោយមានយុទ្ធសាស្ត្រចម្បងចំនួន៥ នៅពេលនេះ វាគឺជាដំណាក់កាលចាប់ផ្តើម ហើយដើម្បីឲ្យវាទៅមុខអ្នកដែលពាក់ព័ន្ធចាំបាច់ត្រូវតែអំណត់ ហើយខិតខំបំពេញវាជាជំហានៗប្រកបដោយការទទួលខុសត្រូវ ។
អ្នកវិភាគបានឲ្យដឹងថា សម្រាប់គោលបំណងកំណត់ឲ្យមានប្រព័ន្ធទទួលស្គាល់គុណភាព(Accreditation) វាគឺជាទស្សនៈវិស័យចាំបាច់មួយ ។ នៅពេលដែលកម្ពុជាមានការបញ្ជាក់ស្តង់ដារបម្រើសេវាថែទាំច្បាស់លាសវាអាចជួយកាត់បន្ថយការសង្ស័យរបស់អ្នកជំងឺ ហើយចំណុចនេះប្រសិនបើមានការអនុវត្តពិតប្រាកដ វានឹងបង្កើនទំនុកចិត្តដល់ប្រជាពលរដ្ឋ។
ដោយឡែកលើគោលដៅធ្វើការពង្រឹងធនធាន និងសមត្ថភាពសេវាឯកទេស គឺចាំបាច់បំផុត ពីព្រោះទោះបីជាមន្ទីរពេទ្យយើងមានឧបករណ៍បច្ចេកទេសវេជ្ជសាស្ត្រទំនើបប៉ុណ្ណាក៏ដោយ ប្រសិនបើក្រុមគ្រូពេទ្យខ្វះសមត្ថភាព វាពិតជាពិបាកធ្វើឲ្យប្រជាពលរដ្ឋមានទំនុកចិត្តណាស់ ។ នៅពេលនេះ ប្រជាពលរដ្ឋភាគច្រើនទៅក្រៅប្រទេស ដោយសារកង្វះជំនឿលើផ្នែកឯកទេសឬបច្ចេកវិទ្យាពិសេសៗ សម្រាប់ព្យាបាលពួកគេ ដូចនេះប្រសិនបើក្រសួងអាចបំពេញចន្លោះនេះបាន នោះលំហូរអ្នកជំងឺទៅក្រៅប្រទេសនឹងថយចុះ។
លើផ្នែកហេដ្ឋារចនាសម្ព័ន្ធនិងបដិសណ្ឋារកិច្ចនិងផ្តល់ការថែទាំដែលផ្តោតលើអ្នកជំងឺជាចម្បង ក៏ដូចជា ការបង្កើនលទ្ធភាពក្នុងការទទួលសេវាថែទាំ ចំណុចបីនេះប្រជាពលរដ្ឋទទួលស្គាល់ថា មន្ទីរពេទ្យនៅកម្ពុជាមួយចំនួនបានទទួលស្គាល់លើការកែប្រែ ប៉ុន្តែស្ថាប័នមន្ទីរពេទ្យខ្លះនៅតែខ្វះខាត ហើយហាក់មានសភាពរញ៉េរញ៉ៃគ្មានសណ្តាប់ធ្នាប់ ពោលគឺបង្កើតបរិយាកាសនិងស្ថានភាពមិនសូវល្អសម្រាប់អ្នកជំងឺ។ នៅក្នុងករណីដែល ក្រសួងអនុវត្តការកែលម្អបានហើយនោះ វាពិតជាអាចជួយទាក់ទាញអ្នកជំងឺឲ្យនៅក្នុងប្រទេសមួយកម្រិតទៀត៕
ចែករំលែកព័តមាននេះ