រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចកាច់កម៉ូតូម៉ាកហុងដាឌ្រីមសេ១២៥ ពណ៌ខ្មៅ ស្លាកលេខភ្នំពេញ១F-៥២៤៥មួយគ្រឿង តែមិនបានសម្រេចត្រូវម្ចាស់គេទាន់ស្រែកឆោឡោ ធ្វើឱ្យភ័យស្លន់ស្លោរត់គេចខ្លួនលោតចុះទៅក្នុងបឹងកំប្លោក ហើយត្រូវប្រជាពលរដ្ឋ រួមទាំងនគរបាលខណ្ឌឫស្សីកែវ នាំគ្នាធ្វើការព័ទ្ធចាប់រុករកអស់រយៈពេល១ម៉ោង តែត្រូវជនសង្ស័យគេចខ្លួនបាត់ស្រមោល ។
ហេតុការណ៍នេះធ្វើឱ្យមានការភ្ញាក់ផ្អើលកាលពីវេលាម៉ោង៥ល្ងាចថ្ងៃទី១១ កុម្ភៈ ២០១៤ ស្ថិតនៅក្នុងភូមិបឹងសាឡាង សង្កាត់ប្ញស្សីកែវ ខណ្ឌប្ញស្សីកែវ ។
តាមប្រភពពីម្ចាស់ម៉ូតូឈ្មោះហុង សំណាង ភេទប្រុស អាយុ៣៧ឆ្នាំ ជាមន្រ្តីយោធា មានទីលំនៅផ្ទះជួលនៅកន្លែងកើតហេតុបានឱ្យដឹងថា នៅមុនពេលកើតហេតុ រូបគាត់ធ្វើដំណើរមកពីធ្វើការដោយចតម៉ូតូទុកមុខផ្ទះ រួចចូលទៅសម្រាក ។ ខណៈនោះស្រាប់តែមានជនសង្ស័យចំនួន៣នាក់ ជិះម៉ូតូម៉ាកនិច ពណ៌ត្រួយចេកមួយគ្រឿង មកឈប់ក្បែរនោះ ហើយជនម្នាក់ធ្វើសកម្មភាពកាច់កម៉ូតូរបស់គាត់បានសម្រេច បម្រុងបណ្តើរចេញ តែត្រូវប្រពន្ធរបស់គាត់កំពុងតែលក់ដូរឃើញទាន់ ក៏ស្រែកចោរៗ និងបានទាញកាំបិតគំរាម ។
ភ្លាមនោះគាត់បានរត់ចេញពីក្នុងផ្ទះដេញជនសង្ស័យម្នាក់ភ័យស្លន់ស្លោររត់ឡើងជិះម៉ូតូបក្សពួកមិនទាន់ បានរត់ចូលតាមផ្លូវលំទៅក្រោយផ្ទះអ្នកភូមិ និងបានលោតចុះទៅក្នុងបំប្លោកបាត់ស្រមោលតែម្តង ។
ចែករំលែកព័តមាននេះ