ខេត្តពោធិ៍សាត់ ៖ សមត្ថកិច្ចបានធ្វើការឃាត់ខ្លួនជនជាតិវៀតណាមចំនួន០៣នាក់ ខណៈពេលកំពុងលួចធ្វើនេសាទក្នុងឡូត៍អភិរក្ស កាលពីថ្ងៃទី១១ កុម្ភៈ ២០១៤ នៅចំណុចភូមិកំពង់ប្រាក់ ឃុំកំពង់លួង ស្រុកក្រគរ ។
ខេត្តពោធិ៍សាត់ ៖ សមត្ថកិច្ចបានធ្វើការឃាត់ខ្លួនជនជាតិវៀតណាមចំនួន០៣នាក់ ខណៈពេលកំពុងលួចធ្វើនេសាទក្នុងឡូត៍អភិរក្ស កាលពីថ្ងៃទី១១ កុម្ភៈ ២០១៤ នៅចំណុចភូមិកំពង់ប្រាក់ ឃុំកំពង់លួង ស្រុកក្រគរ ។
លោក ច្រឹង តាំងលី ប្រធានផ្នែករដ្ឋបាលជលផលកំពង់លួងឲ្យដឹងថា ជនជាតិវៀតណាមដែលឃាត់ខ្លួន ទី១-ឈ្មោះង្វៀង យ៉ាំងណាម ភេទប្រុស អាយុ២៤ឆ្នាំ , ទី២-ឈ្មោះង្វៀង យ៉ាំងបាន់ ភេទប្រុស អាយុ២១ឆ្នាំ និងទី៣-ឈ្មោះច្រឹង យ៉ាំងឃើយ ភេទប្រុស អាយុ២៤ឆ្នាំ ទាំង០៣នាក់រស់នៅភូមិទី៥ ឃុំកំពង់លួង ស្រុកក្រគរ ។
ពាក់ព័ន្ធនឹងការឃាត់ខ្លួនជនសង្ស័យទាំង០៣នាក់នេះលោកបានរៀបរាប់ថា កាលពីថ្ងៃទី១១ កុម្ភៈ២០១៤ កម្លាំងយើងមានផ្នែកនិងសង្កាត់រដ្ឋបាលជលផល សហការជាមួយនគរបាលនិងអាវុធហត្ថចុះល្បាតតាមដងព្រៃរនាមបឹងទន្លេសាប ហើយប្រទះឃើញជនសង្ស័យទាំង០៣នាក់ខាងលើកំពុងលួចនេសាទនៅចំណុចកំពង់ប្រាក់ជាតំបន់ជំរកត្រីមេពូជដែលយើងថែរក្សាការពារជាយូរមកហើយ ក៏ធ្វើការឃាត់ខ្លួនតែម្ដង ។ វត្ថុតាងដែលរឹបអូសបានមានកាណូតស្មាច់ចំនួន០២គ្រឿងអមដោយម៉ាស៊ីន ឧបករណ៍នេសាទមងក្រឡុកចំនួន០២គ្រឿង ប្រវែង៤៨០ម៉ែត្រនិងត្រីកែសចំនួន១៥គីឡូក្រាម ។
លោកភុំ វិមល នាយខណ្ឌរដ្ឋបាលជលផលពោធិ៍សាត់មានប្រសាសន៍ថា ការបង្ក្រាបបទល្មើសនេសាទនៅកន្លែងអភិរក្សជលផលបានត្រូវរឹតបន្តឹងយ៉ាងខ្លាំង ព្រោះជាកន្លែងថែរក្សាពូជត្រីហើយមន្ត្រីជលផលយើងក៏បានផ្សព្វផ្សាយដល់ប្រជានេសាទទូទៅរួចមកហើយដែរ។ កន្លងមកសមត្ថកិច្ចយើងបានធ្វើការឃាត់ខ្លួនជនសង្ស័យជាច្រើនដែលធ្វើនេសាទក្នុងដែនអភិរក្ស ទាំងប្រើប្រដាប់ឆក់ និងឧបករណ៍នេសាទល្មើសច្បាប់ផ្សេងៗទៀត ដែលខ្លះគ្រាន់តែធ្វើការអប់រំ និងខ្លះបញ្ជូនទៅតុលាការដាក់ពន្ធនាគារ ប៉ុន្តែពួកគេនៅតែមិនរាងចាល ។
លោកបានអំពាវនាវសូមឲ្យប្រជាពលរដ្ឋទាំងអស់បញ្ឈប់ការប្រើប្រដាប់ឆក់ ឧបករណ៍នេសាទល្មើសច្បាប់នានា លួចនេសាទក្នុងតំបន់ហាមឃាត់ ការដុតឫកាប់បំផ្លាញព្រៃលិចទឹកដែលជាជំរកត្រីពងកូន និងការបូមឫបាចបឹងព្រែកអូរជាដើម ដែលទង្វើទាំងអស់នេះវាធ្វើឲ្យហិនហោចមច្ឆាជាតិនិងជីវចម្រុះគ្រប់ប្រភេទ ៕
ចែករំលែកព័តមាននេះ