ខេត្តបន្ទាយមានជ័យ ៖ ក្រុមអ្នករកស៊ីទិញលក់ទោចក្រយានយន្តនាំចូលពីក្រៅប្រទេសបានសម្តែងនូវការងឿងឆ្ងល់ពីការបង់ពន្ធម៉ូតូមានតម្លៃខុសគ្នាដូចមេឃនិងដីរវាងខេត្តបន្ទាយមានជ័យ និងខេត្តព្រះសីហនុ ។
ខេត្តបន្ទាយមានជ័យ ៖ ក្រុមអ្នករកស៊ីទិញលក់ទោចក្រយានយន្តនាំចូលពីក្រៅប្រទេសបានសម្តែងនូវការងឿងឆ្ងល់ពីការបង់ពន្ធម៉ូតូមានតម្លៃខុសគ្នាដូចមេឃនិងដីរវាងខេត្តបន្ទាយមានជ័យ និងខេត្តព្រះសីហនុ ។
តាមប្រភពព័ត៌មានបានឱ្យដឹងថា ការងឿងឆ្ងល់នេះបានកើតទ្បើង បន្ទាប់ពីក្រុមអ្នករកស៊ីទិញលក់ទោចក្រយានយន្តនៅខេត្តបន្ទាយមានជ័យប្រទះឃើញឯកសារមួយជាបង្កាន់ដៃបង់ពន្ធទោចក្រយានយន្តរបស់ការិយាល័យគយនិងរដ្ឋាករកែវផុស ខេត្តព្រះសីហនុ មានជាអាទិ៍៖ ប្រភេទម៉ូតូចាប់ពីកម្លាំង១១០CC រហូតដល់១២៥CC ដូចជា ស្គូពី និងអឹមអេសអិុច ក្នុងមួយគ្រឿង បង់ពន្ធតម្លៃ៩៣៨៦០០រៀល(៩សែន៣ម៉ឺន៨ពាន់ប្រាំមួយរយ)តែប៉ុណ្ណោះ ។ ម៉ូតូប្រភេទ ភីស៊ីអិុច កម្លាំង១៥០CCមួយគ្រឿង បង់ពន្ធតម្លៃត្រឹមតែ១ ៤០៧ ៨០០រៀល(១លាន៤សែនសូន្យម៉ឺនប្រាំពីរពាន់ប្រាំបីរយ) ។
ចំណែកការបង់ពន្ធទោចក្រយានយន្តនាំចូលពីក្រៅប្រទេសនៅខេត្តបន្ទាយមានជ័យវិញ ប្រភេទម៉ូតូកម្លាំង១១០CC ដល់១២៥CC ដូចជាម៉ូតូឃ្លីក, អឹមអេសអុិច, ស៊ូមម័រ ហើយនិងស្គូពី តម្រូវឱ្យបង់ពន្ធ ក្នុងមួយគ្រឿងរហូតដល់ទៅ៧០៥ដុល្លារអាមេរិក ។ រីឯម៉ូតូធំៗដូចជា CBR កម្លាំង១៥០CC តម្រូវឱ្យបង់ពន្ធ ១០៧០ដុល្លារអាមេរិក និងម៉ូតូប្រភេទ PCX ដែលមានកម្លាំង១៥៣CC បង់ពន្ធជិត២០០០ដុល្លារអាមេរិក ហើយនៅតែពិបាកបង់ទៀត ។ ជុំវិញភាពខុសគ្នានៃការបង់ពន្ធទោចក្រយានយន្តនាំចូលពីក្រៅប្រទេសរវាងខេត្តបន្ទាយមានជ័យ និងខេត្តព្រះសីហនុ នេះ ត្រូវបានអ្នករកស៊ីទិញលក់ទោចក្រយានយន្តអះអាងថា មន្ត្រីជំនាញនៅខេត្តបន្ទាយមានជ័យអនុវត្តត្រឹមត្រូវតាមច្បាប់កំណត់ ។ ជុំវិញបញ្ហាខាងលើ មន្ត្រីគយចល័តក្រសួងមួយរូប ដែលប្រចាំការនៅខេត្តបន្ទាយមានជ័យ បានប្រាប់កោះសន្តិភាពតាមទូរស័ព្ទថា បញ្ហានេះលោកសុំមិនទាន់ធ្វើការបំភ្លឺទេ ព្រោះមិនទាន់ដឹងថា ឯកសារដែលភ្នាក់ងារកោះសន្តិភាពទទួលបាននេះ របៀបណានោះទេ ។ ចំណែកមន្ត្រីពាក់ព័ន្ធគយ និងរដ្ឋាករកែវផុស ខេត្តព្រះសីហនុ មិនអាចទាក់ទងសុំការបំភ្លឺបានទេ ព្រោះមិនស្គាល់លេខទូរស័ព្ទ ។
បញ្ហាបង់ពន្ធទោចក្រយានយននាំចូលខុសគ្នារវាងខេត្តបន្ទាយមានជ័យ និងខេត្តព្រះសីហនុនេះ គេពុំដឹងថា មន្ត្រីជំនាញខេត្តមួយណាជាអ្នកខុសនោះទេ ប៉ុន្តែពាក់ព័ន្ធនឹងឯកសារ ដែលទទួលបាននេះ ប្រភពពីអ្នករកស៊ីទិញលក់ម៉ូតូនៅខេត្តបន្ទាយមានជ័យលើកទ្បើងថា ម៉ូតូដែលត្រូវបង់ពន្ធមួយចំនួនត្រូវគេទម្លាក់កម្លាំងសេះ និងខ្លះត្រូវគេទម្លាក់សេ៊រីឆ្នាំ ដើម្បីបង់ពន្ធតិច ៕
ចែករំលែកព័តមាននេះ