រាជធានីភ្នំពេញ ៖ កម្លាំងរដ្ឋបាលព្រៃឈើរាជធានីភ្នំពេញ សហការជាមួយសមត្ថកិច្ចនគរបាលមូលដ្ឋាន បានស្ទាក់ចាប់បានរថយន្តដឹកអេតចាយមួយគ្រឿងដែលបង្កប់ឈើគ្រញូងជាង១តោន កាលពីវេលាម៉ោង២និង៣០នាទីរសៀល ថ្ងៃទី១០ កុម្ភៈ នៅចំណុចទីតាំងស្តង់លក់ និងទិញអេតចាយមួយកន្លែង ស្ថិតនៅតាមបណ្តោយផ្លូវលេខ២១៧ ក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ ។
មន្ត្រីរដ្ឋបាលព្រៃឈើមួយរូបឱ្យដឹងថា រថយន្តដឹកអេតចាយបង្កប់ឈើគ្រញូងមួយគ្រឿងនេះ ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ 2A-0179 ដែលមានម្ចាស់ឈ្មោះ ស៊ីវ ចន្ថា ភេទស្រី អាយុជាង៣០ឆ្នាំ ជាជនជាតិវៀតណាម ។ ចំណែកស្តង់លក់-ទិញអេតចាយនោះ គឺជួលពីស្ត្រីម្នាក់ឈ្មោះ យូ កញ្ញា អាយុ៤៥ឆ្នាំ ដើម្បីធ្វើអាជីវកម្ម ។ ដោយឡែកអ្នកបើកបររថយន្តបានរត់គេចខ្លួនបាត់ស្រមោល មុនពេលកម្លាំងចម្រុះចុះទៅដល់ ។ ប្រភពដដែលបានបន្តថា មុនពេលត្រូវចាប់ឃាត់ រថយន្តនេះបានដឹកអេតចាយចេញពីចំណុចស្ពានច្បារអំពៅ ក្នុងខណ្ឌមានជ័យ ហើយដោយមានការសង្ស័យ កងកម្លាំងក៏បានតាមពីក្រោយរហូតដល់ទីតាំងខាងលើ ឯអ្នកបើកបរបានរត់គេចខ្លួនបាត់ ។
បន្ទាប់មកទៀត កងកម្លាំងបានធ្វើការឆែកឆេររកឃើញឈើគ្រញូងដែលជនសង្ស័យលាក់បង្កប់នៅក្រោមរបស់អេតចាយដោយច្រកបាវយ៉ាងត្រឹមត្រូវ និងមានទម្ងន់ប្រមាណជាង១តោន ។ ពេលនេះ ទាំងរថយន្ត និងឈើត្រូវបានសមត្ថកិច្ចរដ្ឋបាលព្រៃឈើនាំយកទៅរក្សាទុក ៕
ចែករំលែកព័តមាននេះ