ខេត្តឧត្តរមានជ័យ ៖ ទារិកាអភ័ព្វម្នាក់កើតមកមានតែដងខ្លួននិងក្បាល អត់មានដៃជើងនិងទើបតែមានអាយុ១៥ថ្ងៃប៉ុណ្ណោះគិតត្រឹមថ្ងៃទី១០ កុម្ភៈ នៅក្នុងគ្រួសារក្រីក្រមួយក្នុងភូមិត្រពាំងរុន ហៅភូមិរលំត្បាល់ ឃុំត្រពាំងប្រាសាទ ស្រុកត្រពាំងប្រាសាទ ។
ខេត្តឧត្តរមានជ័យ ៖ ទារិកាអភ័ព្វម្នាក់កើតមកមានតែដងខ្លួននិងក្បាល អត់មានដៃជើងនិងទើបតែមានអាយុ១៥ថ្ងៃប៉ុណ្ណោះគិតត្រឹមថ្ងៃទី១០ កុម្ភៈ នៅក្នុងគ្រួសារក្រីក្រមួយក្នុងភូមិត្រពាំងរុន ហៅភូមិរលំត្បាល់ ឃុំត្រពាំងប្រាសាទ ស្រុកត្រពាំងប្រាសាទ ។ តើហេតុអ្វីបានជាព្រហ្មលិខិតដាក់ទណ្ឌកម្មឱ្យជីវិតមួយនេះជួបភាពទារុណដោយគ្មានក្ដីមេត្ដាសោះបែបនេះ ។
ស្ថានភាពនេះគ្មាននរណាម្នាក់ចង់ជួបនោះទេ តែវាសនាកម្មបានបង្កើតឡើងនូវជីវិតបែបនេះទៅហើយពិតជាគួរឱ្យសង្វេគណាស់ម្ចាស់ថ្លៃអើយ ។ លោកតាតាន់ ណុង អាយុ៦០ឆ្នាំ ប្រពន្ធឈ្មោះផេង រី អាយុ៥០ឆ្នាំ ត្រូវជាជីតានិងជីដូនរៀបរាប់ថា ទារិកាជាចៅអភ័ព្វនេះឪពុកឈ្មោះឃ្លាំង ជា អាយុ៣៥ឆ្នាំ ម្ដាយឈ្មោះតាន់ តូន អាយុ៣៤ឆ្នាំ មានកូនចំនួន៥នាក់ (ស្រី៤នាក់) និងមានមុខរបរដើរសីុឈ្នួលគេរកប្រាក់ចិញ្ចឹមជីវិត ។ គាត់បានបញ្ជាក់បន្ថែមថា ទារិការអភ័ព្វនេះជាកូនស្រីទី៥ ហើយម្ដាយបានពពោះតែ៧ខែកន្លះប៉ុណ្ណោះស្រាប់តែឈឺពោះ ។ ទិដ្ឋភាពចម្លែកបែបនេះពួកគាត់ទាំងពីរនាក់ប្ដីប្រពន្ធបាននាំកូនស្រីទៅសម្រាលកូននៅឯមន្ទីរពេទ្យគន្ធបុប្ផា ខេត្តសៀមរាប ស្រាប់តែកើតមកមានតែដងខ្លួននិងក្បាលប៉ុណ្ណោះពុំមានដៃជើងទេ ។ ក្រោយឆ្លងទន្លេរួចរូបគាត់បាននាំកូនស្រីនិងចៅអភ័ព្វវិលត្រឡប់មកផ្ទះវិញដោយពុំឱ្យគេឯងដឹងឡើយ ពីព្រោះកូនស្រីគាត់ចេះតែខ្មាសគេ ។
ជីដូននិងជីតាទារិកាអភ័ព្វបានបន្តថា ក្រោយពេលសម្រាលកូនរួចនាំមកដល់ផ្ទះវិញស្រាប់តែកូនស្រីនាំប្ដីនិងកូន៤នាក់ចាកចេញពីផ្ទះធ្វើចំណាកស្រុកទៅរកការងារធ្វើនៅប្រទេសថៃបាត់ទៅ ដោយបន្សល់ទុកទារិកាជាចៅអភ័ព្វនេះនៅជាមួយគាត់ចិញ្ចឹមបីបាច់ថែរក្សា ។ ចំណែកពួកគាត់ទាំង២នាក់ប្ដីប្រពន្ធត្អូញត្អែរថា មិនមានលទ្ធភាពចិញ្ចឹមទេ និងលើកដៃសំពះអោនលំទោនសុំអំពាវនាវដល់សប្បុរសជននៅក្នុងនិងក្រៅប្រទេស ជាពិសេសសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដែលតែងតែយកចិត្តទុកដាក់ជួយស្រោចស្រង់អាយុជីវិតពលរដ្ឋ សូមមេត្ដាផ្ដល់ពន្លឺជីវិតថ្មីដល់ចៅស្រីអភ័ព្វនេះផង ។
សូមបញ្ជាក់ថា មិនត្រឹមតែអត់ដៃ-ជើងទេទារិកាអភ័ព្វនេះមានរន្ធគូទនិងប្រដាប់ភេទតែមួយទៀតផងដែលចម្លែកបំផុត ៕
ចែករំលែកព័តមាននេះ