ខេត្តប៉ៃលិន ៖ កាលពីថ្ងៃទី០៩-១០ កុម្ភៈ ២០១៤ លោក អ៊ី ឈាន អភិបាល នៃគណៈអភិបាលខេត្ត និងលោកជំទាវ បាន ស្រីមុំ តំណាងរាស្ត្រមណ្ឌលប៉ៃលិន និងជាប្រធានសភាពសហព័ន្ធយុវជនកម្ពុជាខេត្ត ព្រមទាំងក្រុមយុវជនសភាពសហព័ន្ធយុវជនកម្ពុជា ជាច្រើននាក់ទៀត បានចូលរួមជិះកង់ជាមួយក្រុមយុវជនស្ម័គ្រចិត្តកុលបុត្រតេជោ ដែលបានសហការជាមួយមូលនិធិបាយ័ន រៀបចំព្រឹត្តិការណ៍មនុស្សធម៌ ដោយជិះកង់នៅទូទាំងខេត្តប៉ៃលិន ដើម្បីប្រមូលនិធិជួយដល់មន្ទីរពេទ្យគន្ធបុប្ផា ក្រោមប្រធានបទ «កង់គន្ធបុប្ផា ដើម្បីជីវិតកុមារកម្ពុជា»។
លោក ពិន ពិសាល តំណាងយុវជនស្ម័គ្រចិត្តកុលបុត្រតេជោ បានឲ្យដឹងថា ក្រុមយុវជនស្ម័គ្រចិត្តកុលបុត្រតេជោ បានជិះកង់ចេញដំណើរនៅថ្ងៃទី០២ កុម្ភៈ ២០១៤ ចេញពីរាជធានីភ្នំពេញ ឆ្លងកាត់បណ្តាខេត្តនៅទូទាំងប្រទេស ក្នុងគោលបំណងស្វែងរកមូលនិធិពីសប្បុរជន និងប្រជាជន ជួយដល់មន្ទីរពេទ្យគន្ធបុប្ផា ដែលកំពុងតែមានការខ្វះខាត។ ជាក់ស្តែងនៅថ្ងៃនេះ បានមកដល់ទឹកដីខេត្តប៉ៃលិន។
លោកជំទាវ បាន ស្រីមុំ ក៏បានសម្ដែងនូវសេចក្តីរីករាយសាទរយ៉ាងខ្លាំង ដែលបានចូលរួមជាមួយក្រុមយុវជនកុលបុត្រតេជោ ក្នុងសកម្មភាពមនុស្សធម៌ស្វែងរកមូលនិធិជួយដល់កុមារកម្ពុជា ដែលបច្ចុប្បន្ននេះ មន្ទីរពេទ្យគន្ធបុប្ផាកំពុងខ្វះខាតថវិកា។ កម្មវិធីជិះកង់ក្រុមយុវជនស្ម័គ្រចិត្តកុលបុត្រតេជោ និងសហភាពសហព័ន្ធយុវជនខេត្តប៉ៃលិន បានចាប់ផ្តើមចេញដំណើរពីមុខរូបសំណាកលោកយាយយ៉ាត ក្នុងភូមិអូរតាប្រាង សង្កាត់ប៉ៃលិន ឆ្ពោះទៅទីប្រជុំនៅក្នុងក្រុងប៉ៃលិន ជុំវិញផ្សារសាមគ្គី ហៅប៉ាហ៊ី និងឆ្ពោះទៅច្រកទ្វារអន្តរជាតិព្រំ ភូមិផ្សារព្រំ ឃុំស្ទឹងកាច់ ស្រុកសាលាក្រៅ។
នៅថ្ងៃដំបូង សប្បុរសជន ប្រជាជននៅក្នុងខេត្តប៉ៃលិន បានចូលរួមយ៉ាងផុលផុស ដើម្បីជួយដល់មន្ទីរពេទ្យគន្ធបុប្ផា ក្នុងស្មារតីមនុស្សធម៌បានចំនួន ១២,១៦២,២០០រៀល ប្រាក់បាត ៧៦៩២០បាត ដុល្លារ ៣២៦៤ដុល្លារ។ ដោយឡែក នៅព្រឹកថ្ងៃទី១០ កុម្ភៈ នៅតាមភូមិមួយចំនួន និងនៅតាមផ្សារក្នុងស្រុកសាលាក្រៅ ការរៃអង្គាសទទួលបាន ១៥ដុល្លារ ៦៧២០បាត (លុយថៃ) និង ១២៣២០០០រៀល៕
ចែករំលែកព័តមាននេះ