ខេត្តកំពង់ធំ ៖ លោកបណ្ឌិត ម៉ុក ម៉ារ៉េត ប្រធានគណៈកម្មាធិការផែនការវិនិយោគកសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភាជាតិ បន្ទាប់ពីបានបើកកិច្ចប្រជុំស្តីអំពីការគ្រប់គ្រងព្រៃឈើនៅតំបន់ព្រៃឡង់ នារសៀលថ្ងៃទី១០ កុម្ភៈ ២០១៤ នៅសាលប្រជុំខេត្តកំពង់ធំ (អគារB) រួចមក នៅព្រឹកថ្ងៃទី១១ កុម្ភៈ បានអញ្ជើញដឹកនាំគណៈប្រតិភូថា្នក់ជាតិ ថ្នាក់ខេត្ត ថ្នាក់ស្រុក រួមជាមួយប្រធានមន្ទីរមួយចំនួនពាក់ព័ន្ធចុះសំណេះសំណាល ព្រមទាំងដោះស្រាយនូវសំណូមពរមួយចំនួនរបស់ប្រជាពលរដ្ឋ ចំនួន ២៥០នាក់ មកពី ៦សហគមន៍ ក្នុងឃុំសណ្តាន់ និងឃុំមានរិទ្ធ ស្រុកសណ្តាន់ ដែលពាក់ព័ន្ធព្រៃឡង់។
បន្ទាប់មក លោកបានបន្តដំណើរទៅជួបសំណេះសំណាលជាមួយប្រជាពលរដ្ឋ ចំនួន ២៣០នាក់ទៀត នៅក្នុងសហគមន៍តំបន់ការពារធម្មជាតិដាំម្រេច ស្ថិតនៅក្នុងភូមិស្រែ ឃុំសាលាវិស័យ ស្រុកប្រាសាទបល្ល័ង្គ ដើម្បីដោះស្រាយរាល់បញ្ហាទុក្ខកង្វល់ រួមជាមួយនិងសំណូមពរ។ ក្រោយពីជួបសំណេះសំណាលរួចរាល់ហើយនោះ ប្រជាពលរដ្ឋម្នាក់ៗ ទទួលបានសារុងពុម្ព១ ជារបស់អនុស្សាវរីយ៍កំដរដៃ។
នារសៀលថ្ងៃដដែលនោះដែរ លោកបណ្ឌិត រួមជាមួយនឹងក្រុមការងារ បានអញ្ជើញចុះទៅត្រួតពិនិត្យដល់តំបន់ព្រៃឡង់ បានមានប្រសាសន៍ដោយសង្កត់ធ្ងន់ថា នៅតំបន់ព្រៃឡង់ ដែលមានផ្ទៃដីសរុបចំនួន ៤៨ម៉ឺន និង ៤ពាន់ហិកតានេះ វាមានទំហំធំធេងណាស់ បើទោះបីជាមានការលបលួចចូលកាប់ទន្រ្ទានខ្លះៗ ពីជនខិលខូចមួយចំនួនតូចយ៉ាងណាក៏ដោយ ក៏យើងខិតខំការពារបាន។
រាជរដ្ឋាភិបាលកម្ពុជា ក្រោមការដឹកនាំប្រទេសជាតិ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី លោកតែងតែគិតគូរដល់សុខទុក្ខដល់ប្រជាពលរដ្ឋជានិច្ច ប្រជាពលរដ្ឋអត់ដីរស់នៅចែកដីជូន ថែមទាំងធ្វើបណ្ណកម្មសិទ្ធិជូនទៀតផង។
ជាបន្ត លោកបណ្ឌិត និងសហការី បានរួមដំណើរទៅទស្សនាស្វែងយល់អំពីចម្ការកៅស៊ូវៀតណាម ក្នុងខេត្តកំពង់ធំ និងចម្ការម្រេចរបស់ លោកឧកញ៉ា ទ្រី ភាព ស្ថិតនៅក្នុងទឹកដីខេត្តព្រះវិហារ រួចទើបអញ្ជើញវិលត្រលប់ទៅកាន់ទីក្រុងភ្នំពេញ វិញទាំងយប់៕
ចែករំលែកព័តមាននេះ