រាជធានីភ្នំពេញ ៖ យោងតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជា ចេញផ្សាយកាលពីថ្ងៃទី០៧ កុម្ភៈ បានបង្ហាញថា ប្រទេសកម្ពុជា នឹងធ្វើជាម្ចាស់ផ្ទះនៃកិច្ចប្រជុំគណៈកម្មាធិការសម្របសម្រួលចម្រុះ នៃតំបន់ត្រីកោណអភិវឌ្ឍន៍ កម្ពុជា ឡាវ វៀតណាម លើកទី៩ និងកិច្ចប្រជុំពាក់ព័ន្ធ ដែលរៀបចំធ្វើឡើងនៅទីក្រុងក្រចេះ ខេត្តក្រចេះ ចាប់ពីថ្ងៃទី២៧ កុម្ភៈ ដល់ថ្ងៃទី០៤ មីនា ២០១៤។
ក្នុងឱកាសដែលកម្ពុជា ធ្វើជាម្ចាស់ផ្ទះនៃកិច្ចប្រជុំក្រសួងពាណិជ្ជកម្ម នឹងមានការរៀបចំពិព័រណ៍ពាណិជ្ជតំបន់ត្រីកោណអភិវឌ្ឍន៍ កម្ពុជា ឡាវ វៀតណាម ឆ្នាំ២០១៤ (CLV Development Triangle Trade Fair 2014) ដែលនឹងប្រព្រឹត្តទៅចាប់ពីថ្ងៃទី០១ ដល់ថ្ងៃទី០៣ មីនា ២០១៤ នៅមជ្ឈមណ្ឌលកីឡាទីក្រុងក្រចេះ ខេត្តក្រចេះ រួមទាំងមានការប្រគំតន្ត្រីនាពេលរាត្រីនោះ ផងដែរ។
ការរៀបចំពិព័រណ៍ពាណិជ្ជកម្មនេះ ក្នុងគោលបំណង ដើម្បីគាំទ្រ និងបង្ហាញពីសកម្មភាពជម្រុញពាណិជ្ជកម្មក្នុងតំបន់ពាណិជ្ជកម្ម កម្ពុជា ឡាវ វៀតណាម ហើយជាព្រឹត្តិការណ៍មួយផ្តល់ឱកាសដល់ធុរៈជនបានជួបជុំគ្នា ដើម្បីបង្ហាញ និងពិភាក្សានូវគំនិតថ្មីៗ សម្រាប់បង្កើនសកម្មភាពនាំចេញទៅកាន់ទីផ្សារអន្តរជាតិ ដោយមានការចូលរួមពីប្រទេសឡាវ និងវៀតណាម ក៏ដូចជាការចូលរួមចំណែកក្នុងការអភិវឌ្ឍន៍សេដ្ឋកិច្ចក្រោមឆ័ត្រយុត្តិសាស្ត្រចតុកោណដំណាក់កាលទី៣ នៃកម្មវិធីនយោបាយរបស់រាជរដ្ឋាភិបាលកម្ពុជា អាណត្តិទី៥៕
ចែករំលែកព័តមាននេះ