ខេត្តពោធិ៍សាត់ ៖ មន្ត្រីមេព្រៃ នគរបាលក្រុងពោធិ៍សាត់ និងនគរបាលប៉ុស្តិ៍រដ្ឋបាលស្វាយអាត់ដឹកនាំដោយលោកប៉ង់ ចាន់សុយុទ្ធារា ព្រះរាជអាជ្ញារងអមសាលាដំបូងខេត្ត កាលពីថ្ងៃទី១០ កុម្ភៈ ២០១៤ បានចុះឆែកឆេរផ្ទះជាងចម្លាក់មួយកន្លែងស្ថិតនៅភូមិស្ថានីយរថភ្លើង សង្កាត់ស្វាយអាត់ ក្រុងពោធិ៍សាត់ ដែលមានម្ចាស់ឈ្មោះទូច វិចិត្រ អាយុ៣២ឆ្នាំ ជាប្តី និងប្រពន្ធឈ្មោះបូឡា អាយុ២៩ឆ្នាំ ដើម្បីត្រួតពិនិត្យមើលសិប្បកម្មចម្លាក់នោះ។
បន្ទាប់ពីត្រួតពិនិត្យរួច សមត្ថកិច្ចបានយករថយន្តមកស្ទូចគល់ឈើតូច ធំមួយចំនួនដែលមិនទាន់ឆ្លាក់រូបទៅរក្សាទុកនៅខណ្ឌរដ្ឋបាលព្រៃឈើ ឯគល់ឈើឆ្លាក់រួច គឺមិនយកទេ ។ ខណៈពេលឃើញសមត្ថកិច្ចនៅឈរច្រូងច្រាងក្នុងផ្ទះ និងមុខផ្ទះនោះស្ត្រីជាម្តាយដែលទើបត្រឡប់មកពីលក់នំអាកោវិញមានការតក់ស្លុតយ៉ាងខ្លាំង ហើយនៅពេលកូនប្រាប់រឿងភ្លាមស្រាប់តែស្ត្រីរូបនោះស្រែកយំរហូតដល់សន្លប់បាត់ស្មារតីធ្វើឱ្យមានការវឹកវរដឹកទៅកាន់មន្ទីរពេទ្យជាបន្ទាន់។
ប្តីប្រពន្ធទាំង២នាក់បានរៀបរាប់ថា គល់ឈើទាំងអស់នេះមួយចំនួនខ្លួនទិញពីគេមួយចំនួនជារបស់អតិថិជន ឯខ្លួនគ្រាន់តែជាអ្នកស៊ីឈ្នួលឆ្លាក់ឱ្យគេតែប៉ុណ្ណោះ ហើយផ្ទះនេះក៏ជួលគេដែរ ពុំមានឈើអ្វីល្អទេ ខ្លះដើមមៀនព្រៃ ដើមខ្នុរ ដើមស្វាយ និងដើមធ្នុងដែលគេគាស់ចោលតាមស្រែចំការ ហើយទិញគេក្នុងតម្លៃថោកៗប៉ុណ្ណោះ ប៉ុន្តែការដឹកជញ្ជូន និងឆ្លាក់ទើបអស់តម្លៃច្រើន។
គ្រួសារខាងលើបានប្រាប់សមត្ថកិច្ចទាំងទឹកភ្នែកថា មូលហេតុដែលសមត្ថកិច្ចចុះមកនេះដោយសារពូរបស់គាត់មានជម្លោះជាមួយគ្រួសារគាត់ពីរឿងពឹងកូនរបស់គាត់ឱ្យបើករថយន្តជូនគេទៅភ្នំពេញ តែកូនរបស់គាត់មិនជូនទៅ គេខឹងក៏ទៅប្តឹងតុលាការ និងឱ្យសមត្ថកិច្ចមកចាប់ឈើនេះឱ្យអស់។
មន្ត្រីមេព្រៃបានឱ្យដឹងថា ការធ្វើនេះគឺអនុវត្តតាមបញ្ជារបស់លោកព្រះរាជអាជ្ញារងតែប៉ុណ្ណោះ ទោះបីជាឈើមៀនព្រៃ ខ្នុរ ក៏ដោយឱ្យតែលក្ខណៈសិប្បកម្មបែបនេះ គឺសុទ្ធតែខុសច្បាប់ ហើយយើងនឹងបន្តធ្វើនៅកន្លែងផ្សេងទៀតដែលគ្មានច្បាប់៕
ចែករំលែកព័តមាននេះ