រាជធានីភ្នំពេញ ៖ ថៅកែរថយន្តដឹកដី និងលក់គ្រឿងបន្លាស់រថយន្តម្នាក់ត្រូវជនមិនស្គាល់មុខចំនួន២នាក់ជិះម៉ូតូ១គ្រឿងម៉ាកហុងដាឌ្រីម ធុនC១២៥ពណ៌ខ្មៅ ប្រដាប់ដោយអាវុធខ្លី តាមបាញ់សម្លាប់ ខណៈពេលកំពុងជិះរថយន្តម៉ាករ៉េវហ្វរ ពណ៌ទឹកប្រាក់ ស៊េរី២០០១ ពាក់ស្លាកលេខភ្នំពេញ២T៩៦៦៥ តាមដងផ្លូវ តែសំណាងល្អគ្រាប់កាំភ្លើងបានទម្លុះកញ្ចក់រថយន្តខាងឆ្វេងធ្លាយទៅខាងស្តាំ មិនបណ្តាលឱ្យគ្រោះថ្នាក់ដល់ជីវិត។
ហេតុការណ៍នេះបានកើតឡើងកាលពីវេលាម៉ោង៩ និង៣០នាទីយប់ ថ្ងៃទី១០ កុម្ភៈ ២០១៤ នៅតាមមហាវិថីសេនាប្រមុខគីម អ៊ីលស៊ុង មុខសាលាបឋមសិក្សាទួលគោកក្នុងសង្កាត់បឹងកក់ទី១ ខណ្ឌទួលគោក ។
ជនរងគ្រោះដែលត្រូវជនមិនស្គាល់មុខតាមបាញ់សម្លាប់នោះឈ្មោះជា សំឡេង ភេទប្រុស អាយុ៦២ឆ្នាំ ជាថៅកែរថយន្តដឹកដី និងលក់គ្រឿងបន្លាស់រថយន្ត មានទីលំនៅផ្ទះលេខ៣៤១ ក្រុមទី៧ ភូមិទី៧ ផ្លូវម៉ៅសេទុង សង្កាត់ផ្សារដេប៉ូទី១ ខណ្ឌទួលគោក។
តាមសមត្ថកិច្ចបានសន្និដ្ឋានថា ការបាញ់សម្លាប់នេះគឺជារឿងគំនុំ។ ទោះបីជាយ៉ាងណាលោកជា សំឡេង បានប្រាប់សមត្ថកិច្ចថា កន្លងមកគាត់ពុំដែលមានទំនាស់ជាមួយនរណាម្នាក់ឡើយ។
គួរបញ្ជាក់ថា នៅដើមឆ្នាំ២០១៤នេះនៅក្នុងខណ្ឌទួលគោក មានករណីឃាតកម្មតាមបាញ់សម្លាប់ចំនួន២លើក ហើយឃាតករបានធ្វើសកម្មភាពបាញ់សម្លាប់នៅចំណុចក្បែរគ្នាដែលជាព្រំប្រទល់សង្កាត់បឹងកក់ទី២ និងសង្កាត់បឹងកក់ទី១៕
ចែករំលែកព័តមាននេះ