រាជធានីភ្នំពេញ ៖ បុរសម្នាក់ជានគរបាលនៃអគ្គស្នងការដ្ឋាននគរបាលជាតិឃើញបុរសម្នាក់ត្រូវរថយន្តបុកសន្លប់ស្តូកស្តឹងរាប់ម៉ោងគ្មានអ្នកណាអើពើខឹងពេកដកកាំភ្លើងបាញ់បង្អើរមេឃមួយគ្រាប់ផ្អើលរថយន្តសង្គ្រោះ និងសមត្ថកិច្ចចុះទៅជួយអន្តរាគមន៍ កាលពីវេលាម៉ោង១២ និង២០នាទីរំលងអធ្រាត្រឈានចូលថ្ងៃទី ១១ កុម្ភៈ ២០១៤ មុខក្រសួងកសិកម្ម តាមមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន។
សាក្សីឃើញហេតុការណ៍បានឱ្យដឹងថា មុនពេលកើតហេតុគេឃើញម៉ូតូស្មាស ពណ៌ខ្មៅ ពាក់ស្លាកលេខភ្នំពេញ១M០២៨៥ បើកដោយបុរសម្នាក់ពីត្បូងទៅជើង ចំណែករថយន្តស៊ីអវី ពណ៌ទឹកប្រាក់ ពាក់ស្លាកលេខភ្នំពេញ២F៩៨១៦ ជិះគ្នា៣នាក់ ជាជនជាតិបរទេសបើកពីជើងទៅត្បូង ខណៈមកដល់ចំណុចខាងលើម៉ូតូរេចង្កូតទៅបុកចំពីមុខរថយន្តពេញទំហឹងបណ្តាលឱ្យអ្នកបើកម៉ូតូដួលសន្លប់ស្តូកស្តឹង ប៉ុន្តែរាប់ម៉ោងហើយនៅតែមិនឃើញមានរថយន្តសង្គ្រោះ និងសមត្ថកិច្ចទៅដល់កន្លែងកើតហេតុ ទើបបុរសម្នាក់ជានគរបាលនៃអគ្គស្នងការដ្ឋាននគរបាលជាតិជិះម៉ូតូម៉ាកយ៉ាម៉ាហាស៊ីរូស ពណ៌ខ្មៅលាយស ពាក់ស្លាកលេខនគរបាល១.២២៧៧ ជិះមកដល់ឃើញហេតុការណ៍បែបនេះខឹងពេកបានដកកាំភ្លើងបាញ់បង្អើរមេឃដោយអះអាងថា បាញ់ហៅរថយន្តសង្គ្រោះ និងហៅសមត្ថកិច្ចមកជួយអន្តរាគមន៍។
ប្រភពដដែលបន្តថា គ្រាន់តែបាញ់មួយគ្រាប់ផូង មនុស្សមកចោមរោមដូចស្រមោច មិនថាតែសមត្ថកិច្ច និងរថយន្តសង្គ្រោះទេទៅដល់កន្លែងកើតហេតុភ្លាមតែម្តង និងឃាត់ខ្លួនបុរសបាញ់បោះរូបនោះយកទៅសាកសួរនៅប៉ុស្តិ៍ទន្លេបាសាក់។ ចំណែករថយន្ត និងម៉ូតូត្រូវសមត្ថកិច្ចវាស់វែងរួចយកទៅការិយាល័យនគរបាលចរាចរណ៍ផ្លូវគោករង់ចាំធ្វើការដោះស្រាយតាមច្បាប់៕
ចែករំលែកព័តមាននេះ