ខេត្តកំពង់ចាម ៖ ម៉ូតូ ១គ្រឿង អ្នកបើកបរស្រវឹងស្រា ដឹកមនុស្សរហូតដល់ទៅ ៤នាក់ បានបើកទៅបុកគូទរថយន្តយ៉ាងពេញទំហឹង បណ្តាលឲ្យក្មេងប្រុសម្នាក់អាយុ ៣ឆ្នាំ ស្លាប់ភ្លាមៗ ដោយបែកក្បាលធ្លាយខួរចេញមកក្រៅ និងរងរបួសធ្ងន់ ៣នាក់។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១ និង ៣០នាទី រសៀលថ្ងៃទី១០ កុម្ភៈ ២០១៤ នៅលើកំណាត់ផ្លូវជាតិលេខ៧០ ក្នុងភូមិពោធិ៍សាលា ឃុំព្រែកក្របៅ ស្រុកកងមាស អ្នករងគ្រោះត្រូវបានបញ្ជូនមកសង្រ្គោះនៅមន្ទីរពេទ្យ៧D។
លោកអនុសេនីយ៍ឯក ម៉ុក បាវី អធិការរងទទួលបន្ទុកសណ្តាប់ធ្នាប់ស្រុកកងមាស បានឲ្យដឹងថា មុនពេលកើតហេតុបុរសឈ្មោះ អន ប៊ុនលី អាយុ ៣២ឆ្នាំ ជិះម៉ូតូ ១គ្រឿង ម៉ាកវ៉េវ បានដឹកក្មេងៗ ៣នាក់ ដោយម្នាក់អង្គុយនៅពីមុខ និង ២នាក់ទៀត អង្គុយនៅខាងក្រោយ ជិះទៅបុករថយន្តពីខាងក្រោយពេញទំហឹង ដោយសារតែស្រវឹងស្រាធ្លាក់ភ្នែក។
លោកអធិការបន្តថា ម៉ូតូបានបើកចេញពីជើងមកត្បូង ស្របពេលមកដល់ភូមិពោធិ៍សាលា ក៏បានទៅបុករថយន្តកូរ៉េ ១គ្រឿង ម៉ាកទីតាន់ចំណុះ ១តោនកន្លះ ពាក់ស្លាកលេខ ភ្នំពេញ 2H-3754 ឈប់ចតនៅអែបស្តាំដៃ ជាកម្មសិទ្ធិរបស់ឈ្មោះ ហោ ហៃស៊ន់ ភេទប្រុស អាយុ ៥៥ឆ្នាំ នៅភូមិស្វាយតាហែន ឃុំរកាគយ ស្រុកកងមាស។ ក្នុងហេតុការណ៍នេះ បណ្តាលឲ្យកុមារម្នាក់ឈ្មោះ ពោត ថុនា អាយុ ៣ឆ្នាំ បានធ្លាយខួរស្លាប់ភ្លាមៗ នៅនឹងកន្លែងកើតហេតុ។ ចំណែកអ្នកបើកម៉ូតូ និងក្មេង ២នាក់ទៀត ដែលអង្គុយខាងក្រោយ ទី១-ឈ្មោះ ថា វិច្ឆិកា អាយុ ១០ឆ្នាំ ទី២- ឈ្មោះ ស៊្រុន ណាង អាយុ ១៣ឆ្នាំ បានរងរបួសធ្ងន់ទាំងអស់គ្នា ត្រូវបានសមត្ថកិច្ចហៅរថយន្តសង្គ្រោះរបស់មន្ទីរពេទ្យ៧D ដឹកយកទៅសង្គ្រោះ។
ជនរងគ្រោះឈ្មោះ អន ប៊ុនលី បានផឹកស្រាស្រវឹងនៅកន្លែងបោកស្រូវ នៅភូមិព្រែកកំបាក់ បន្ទាប់មកក៏បានជិះម៉ូតូដឹកក្មេងទាំង ៣នាក់ ខាងលើ ក្នុងគោលបំណងទៅរើសសម្បកកំប៉ុងប៊ីយែរតាមរោងការ មិនទាន់បានរើសផងស្រាប់តែជិះមកបុករថយន្តពីខាងក្រោយតែម្តង។ វត្ថុតាងទាំងម៉ូតូ និងរថយន្ត ត្រូវបាននាំទៅរក្សាទុកនៅអធិការដ្ឋាននគរបាលស្រុកកងមាស ដើម្បីដោះស្រាយតាមច្បាប់៕
ចែករំលែកព័តមាននេះ