ខេត្តកំពង់ស្ពឺ ៖ ក្មេងស្រីម្នាក់អាយុ១៥ឆ្នាំបានបោកក្បាលស្លាប់នៅកន្លែងកើតហេតុ ខណៈជិះម៉ូតូលឿនពេលកំពុងធ្លាក់ភ្លៀង ហើយជ្រុលទៅបុកផ្លាកសញ្ញាចរាចរណ៍អមផ្លូវជាតិលេខ៤ពេញទំហឹង ។ ហេតុការណ៍ក្មេងស្រីជិះម៉ូតូហើយបុកផ្លាកសញ្ញាបោកក្បាលស្លាប់នេះ កើតឡើងកាលពីវេលាម៉ោងប្រមាណ៥និង៣០នាទីល្ងាចថ្ងៃទី១៧ ខែសីហា ឆ្នាំ២០២៥កន្លងទៅ…
ខេត្តកំពង់ស្ពឺ ៖ ក្មេងស្រីម្នាក់អាយុ១៥ឆ្នាំបានបោកក្បាលស្លាប់នៅកន្លែងកើតហេតុ ខណៈជិះម៉ូតូលឿនពេលកំពុងធ្លាក់ភ្លៀង ហើយជ្រុលទៅបុកផ្លាកសញ្ញាចរាចរណ៍អមផ្លូវជាតិលេខ៤ពេញទំហឹង ។
ហេតុការណ៍ក្មេងស្រីជិះម៉ូតូហើយបុកផ្លាកសញ្ញាបោកក្បាលស្លាប់នេះ កើតឡើងកាលពីវេលាម៉ោងប្រមាណ៥និង៣០នាទីល្ងាចថ្ងៃទី១៧ ខែសីហា ឆ្នាំ២០២៥កន្លងទៅ នៅលើកំណាត់ផ្លូវជាតិលេខ៤ ចន្លោះបង្គោលគីឡូម៉ែត្រលេខ៨៦-៨៧ ស្ថិតក្នុងភូមិទី១ ឃុំត្រែងត្រយឹង ស្រុកភ្នំស្រួច ។
នគរបាលស្រុកភ្នំស្រួចបានឱ្យដឹងថា ក្មេងស្រីរងគ្រោះឈ្មោះ ផន រក្សា អាយុ១៥ឆ្នាំ រស់នៅក្នុងភូមិ ឃុំ ខាងលើ ជិះម៉ូតូហុងដា សេ១២៥ ស៊េរីឆ្នាំ២០១២ ពណ៌ខ្មៅ ពាក់ផ្លាកលេខ តាកែវ ១H-៥៤៨៤ ធ្វើដំណើរតាមផ្លូវជាតិលេខ៤ពីខាងកើតទៅខាងលិច នៅពេលកំពុងរលឹមផ្លូវសើម។
លុះទៅដល់ចំណុចខាងលើ ស្រាប់តែជ្រុលចង្កូតធ្លាក់ផ្លូវទៅបុកបង្គោលផ្លាកសញ្ញាចរាចរណ៍នៅខាងជើងផ្លូវ បណ្ដាលឲ្យបោកក្បាលស្លាប់ភ្លាមនៅកន្លែងកើតហេតុ ។
ប្រភពដដែលបន្តថា ក្រោយកើតហេតុ នគរបាលចរាចរណ៍បានទៅពិនិត្យដល់ទីកន្លែង ហើយ
ម៉ូតូត្រូវបានក្រុមគ្រួសារយកទៅផ្ទះដោយខ្លួនឯង ។ ករណីខាងលើនេះដែរ សាច់ញាតិក្រុមគ្រួសារបានទទួលស្គាល់ថាជាគ្រោះថ្នាក់កើតឡើងដោយខ្លួនឯង ហើយសពត្រូវបានសមត្ថកិច្ចប្រគល់ជូនសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ