រាជធានីភ្នំពេញ៖ បុរសជាជាងទឹកនិងភ្លើងម្នាក់ខណៈជិះម៉ូតូ១គ្រឿងទៅធ្វើការជិតដល់ការដ្ឋានតទឹកទៅហើយ ស្រាប់តែជ្រុលទៅបុកពីក្រោយរថយន្ត១គ្រឿងម៉ាកតូយ៉ូតាព្រូស ដែលកំពុងបត់ឆ្វេងឆ្លងផ្លូវ បណ្ដាលឲ្យដួលខ្ទាតលើផ្លូវ ស្របពេលនោះមានរថយន្តកុងតឺន័រ១គ្រឿងទៀតទៅពីក្រោយកិន បណ្ដាលឲ្យបែកក្បាល និងមួកសុវត្ថិភាពស្លាប់ភ្លាមៗនៅនឹងកន្លែង ។
ឧប្បត្តិហេតុនេះបានកើតឡើង កាលពីវេលាម៉ោង៧និង៥០នាទីព្រឹកថ្ងៃទី១៨ ខែសីហា ឆ្នាំ២០២៥ នៅលើមហាវិថីសុី ជីនពីង ស្ថិតនៅក្នុងភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។
បើតាមបុរសម្នាក់ដែលត្រូវជាឪពុកមារបស់អ្នកស្លាប់ខាងលើបាននិយាយថា បុរសរងគ្រោះដល់ស្លាប់បាត់បង់ជីវិតនោះឈ្មោះមាន ណាក់ អាយុប្រមាណ៣០ឆ្នាំ មុខរបរជាងទឹកនិងភ្លើង មានទីលំនៅភូមិប្រមូលសុក ឃុំដូង ស្រុកបាទី ខេត្តតាកែវ ។
បុរសជាឪពុកមារូបនោះបានរៀបរាប់ប្រាប់ឲ្យដឹងបន្តទៀតថា នៅមុនពេលកើតហេតុ ក្មួយប្រុសគាត់រូបនេះបានជិះម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៧ ពណ៍ខ្មៅពាក់ស្លាកលេខភ្នំពេញ1GJ-7915 ចេញពីផ្ទះតែម្នាក់ឯងទៅធ្វើការនៅជិតរង្វងមូលស្ពានអាកាសមហាវិថីសុី ជីនពីង ភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ ដោយធ្វើដំណើរក្នុងទិដៅពីត្បូងទៅជើង ។ លុះពេលទៅដល់ត្រង់ចំណុចកើតហេតុ នៅសល់ចម្ងាយតែ៣០០ម៉ែត្រទៀតប៉ុណ្ណោះដល់កន្លែងធ្វើការទៅហើយ ក៏មានរថយន្ត១គ្រឿងម៉ាកតូយ៉ូតាព្រូសពណ៍ ស ពាក់ស្លាកលេខភ្នំពេញ2CB-3010 បើកស្របគ្នារួចបត់ឆ្វេងឆ្លងផ្លូវ ។
បុរសនោះបានប្រាប់ឲ្យដឹងបន្ថែមទៀតថា ខណៈនោះក្មួយប្រុសគាត់វាក់ជាន់ហ្វ្រាំងឈប់អត់ទាន់ក៏បានជ្រុលទៅបុកពីក្រោយរថយន្តព្រូសនោះ បណ្ដាលឲ្យដួលខ្ទាតទៅលើផ្លូវ ។ ស្របពេលនោះ ក៏មានរថយន្តកុងតឺន័រ១គ្រឿងទៀតម៉ាកFUSO ពណ៍ស ពាក់ស្លាកលេខចង្កូតស្ដាំBB-0183 បើកបរស្រាបគ្នាទៅពីក្រោយកិន បណ្ដាលបែកក្បាលរួមទាំងមួកសុវត្ថិភាពស្លាប់ភ្លាមៗនៅនឹងកន្លែងតែម្ដង ។
សមត្ថកិច្ចបានប្រាប់ឲ្យដឹងថា ភ្លាមៗនោះរថយន្តព្រូសបានឈប់នៅជិតកន្លែងកើតហេតុ ហើយអ្នកបើកបរចុះរត់គេចខ្លួនបាត់ ចំណែករថយន្តកុងតឺន័របានបើករត់ ហើយត្រូវបានប្រជាពលរដ្ឋដេញតាមបានចម្ងាយជាង១០០ម៉ែត្រ ទៅដល់ភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ ទើបឃាត់បានប៉ុន្តែអ្នកបើកបរបានចុះរត់គេចខ្លួនបាត់ស្រមោល ។ បន្ទាប់មកនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះធ្វើការវាស់វែងនាំយកទាំងរថយន្តនិងម៉ូតូទៅរក្សាទុកចាត់ការតាមច្បាប់ និងប្រគល់សពជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ