រាជធានីភ្នំពេញ ៖ បុរសម្នាក់បានរងរបួសយ៉ាងធ្ងន់ធ្ងរ ខណៈដែលរូបគាត់ជិះម៉ូតូវ៉េវ ពណ៌ខ្មៅ ១គ្រឿង ពាក់ស្លាកលេខ ភ្នំពេញ 1M-0285 ធ្វើដំណើរតាមបណ្តោយមហាវិថីព្រះនរោត្តម ក្នុងទិសដៅពីជើងទៅត្បូង លុះមកដល់ចំណុចមុខក្រសួងកសិកម្ម ក៏ត្រូវរថយន្តCRV ពណ៌ទឹកប្រាក់ ១គ្រឿង ពាក់ស្លាកលេខ ភ្នំពេញ 2S-9816 ដែលធ្វើដំណើរច្រាសទិសគ្នា រេចង្កូតបុកចំពីមុខពេញទំហឹង បណ្តាលឲ្យសន្លប់ស្តូកស្តឹងនៅនឹងកន្លែង។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១២ និង ២០នាទី យប់រំលងអាធ្រាត្រឈានចូលថ្ងៃទី១១ កុម្ភៈ ២០១៤ នៅតាមបណ្តោយមហាវិថីព្រះនរោត្តម ចំណុចមុខក្រសួងកសិកម្ម ស្ថិតក្នុងសង្កាត់ទន្លេបាសាក់ ខណ្ឌចំការមន។ ក្រោយហេតុការណ៍ ក៏ស្រាប់តែមាននគរបាល ១រូប ស្លៀកពាក់ស៊ីវិល ប្រដាប់ដោយកាំភ្លើងខ្លី ១ដើម មកឈរនៅកន្លែងកើតហេតុ ហើយបាញ់ឡើងលើ ១គ្រាប់ បង្កឲ្យមានការភ្ញាក់ផ្អើលដល់នគរបាលមូលដ្ឋានចុះមកអន្តរាគមន៍។
លុះពេលធ្វើការឃាត់ខ្លួន នគរបាលរូបនោះ បានឆ្លើយថា ខ្លួនបាញ់ឡើងលើ ១គ្រាប់ ដើម្បីហៅឡានពេទ្យមកសង្រ្គោះជនរងគ្រោះ។ ដោយឡែក រថយន្តបង្ក និងម៉ូតូ ត្រូវសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំដោះស្រាយ៕
ចែករំលែកព័តមាននេះ