រាជធានីភ្នំពេញ ៖ កម្លាំងរដ្ឋបាលព្រៃឈើកណ្តាលរាជធានីភ្នំពេញ សហការជាមួយកម្លាំងសមត្ថកិច្ចប៉ូលិសមូលដ្ឋាន បានដេញស្ទាក់ចាប់បានរថយន្តដឹកអេតចាយ ១គ្រឿង ដែលបានបង្កប់ឈើគ្រញូងជាង ១តោន កាលពីវេលាម៉ោង ២ និង ៣០នាទី រសៀលថ្ងៃទី១០ កុម្ភៈ ២០១៤ នៅចំណុចទីតាំងស្តង់លក់ និងទិញអេតចាយ ១កន្លែង ស្ថិតនៅតាមបណ្ដោយផ្លូវ២១៧ ក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ។
មន្រ្តីសង្កាត់រដ្ឋបាលព្រៃឈើរាជធានីភ្នំពេញ បានឲ្យដឹងថា រថយន្តដឹកអេតចាយបង្កប់ឈើគ្រញូង ១គ្រឿងនោះ ម៉ាក HYUNDAI ពណ៌ខៀវ ពាក់ស្លាកលេខ កំពង់ចាម 2A-0179 ដែលមានម្ចាស់ឈ្មោះ ស៊ីវ ចន្ថា ភេទស្រី អាយុជាង ៣០ឆ្នាំ ជនជាតិវៀតណាម ដោយបានជួលទីតាំងនោះ ពីស្រ្តីម្នាក់ឈ្មោះ យូ កញ្ញា អាយុ ៤៥ឆ្នាំ ស្ថិតនៅក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ ធ្វើអាជីវកម្មលក់ និងទិញអេតចាយ។ ដោយឡែកអ្នកបើកបររថយន្តបានរត់គេចខ្លួនបាត់មុនពេលកម្លាំងចម្រុះចុះទៅដល់។
ប្រភពដដែលបានបន្តថា មុនពេលត្រូវឃាត់ រថយន្ត ១គ្រឿងនោះ បានដឹកអេតចាយចេញពីចំណុចស្ពានច្បារអំពៅ ក្នុងខណ្ឌមានជ័យ ពេលនោះ ដោយមានការសង្ស័យកម្លាំងក៏បានតាមពីក្រោយរហូតដល់ទីតាំងខាងលើនេះ បន្ទាប់មកអ្នកបើកបរបានរត់គេចខ្លួនបាត់។ កម្លាំងបានធ្វើការឆែកឆេររកឃើញឈើគ្រញូង ដែលជនសង្ស័យលាក់បង្កប់នៅក្នុងអេតចាយច្រកក្នុងបាវយ៉ាងត្រឹមត្រូវ ដែលមានទម្ងន់ប្រមាណជាង ១តោន ពេលនេះ រថយន្តខាងលើត្រូវបានសមត្ថកិច្ចរដ្ឋបាលព្រៃឈើនាំយកទៅរក្សាទុក៕
ចែករំលែកព័តមាននេះ