រាជធានីភ្នំពេញ ៖ បន្ទាប់ពីមានការមិនពេញចិត្តពីតំណាងកម្មករនិយោជិត សហជីពមួយចំនួន ដែលក្រាញននៀលក្នុងការតវា៉ពីប្រាក់ឈ្នួលកម្មករ រាជរដ្ឋាភិបាលក៏បានបង្កើតគណៈកម្មការមួយដើម្បីសើុបអង្កេតរឿងប្រាក់ឈ្នួលកម្មករនិយោជិត ។
រាជធានីភ្នំពេញ ៖ បន្ទាប់ពីមានការមិនពេញចិត្តពីតំណាងកម្មករនិយោជិត សហជីពមួយចំនួន ដែលក្រាញននៀលក្នុងការតវា៉ពីប្រាក់ឈ្នួលកម្មករ រាជរដ្ឋាភិបាលក៏បានបង្កើតគណៈកម្មការមួយដើម្បីសើុបអង្កេតរឿងប្រាក់ឈ្នួលកម្មករនិយោជិត ។ បើតាមការអះអាងរបស់លោក គាត ឈន់ ឧបនាយករដ្ឋមន្ត្រីប្រចាំការ និងជាប្រធានគណៈកម្មការស្រាវជ្រាវប្រាក់ឈ្នួលនេះថា គណៈកម្មការនេះកំពុងតែដំណើរការស្រាវជ្រាវរកឱ្យឃើញនូវបញ្ហាដែលកម្មករទាមទារ ដើម្បីធ្វើយា៉ងណាឱ្យកម្មករមានជីវភាពធូរស្រាល ។
លោក គាត ឈន់ ឧបនាយករដ្ឋមន្ត្រីប្រចាំការ តំណាងដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រីនៃព្រះរាជាណាចក្រកម្ពុជា បានប្រាប់អ្នកសារព័ត៌មានបន្ទាប់ពីថ្លែងបើកសន្និបាតបូកសរុបការងារឆ្នាំ២០១៣ ទិសដៅឆ្នាំ២០១៤ និងប្រកាសផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈឆ្នាំ២០១៤-២០១៨ កាលពីថ្ងៃទី១០ កុម្ភៈ ឆ្នាំ២០១៥៤ នៅទីស្តីការក្រសួងការងារថា ពេលនេះគណៈកម្មការស្រាវជ្រាវប្រាក់ឈ្នួលកម្មករនិយោជិតកំពុងតែដំណើរការ ហើយគណៈកម្មការនេះមិនទាន់បញ្ចប់ឆាប់ទេ ព្រោះថាការស្រាវជ្រាវបានគិតគូរដល់ជីវភាពកម្មករនិយោជិតដើម្បីឱ្យពួកគាត់ទទួលបានជីវភាពធូរធារជាងពេលមុនៗ និងរង់ចាំពិភាក្សាជាមួយភាគីពាក់ព័ន្ធនានាជាច្រើនទៀត ។ លោកឧបនាយករដ្ឋមន្ត្រីបន្តថា គណៈកម្មការមិនអាចធ្វើតែម្តងចប់ទេ គឺត្រូវការលក្ខខណ្ឌឱ្យបានច្បាស់លាស់ និងមានប្រទាក់ក្រឡាគ្នាជាមួយក្រសួងពាក់ព័ន្ធជាច្រើនទៀត យើងត្រូវរកចំណុចណាមួយឱ្យបានជាក់លាក់ ។
អ្វីដែលជាក់លាក់នោះគឺប្រាក់ឈ្នួលកម្មករនិយោជិតដែលរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈប្រកាសឱ្យអនុវត្តចាប់ពីថ្ងៃទី១ កុម្ភៈ ឆ្នាំ២០១៤មក ជាសេចក្តីសម្រេចចេញពីត្រីភាគី ដែលឡើងពី៨០ដុល្លាររហូតដល់១០០ដុល្លារ គឺជាប្រាក់ឈ្នួលអប្បបរមាដោយមិនគិតពីប្រាក់អត្ថប្រយោជន៍ផ្សេងៗ ដែលកម្មករនិយោជិតទទួលបាន ។ ការដំឡើងប្រាក់ឈ្នួលនេះ ខ្ញុំបានពិសោធន៍ស្រាវជ្រាវតាមបណ្តាប្រទេសនានាដូចជា នៅប្រទេសថៃ ឡាវ ឥណ្ឌូណេសីុ ហ្វ៊ីលីពីន និងវៀតណាម ។ លោកឧបនាយករដ្ឋមន្ត្រី បានបញ្ជាក់ថា ទោះបីជារាជរដ្ឋាភិបាលបានកំណត់ប្រាក់ឈ្នួលកម្មករ វិស័យវាយនភណ្ឌកាត់ដេរ និងផលិតស្បែកជើងយា៉ងនេះក្តី ក៏នៅមានសហជីពមួយចំនួនមិនពេញចិត្តនឹងទទួលយកការដំឡើងប្រាក់ឈ្នួលនេះឡើយ បែរជានាំកម្មករធ្វើបាតុកម្មទៅវិញ ។ ទោះបីជាមានការតវា៉មួយចំនួនកើតឡើងក្រោយប្រកាសរបស់គណៈកម្មការប្រឹក្សាការងារ ដោយក្រុមសហជីព និងជនឱកាសនិយមមួយចំនួនតូចក្តី ក៏កម្មករនិយោជិតប្រមាណ៨០%បានទទួលយក និងចូលធ្វើការជាប្រក្រតី ។ ទន្ទឹមនឹងនេះ ក្រសួងបានធានាការងារជូនកម្មករនិយោជិត តាមរយៈការចុះធ្វើអធិការកិច្ចការងារ ការដោះស្រាយវិវាទការងារបាតុកម្មជាប្រចាំ ព្រមទាំងដាក់ឱ្យអនុវត្តនូវរបបធានារ៉ាប់រងហានិភ័យការងារ ដោយបេឡាជាតិរបបសន្តិសុខសង្គម សម្រាប់ជនទាំងឡាយដែលស្ថិតនៅក្រោមបទប្បញ្ញត្តិនៃច្បាប់ការងារ ។
លោកឧបនាយករដ្ឋមន្ត្រី គាត ឈន់ លើកឡើងទៀតថា ទោះបីជាមានលទ្ធផលយ៉ាងណាក្តី ក៏កម្ពុជានៅបន្តជួបនឹងបញ្ហាប្រឈមមួយចំនួន ពិសេស៖ ទី១-ភាពមិនទាន់ឆ្លើយឆ្លងគ្នារវាងសមាសភាពសំខាន់ៗនៃទីផ្សារការងារមានជាអាទិ៍ ៖ សមត្ថភាពជំនាញនិងផលិតភាពរបស់ពលករ កង្វះខាតវិស្វករ និងអ្នកបច្ចេកទេស ភាពចាំបាច់ក្នុងការធ្វើនិទស្សន៍អំពីសេចក្តីត្រូវការការងារ ទាំងតាមប្រភេទ ទាំងតាមជំនាញ គុណភាព និងភាពឆ្លើយតបនៃការបណ្តុះបណ្តាលទាំងកម្រិតឧត្តមសិក្សា ទាំងកម្រិតបណ្តុះបណ្តាលបច្ចេកទេស និងវិជ្ជាជីវៈ ចល័តនៃកម្លាំងពលកម្ម ការការពារសិទ្ធិ និងលក្ខខណ្ឌការងាររបស់ពលករទាំងក្នុងប្រទេស និងក្រៅប្រទេស ។ ទី២-កម្ពុជាស្ថិតក្នុងបរិការណ៍សមាគមសេដ្ឋកិច្ចអាស៊ាននៅឆ្នាំ២០១៥ ដែលការបង្កើតមូលដ្ឋានផលិតកម្ម និងទីផ្សារតែមួយ ទន្ទឹមនឹងលំហូរដោយសេរីនៃកម្លាំងពលកម្មជំនាញក្នុងអាស៊ាន ក្លាយជាការប្រឈមផង និងជាកាលានុវត្តភាពផងដែលយើងត្រូវត្រៀមខ្លួនសម្រាប់ឱ្យប្រសើរ។
ទី៣-ដើម្បីប្រែក្លាយពីចំណាត់ថ្នាក់ប្រទេសមានចំណូលមធ្យមកម្រិតទាបទៅប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ស្របតាមគោលដៅយុទ្ធសាស្ត្រចតុកោណដំណាក់កាលទី៣ រាជរដ្ឋាភិបាលនឹងដាក់ចេញនូវគោលនយោបាយអភិវឌ្ឍន៍វិស័យឧស្សាហកម្ម ដែលទាមទារនូវការបង្កើតសមត្ថភាពការងារ ជាពិសេសខាងជំនាញបច្ចេកទេស ។ ថ្លែងក្នុងសន្និបាតនោះ លោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា នៅឆ្នាំ២០១៣និងឆ្នាំ២០១៤សេដ្ឋកិច្ចកម្ពុជាត្រូវបានព្យាករណ៍ថា នឹងរក្សាបាននូវកំណើន៧%ដែលសមាសធាតុនៃកំណើននេះបានមកពីកំណើននៃវិស័យកសិកម្ម៤,២% កំណើននៃវិស័យឧស្សាហកម្ម៩,៣% និងកំណើននៃវិស័យសេវាកម្ម៨,៨% ។ កំណើនបានធ្វើអត្រានៃភាពក្រីក្របានកាត់បន្ថយយ៉ាងឆាប់រហ័ស ។ លោក អុិត សំហេង បន្តថា ក្នុងដំណើរការនៃការអភិវឌ្ឍប្រទេសជាតិ រាជរដ្ឋាភិបាលបានកំណត់វិស័យការងារ និងបណ្តុះបណ្តាលវិជ្ជាជីវៈ ជាអាទិភាពក្នុងកម្មវិធីនយោបាយរបស់ខ្លួន ហើយដែលមានចែងនៅក្នុងមុំនានានៃយុទ្ធសាស្ត្រចតុកោណដំណាក់កាលទី៣ ។ ជាមួយនេះ ក៏កំពុងដើរតួនាទីជាគន្លឹះក្នុងការបង្កើតឱកាសការងារជូនយុវជន និងប្រជាពលរដ្ឋ រួមចំណែកយ៉ាងសំខាន់ដល់ការកាត់បន្ថយភាពក្រីក្រដោយផ្ទាល់តាមរយៈការបង្កើត និងបង្កើនឱកាសការងារច្រើន ដើម្បីបង្កើនប្រាក់ចំណូលសម្រាប់ប្រជាពលរដ្ឋ ។
លោករដ្ឋមន្ត្រីបញ្ជាក់ថា ដើម្បីសម្រេចបាននូវការអភិវឌ្ឍធនធានមនុស្សប្រកបដោយសមធម៌ ទាំងបរិមាណ និងគុណភាព ដែលឆ្លើយតបបានតាមតម្រូវការអភិវឌ្ឍសេដ្ឋកិច្ច ព្រមទាំងដំណោះស្រាយរាល់បញ្ហាប្រឈម ក៏ដូចជារួមចំណែកក្នុងការធ្វើកំណែទម្រង់ឱ្យកាន់តែសីុជម្រៅ ដូចមានចែងក្នុងកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលនីតិកាលទី៥នៃរដ្ឋសភា ក្រសួងការងារ និងបណ្តុះបណ្តាលវិជ្ជាជីវៈ បានធ្វើអាទិភាពកម្មឡើងវិញ និងកំណត់នូវអាទិភាពចំនួន៥រួមមាន៖
ទី១-ការអភិវឌ្ឍលក្ខខណ្ឌការងារ និងការធានានូវសុខដុមនីយកម្ម ទំនាក់ទំនងវិជ្ជាជីវៈ ។
ទី២-ការអភិវឌ្ឍការអប់រំបណ្តុះបណ្តាលបច្ចេកទេស និងវិជ្ជាជីវៈ ។
ទី៣-ការអភិវឌ្ឍមុខរបរ និងការងារ ។
ទី៤-ការអភិវឌ្ឍរបបសន្តិសុខសង្គម សម្រាប់ជនទាំងឡាយណាដែលស្ថិតក្រោមបទប្បញ្ញត្តិនៃច្បាប់ការងារ ។
ទី៥-ការពង្រឹងអភិបាលកិច្ចល្អ ៕
ចែករំលែកព័តមាននេះ