រាជធានីភ្នំពេញ ៖ សហព័ន្ធសហជីពកម្មករ និងព្រះសង្ឃរួមគ្នាមានប្រមាណជា២០០នាក់ បាននាំគ្នាដើរ ដង្ហែក្បួនមកមុខព្រះអង្គដងកើ ដើម្បីអុជធូបបួងសួង និងបង្ហោះប៉េងប៉ោង ដើម្បីស្វែងរកការអន្តរាគមន៍ឱ្យមានការដោះលែងមនុស្ស២១នាក់ដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ចាម
រាជធានីភ្នំពេញ ៖ សហព័ន្ធសហជីពកម្មករ និងព្រះសង្ឃរួមគ្នាមានប្រមាណជា២០០នាក់ បាននាំគ្នាដើរ ដង្ហែក្បួនមកមុខព្រះអង្គដងកើ ដើម្បីអុជធូបបួងសួង និងបង្ហោះប៉េងប៉ោង ដើម្បីស្វែងរកការអន្តរាគមន៍ឱ្យមានការដោះលែងមនុស្ស២១នាក់ដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ចាម ព្រមទាំងទាមទារដំឡើងប្រាក់ខែកម្មករ១៦០ដុល្លារ កាលពីវេលាម៉ោង១១និង៤៥នាទីព្រឹក ថ្ងៃទី១០ កុម្ភៈ ក្រោយពីពួកគេបើកកិច្ចប្រជុំពិភាក្សាគ្នានៅសណ្ឋាគារអុីមភើរៀល រួចមក ។
លោក រ៉ុង ឈុន ប្រធានសមាគមគ្រូបង្រៀនឯករាជ្យ បានប្រាប់អ្នកសារព័ត៌មានថា គោលបំណងនៃការដើរដង្ហែក្បួននាព្រឹកថ្ងៃចន្ទនេះ គឺដើម្បីដាក់ញត្តិស្វែងរកអន្តរាគមន៍ឱ្យមានការដោះលែងជនទាំង២១នាក់ ក្នុងនោះមានដូចជារដ្ឋសភាជាតិ ទីស្តីការគណៈរដ្ឋមន្ត្រី ស្ថានទូតអាមេរិក ចិន និងសហគមន៍អឺរ៉ុប ប៉ុន្តែពួកគេបំបែកជាក្រុមតូចៗ មិនឱ្យមានការកកស្ទះចរាចរណ៍នោះទេ ។ ពួកគេបានធ្វើពិធីសូត្រធម៌បួងសួងនៅមុខព្រះអង្គដងកើរយៈពេលជិតកន្លះម៉ោង រួចបង្ហោះប៉េងប៉ោងទាមទារសុំឱ្យដោះលែងអ្នកដែលត្រូវអាជ្ញាធរចាប់ខ្លួន២១នាក់ដោយគ្មានលក្ខខណ្ឌ ។ ក្នុងញត្តិដែលត្រូវបានដាក់តាមស្ថានទូតនានា រដ្ឋសភាជាតិ និងទីស្តីការគណៈរដ្ឋមន្ត្រីនោះ គឺមានសំណូមពរ៧ចំណុច ៖
១-ស្នើឱ្យខាងក្រុមហ៊ុនក៏ដូចជាខាងរដ្ឋាភិបាល ត្រូវដោះលែងអ្នកទាំង២១នាក់ឱ្យមានសេរីភាពឡើងវិញ ។
២-ស្នើឱ្យរដ្ឋាភិបាលនិងក្រុមហ៊ុនបន្តធ្វើការចរចាពិភាក្សាគ្នាឡើងវិញអំពីការទាមទារដំឡើងប្រាក់ខែ១៦០ដុល្លារក្នុងមួយខែ ។
៣-ស្នើឱ្យរដ្ឋាភិបាលនិងក្រុមហ៊ុនត្រូវរកជនល្មើសដែលបានបាញ់កម្មករឱ្យរបួសនិងស្លាប់នៅផ្លូវវ៉េងស្រេង និងការប្រើអំពើហិង្សាមុខរោងចក្រយ៉ាកជីន និងសងជំងឺចិត្តទៅតាមច្បាប់ ។
៤-ស្នើឱ្យរដ្ឋាភិបាលនិងក្រុមហ៊ុនត្រូវដកពាក្យបណ្តឹងទាំងអស់ដែលបានប្តឹងមេដឹកនាំសហជីព ឬក៏ត្រៀមប្តឹងមេដឹកនាំសហជីព ។
៥-ដកចោលនូវការដាក់បម្រាមគោចរដែលមិនអនុញ្ញាតឱ្យមានការជួបជុំគ្នានៅក្នុងរាជធានីភ្នំពេញ ឬក៏តាមទីកន្លែងផ្សេងៗ ។
៦-ស្នើឱ្យកម្មករដែលក្រុមហ៊ុនបានបញ្ឈប់ឱ្យចូលធ្វើការវិញ និង៧-ឱ្យខាងក្រុមហ៊ុនដោះស្រាយបញ្ហាដែលបានកាត់លុយកម្មករ ។
គួរបញ្ជាក់ថា កម្មករ២នាក់ ម្នាក់ឈ្មោះ ប៊ូ សារិទ្ធ ហៅទ្រី អាយុ២៩ឆ្នាំ និងម្នាក់ទៀតឈ្មោះ យោន ជា ហៅចាន់ អាយុ១៧ឆ្នាំ ក្នុងចំណោម២៣នាក់ ត្រូវបានសាលាដំបូងរាជធានីភ្នំពេញ កាលពីថ្ងៃទី៧ កុម្ភៈ ចេញដីកាបង្គាប់ឱ្យដោះលែងនៅក្រៅឃុំ ។ នៅព្រឹកថ្ងៃទី៨ កុម្ភៈ អ្នកទាំងពីរត្រូវបានខាងពន្ធនាគារដោះលែងឱ្យមានសេរីភាពឡើងវិញហើយ ។ ដោយឡែកនៅថ្ងៃចន្ទនេះដែរ អ្នកតវ៉ាមកពីបឹងកក់ សហគមន៍ថ្មគោល សហគមន៍បុរីកីឡា និងលោកសង្ឃប្រមាណជា៦០នាក់ ដឹកនាំដោយអ្នកស្រី ទេព វន្នី បាននាំគ្នាប្រមូលផ្តុំនៅមុខក្រសួងយុត្តិធម៌ និងសាលាឧទ្ធរណ៍ដោយមានកាន់បដាពាក្យស្លោកជាច្រើនដើម្បីដាក់ញត្តិទាមទារឱ្យមានការដោះលែងលោក ចាន់ ពុទ្ធិស័ក្ត ជាអ្នកការពារសិទ្ធិលំនៅឋាន ក្នុងតំបន់បឹងកក់, លោក វន់ ពៅ លោក ថេង សាវឿន ដែលជាអ្នកការពារសិទ្ធិមនុស្ស ព្រមទាំងកម្មករ១៨នាក់ទៀត ឱ្យរួចខ្លួនចេញពីពន្ធនាគារនៅថ្ងៃទី១១ កុម្ភៈ ឆ្នាំ២០១៤ ខាងមុខនេះ ដែលសាលាឧទ្ធរណ៍បើកសវនាការ ។
មន្ត្រីសាលាខណ្ឌដូនពេញបាននិយាយថា ការដើរដង្ហែក្បួនរបស់អ្នកតវ៉ាមកពីបឹងកក់ដែលដឹកនាំដោយអ្នកស្រី ទេព វន្នី មកជួបជុំមុខក្រសួងយុត្តិធម៌ និងសាលាឧទ្ធរណ៍ និងលោក រ៉ុង ឈុន លោក អាត់ ធន់ ដែលជាតំណាងសហជីព ហើយដង្ហែក្បួនមកព្រះអង្គដងកើគឺមិនមានការអនុញ្ញាតពីសាលារាជធានីភ្នំពេញនោះទេ សូម្បីតែធ្វើលិខិតជូនដំណឹងក៏ពួកគេមិនធ្វើផង តែទោះជាយា៉ងណា ពុំមានការរារាំងពីកម្លាំងសមត្ថកិច្ចក្នុងការដង្ហែក្បួននេះទេ ។ អ្នកដែលត្រូវចាប់ខ្លួនទាំង២៣នាក់(២នាក់បានដោះលែងហើយ) ដែលមានក្រុមសកម្មជនសិទ្ធិមនុស្ស សកម្មជនដីធ្លី និងកម្មករ ត្រូវបានអាជ្ញាធរមានសមត្ថកិច្ចចាប់ឃាត់ខ្លួន នៅកន្លែងផ្សេងៗពីគ្នា គឺក្រុមលោក វន់ ពៅ រួមទាំងកម្មករសរុបទាំងអស់១០នាក់ ត្រូវបានចាប់ខ្លួននៅចំណុចរោងចក្រ យ៉ាក ជីន ជិតតំបន់សេដ្ឋកិច្ចពិសេសភ្នំពេញ កាលពីរសៀលថ្ងៃទី២ មករា និង១៣នាក់ផ្សេងទៀត ត្រូវបានចាប់ខ្លួននៅចំណុចសួនឧស្សាហកម្ម កាណាឌីយ៉ា ផ្លូវវ៉េងស្រេង កាលពីថ្ងៃទី៣ មករា ឆ្នាំ២០១៤ ក្នុងអំទ្បុងពេលតវ៉ាដំទ្បើងប្រាក់ខែកម្មករកាត់ដេរ និងមានការប៉ះទង្គិចគ្នាដ៏ធ្ងន់ធ្ងរ ដែលបណ្តាលឱ្យមនុស្ស៣នាក់ស្លាប់ ខ្លះទៀតថាស្លាប់ដល់ទៅ៥នាក់ និង២៣នាក់ ត្រូវចាប់ខ្លួនបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តកំពង់ចាម ។
នៅព្រឹកថ្ងៃអង្គារនេះ សាលាឧទ្ធរណ៍នឹងបើកសវនាការលើពាក្យបណ្តឹងរបស់មេធាវីការពារក្តីឱ្យលោក វន់ ពៅ, លោក ថេង សាវឿន សកម្មជនការពារសិទ្ធិមនុស្ស លោក ចាន់ ពុទ្ធិស័ក្ត សកម្មជនការពារដីធ្លីតំបន់បឹងកក់ និងកម្មករ១៨នាក់ទៀត ដើម្បីសុំឱ្យនៅក្រៅឃុំ ៕
ចែករំលែកព័តមាននេះ