ខេត្តបាត់ដំបង ៖ បុរសម្នាក់ដែលអាជ្ញាធរនិងអ្នកភូមិចាត់ទុកថា ជាជនស្រវឹងខួប ដែលតែងបង្កហិ.ង្សាលើប្រពន្ធមិនសូវលួសពេលនោះ ពេលនេះបានចាក់សាំងដុតផ្ទះខ្លួនឯងឆេះអស់គ្មានសល់ កាលពីវេលាម៉ោង៨និង៤០នាទីយប់ថ្ងៃទី៩ កុម្ភៈ ស្ថិតក្នុងភូមិកា.ប់គោថ្មី សង្កាត់អូរចា ក្រុងបាត់ដំបង ដោយសារតែខឹងប្រពន្ធទៅប្ដឹងសមត្ថកិច្ចពីការប្រើហិ.ង្សាក្នុងគ្រួសារ ។
ខេត្តបាត់ដំបង ៖ បុរសម្នាក់ដែលអាជ្ញាធរនិងអ្នកភូមិចាត់ទុកថា ជាជនស្រវឹងខួប ដែលតែងបង្កហិង្សាលើប្រពន្ធមិនសូវលួសពេលនោះ ពេលនេះបានចាក់សាំងដុតផ្ទះខ្លួនឯងឆេះអស់គ្មានសល់ កាលពីវេលាម៉ោង៨និង៤០នាទីយប់ថ្ងៃទី៩ កុម្ភៈ ស្ថិតក្នុងភូមិកាប់គោថ្មី សង្កាត់អូរចា ក្រុងបាត់ដំបង ដោយសារតែខឹងប្រពន្ធទៅប្ដឹងសមត្ថកិច្ចពីការប្រើហិង្សាក្នុងគ្រួសារ ។
មន្ដ្រីនគរបាលសង្កាត់អូរចាឱ្យដឹងថា ជននេះឈ្មោះ ម៉ៅ សេត អាយុជាង ៣០ឆ្នាំ និងប្រពន្ធឈ្មោះ រស់ អាយុជាង ៤០ឆ្នាំ មានកូន២នាក់ក្នុងបន្ទុក ។ ជននេះគ្មានការងារអ្វីក្រៅពីដើរផឹកស៊ីទេ និងរស់ដោយសារប្រពន្ធទៅស៊ីឈ្នួលលាងចានតាមហាងឱ្យគេយកលុយមកចិញ្ចឹម ។ មន្ដ្រីដដែលបានបញ្ជាក់ថា ជននេះបានគេចខ្លួនបាត់ ក្រោយពីដុតបំផ្លាញផ្ទះ ខណៈប្រពន្ធទៅធ្វើការតាមហាងពេលយប់ ។ លំនៅឋាននេះធ្វើពីឈើប្រក់ស័ង្កសីមានទំហំ៤ម៉ែត្រគុណនឹង៥ម៉ែត្រ ហើយឆេះទាំងផ្ទះនិងទ្រព្យសម្បត្ដិគ្មានសល់អ្វីទាំងអស់ ។ លោក ញ៉ឹក នៅ ជំនួយការភូមិកាប់គោថ្មីបាននិយាយថា ឈ្មោះ ម៉ៅ សេត នេះគ្មានមុខរបរទេ គិតតែពីដើរផឹកស៊ី និងបង្កហិង្សាលើប្រពន្ធកូនស្ទើររាល់ថ្ងៃ ។ លោកបានឱ្យដឹងថា នៅថ្ងៃកើតហេតុ ជននេះបង្កហិង្សាលើប្រពន្ធទាំងព្រឹក រហូតប្រពន្ធទ្រាំលែងបាន ក៏ទៅប្ដឹងសមត្ថកិច្ចឱ្យមកជួយអន្ដរាគមន៍ ។ ជំនួយការភូមិដែលមានវ័យ៧៥ឆ្នាំរូបនេះបានបន្ថែមថា បន្ទាប់ពីដឹងថា ប្រពន្ធទៅប្ដឹងសមត្ថកិច្ច ជននេះបានរត់គេចខ្លួនបាត់ លុះពេលយប់ស្ងាត់គ្រាដែលប្រពន្ធកំពុងនៅស៊ីឈ្នួលលាងចានឱ្យគេតាមហាង ស្រាប់តែជននេះចូលមកដុតផ្ទះឆេះអស់គ្មានសល់ រួចគេចខ្លួនបាត់ទៀត ។
អ្នកភូមិក៏បាននិយាយដែរថា មុនពេលកើតហេតុ គេឃើញឈ្មោះ ម៉ៅ សេត បង្ហាញមុខក្នុងភូមិមួយភ្លែតដែរ បន្ទាប់ពីបាត់មុខពេញមួយថ្ងៃ លុះប៉ុន្មាននាទីក្រោយមក ស្រាប់តែមានអគ្គិភ័យកើតឡើងតែម្ដង ។ អ្នកភូមិបញ្ជាក់ថា គេសង្ស័យជនអគតិនេះយកសាំងចាក់ស្រោចលើផ្ទះខ្លួនឯងរួចដុត ទើបបានជាអគ្គិភ័យឆេះលឿនបែបនេះ បើទោះជាផ្ទះនោះតូចមែន តែធ្វើពីឈើ និងស័ង្កសីមិនគួរឆេះលឿនដល់ម្លឹងទេ សឹងតែមិនបាន១០នាទីផងឆេះហ្មត់គ្មានសល់ ។ មន្ដ្រីនិងអាជ្ញាធរមូលដ្ឋានក៏បានបញ្ជាក់ថា អ្នកភូមិមិនអាចជួយពន្លត់ភ្លើង ឬជួយយកទ្រព្យសម្បត្ដិក្នុងផ្ទះបានទេ ដោយសារអណ្ដាតភ្លើងឆាបឆេះខ្លាំងពេក ។ ប៉ុន្ដែសំណាងល្អ មិនរាលដាលដល់លំនៅឋានអ្នកដទៃ រីឯរថយន្ដពន្លត់អគ្គិភ័យរបស់ស្នងការដ្ឋាននគរបាលខេត្ដចំនួន៣គ្រឿង ក៏បានចេញអន្ដរាគមន៍ដែរ បើទោះជាលំនៅឋាននេះត្រូវព្រះអគ្គីលេបត្របាក់ស្ទើរទាំងស្រុងទៅហើយក្ដី ។
ជាមួយគ្នានេះ សមត្ថកិច្ចមូលដ្ឋានបានបញ្ជាក់ថា កំពុងស្វែងរកចាប់ខ្លួនបុរសប្រមឹកដុតផ្ទះខ្លួនឯងនេះហើយ ដើម្បីចាត់ការតាមច្បាប់ ព្រោះស្រ្ដីជាប្រពន្ធបានដាក់ពាក្យបណ្ដឹងលើលោកប្ដីប្រមឹកនេះរួចហើយ ៕
ចែករំលែកព័តមាននេះ