រាជធានីភ្នំពេញ ៖ ជនសង្ស័យដែលបានធ្វើសកម្មភាពភ្ជង់ប្លន់យកម៉ូតូម៉ាក FZ របស់អតីតតារាចម្រៀងផលិតកម្មរ៉ុក និងជាអ្នកចម្រៀងប្រចាំសណ្ឋាគារណាហ្គាវើល ហើយបាញ់បុរសម្នាក់ដែលបានស្រែកចោរៗបណ្តាលឱ្យស្លាប់ក្នុងសង្កាត់បឹងសាឡាង ខណ្ឌទួលគោក កាលពីអំឡុងដើមខែធ្នូ ២០១៣ ត្រូវបានកម្លាំងនគរបាលព្រហ្មទណ្ឌកម្រិតធ្ងន់ស្រាវជ្រាវចាប់ខ្លួនបានម្នាក់តាមដីការបស់សាលាដំបូងរាជធានីភ្នំពេញ។
នៅព្រឹកថ្ងៃទី១០ កុម្ភៈ ២០១៤ ជនសង្ស័យត្រូវបានលោកវរសេនីយ៍ទោអេង សោភា ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញបង្ហាញមុខជាសាធារណៈ។
ជនសង្ស័យដែលត្រូវចាប់ខ្លួនឈ្មោះឱ រុំ ភេទប្រុស អាយុ៣៤ឆ្នាំ មានទីលំនៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិក្រគរ ខេត្តពោធិ៍សាត់។
លោកវរសេនីយ៍ទោ អេង សោភា ប្រធានការិយាល័យព្រហ្មទណ្ឌកម្រិតធ្ងន់បានឱ្យដឹងថា ជនសង្ស័យត្រូវកម្លាំងសមត្ថកិច្ចរបស់លោកស្រាវជ្រាវ និងសហការជាមួយសមត្ថកិច្ចខេត្តព្រះសីហនុចាប់ខ្លួនបានកាលពីថ្ងៃទី៨ កុម្ភៈ ២០១៤ នៅក្នុងភូមិស្ទឹងច្រាល ឃុំអូបាក់រទេះ ស្រុកកំពង់សិលា ខេត្តព្រះសីហនុ ទៅតាមដីកាបង្គាប់ឱ្យនាំខ្លួនលេខ៦៦តព្រ ចុះថ្ងៃទី៧ កុម្ភៈ ២០១៤ របស់លោកចៅក្រមសែម សក្តិកូឡា។
លោកវរសេនីយ៍ទោ អេង សោភា បានឱ្យដឹងទៀតថា ជនសង្ស័យជាមុខសញ្ញាចោរប្លន់យ៉ាងសកម្មដែលបានរត់គេចខ្លួន បន្ទាប់ពីសមត្ថកិច្ចចាប់បានបក្សពួក២នាក់ ខណៈដែលពួកគេធ្វើសកម្មភាពប្លន់ម៉ូតូម៉ាកស្គូពីនៅចំណុចផ្លូវលេខ១៣៨ សង្កាត់ផ្សារដេប៉ូទី២ ខណ្ឌទួលគោកកាលពីថ្ងៃទី២៦ វិច្ឆិកា ២០១៣៕
ចែករំលែកព័តមាននេះ