រាជធានីភ្នំពេញ ៖ មានហេតុការណ៍ភ្ញាក់ផ្អើលមួយបានកើតឡើងនៅចំណុចមុខភោជនីយដ្ឋានសាន់រ៉ាយ ក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង១០និង៣០នាទីយប់ថ្ងៃទី០៩ កុម្ភៈ ២០១៤ បន្ទាប់ពីបុរសម្នាក់អះអាងថា ខ្លួនបាត់រថយន្តម៉ាកឡិចស៊ីស RX300 មួយគ្រឿង ពណ៌ស្ករ ពាក់ស្លាកលេខភ្នំពេញ 2M-5270 ជាង០២ឆ្នាំមកហើយ
រាជធានីភ្នំពេញ ៖ មានហេតុការណ៍ភ្ញាក់ផ្អើលមួយបានកើតឡើងនៅចំណុចមុខភោជនីយដ្ឋានសាន់រ៉ាយ ក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង១០និង៣០នាទីយប់ថ្ងៃទី០៩ កុម្ភៈ ២០១៤ បន្ទាប់ពីបុរសម្នាក់អះអាងថា ខ្លួនបាត់រថយន្តម៉ាកឡិចស៊ីស RX300 មួយគ្រឿង ពណ៌ស្ករ ពាក់ស្លាកលេខភ្នំពេញ 2M-5270 ជាង០២ឆ្នាំមកហើយ ហើយទើបតែប្រទះឃើញនៅមុខភោជនីយដ្ឋានខាងលើ ខណៈដែលរថយន្តរបស់ខ្លួនត្រូវបានអ្នកផ្សេងជិះយកមកឈប់ចតមុខភោជនីយដ្ឋានហើយចូលទៅបរិភោគអាហារ ។
តាមប្រភពព័ត៌មានបានឱ្យដឹងថា ទាក់ទិននឹងករណីនេះ មិនទាន់មានមន្ត្រីនគរបាល ឫសមត្ថកិច្ចជំនាញណាម្នាក់បញ្ជាក់ថា ម្ចាស់រថយន្តជាដើមបណ្តឹងមានឈ្មោះអ្វីឡើយ ហើយភាគីជាចុងបណ្តឹងពាក់ព័ន្ធជាមួយរថយន្តខាងលើនេះ ក៏មិនទាន់ដឹងថា មានឈ្មោះអ្វីនោះនៅឡើយដែរ ។
ប្រភពបន្តថា ម្ចាស់រថយន្តឡិចស៊ីសRX300 បានរៀបរាប់ថា ខ្លួនបានជួលរថយន្តរបស់ខ្លួនឱ្យទៅក្រុមហ៊ុនទេសចរណ៍មួយជាង០២ឆ្នាំមកហើយ ហើយក៏បាត់ដំណឹងរហូត ។ ពេលនោះខ្លួនបានស្វែងរកគ្រប់ច្រកល្ហក តែរកមិនឃើញឡើយ ស្រាប់តែនៅថ្ងៃកើតហេតុ ក៏ប្រទះឃើញរថយន្តរបស់ខ្លួនចតនៅខាងមុខភោជនីយដ្ឋានសាន់រ៉ាយ ហើយបានប្តឹងសមត្ថកិច្ចចុះឃាត់ និងដកហូតរថយន្តនេះ នាំទៅស្នងការដ្ឋាននគរបាលរាជធានីភ្នំពេញ ដើម្បីចាត់ការតាមផ្លូវច្បាប់ ។
គូររំលឹកថា ពាក់ព័ន្ធនឹងរឿងបញ្ចាំរថយន្តខាងលើនេះ កន្លងមកមានក្រុមហ៊ុនទេសចរណ៍មួយឈ្មោះ ធី អឹម ធី គ្រុប ដែលមានតំណាងពីរនាក់ប្តីប្រពន្ធ បានដើរជួលរថយន្តគ្រប់ច្រកល្ហកក្នុងរាជធានីភ្នំពេញ ដែលមានចំនួនរាប់រយគ្រឿងយកទៅបញ្ចាំនិងលក់ ហើយត្រូវបានសមត្ថកិច្ចស្នងការដ្ឋាននគរបាលរាជធានី ចុះបង្ក្រាបនិងដកហូតរថយន្តបានជាបន្តបន្ទាប់ និងរហូតមកដល់ពេលនេះ នៅមានរថយន្តខ្លះមិនទាន់ឃើញម្ចាស់ទៅដោះស្រាយនៅឡើយ ៕
ចែករំលែកព័តមាននេះ