ខេត្តកំពង់ចាម ៖ មន្ត្រីធនាគារជាតិសាខាខេត្តកំពង់ចាមម្នាក់ បានរងរបួសឆេះរលាកពេញខ្លួនប្រាណ ហើយស្លា.ប់ពេលបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ បន្ទាប់ពីត្រូវមិត្តភក្តិចាក់សាំងដុតទាំងរស់ប្លន់យកខ្សែ.កមាស០១ខ្សែ រួចគេចខ្លួនបាត់ ។
ខេត្តកំពង់ចាម ៖ មន្ត្រីធនាគារជាតិសាខាខេត្តកំពង់ចាមម្នាក់ បានរងរបួសឆេះរលាកពេញខ្លួនប្រាណ ហើយស្លាប់ពេលបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ បន្ទាប់ពីត្រូវមិត្តភក្តិចាក់សាំងដុតទាំងរស់ប្លន់យកខ្សែ.កមាស០១ខ្សែ រួចគេចខ្លួនបាត់ ។
ហេតុការណ៍នេះ បង្កឱ្យមានការភ្ញាក់ផ្អើល កាលពីវេលាម៉ោង១១និង៣០នាទីយប់ថ្ងៃទី០៩ កុម្ភៈ ២០១៤ នៅចំណុចផ្ទះជួល ស្ថិតក្នុងភូមិទី៦ សង្កាត់វាលវង់ ក្រុងកំពង់ចាម ។
ជនរងគ្រោះត្រូវបានគេស្គាល់ឈ្មោះ ធុច សាថាត ភេទប្រុស អាយុ៤៩ឆ្នាំ ជាមន្ត្រីធនាគារជាតិសាខាខេត្តកំពង់ចាម និងជាបុរសពោះម៉ាយកូន២ ស្នាក់នៅផ្ទះជួលកើតហេតុ ។
បើតាមសម្តីម្ចាស់ផ្ទះជួលឈ្មោះ កើត គឹមស្រ៊ី ភេទប្រុស អាយុ៥២ឆ្នាំ បានឱ្យដឹងថា បុរសរងគ្រោះបានមកជួលផ្ទះរបស់គាត់ស្នាក់នៅរយៈពេល០៥ថ្ងៃមកហើយ ។ មុនពេលកើតហេតុ ជនរងគ្រោះត្រូវមិត្តភក្តិទូរស័ព្ទហៅទៅផឹកស៊ីនៅខាងក្រៅ លុះត្រឡប់មកវិញមិត្តភក្តិនោះក៏មកជាមួយជនរងគ្រោះដែរ ។
ប្រភពបន្តថា មួយសន្ទុះក្រោយមក មិនដឹងជាមានរឿងអ្វីនោះទេ ស្រាប់តែឃើញអណ្តាតភ្លើងឆេះចេញពីបន្ទប់ជនរងគ្រោះ ហើយមិត្តភក្តិដែលមកជាមួយនោះ ក៏រត់ចេញមកខាងក្រៅគេចខ្លួនយ៉ាងតក់ក្រហល់ ដោយមានធុំក្លិនសាំងផង ។ ភ្លាមៗគាត់(ម្ចាស់ផ្ទះ)បានដើរទៅមើល ក៏ឃើញជនរងគ្រោះត្រូវភ្លើងឆេះរលាកពេញខ្លួនប្រាណ និងបានយកបំពង់ពន្លត់អគ្គិភ័យបាញ់ពន្លត់ក្នុងបន្ទប់ រួចបញ្ជូនជនរងគ្រោះទៅមន្ទីរពេទ្យខេត្ត តែស្ថានភាពធ្ងន់ធ្ងរពេក ក៏បញ្ជូនបន្តទៅរាជធានីភ្នំពេញ តែមិនទាន់ទៅដល់ផងជនរងគ្រោះក៏ស្លាប់តាមផ្លូវ។ ប្រភពឱ្យដឹងទៀតថា ជនរងគ្រោះមានពាក់ខ្សែ.កមាស០១ខ្សែ (ប៉ុនកូនដៃ) ប៉ុន្តែនៅក្រោយពេលកើតហេតុ បាត់មិនឃើញខ្សែ.កនោះទេ ។
បច្ចុប្បន្ន សពជនរងគ្រោះត្រូវក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ស្រុកព្រៃឈរ ហើយសមត្ថកិច្ចកំពុងស្រាវជ្រាវតាមវែកមុខជនដៃដល់ យកមកផ្តន្ទាទោសតាមច្បាប់ ៕
ចែករំលែកព័តមាននេះ