ខេត្តកណ្តាល ៖ បុរសម្នាក់ដែលគេស្គាល់ថា ជាកូនលោកឧត្តមសេនីយ៍នគរបាលមួយរូប ក្នុងអាការស្រវឹងជោក បានបើករថយន្តជ្រុលទៅបុកម៉ូតូមួយគ្រឿងបណ្តាលឱ្យស្ត្រី២នាក់ ជានិស្សិតពេទ្យរបួសស្រាល តែមិនព្រមឈប់រថយន្តនៅកន្លែងកើតហេតុទេ លុះពេលមន្ត្រីនគរបាលប៉ុស្តិ៍ស្ទាក់ឃាត់ឱ្យឈប់ បែរជាបង្កការឈ្លោះប្រកែកយ៉ាងចាស់ដៃ ព្រមទាំងក្របួចកអាវមន្ត្រីនគរបាលថែមទៀត ហើយសូម្បីតែឈ្មោះក៏មិនព្រមប្រាប់នគរបាលដែរ ។
ហេតុការណ៍នេះ បានកើតទ្បើងកាលពីវេលាម៉ោង៥ល្ងាច ថ្ងៃទី៨ កុម្ភៈ នៅមុខវត្តកណ្តាល ស្ថិតក្នុងឃុំទឹកវិល ស្រុកស្អាង លើផ្លូវជាតិលេខ២១B ។ មន្ត្រីនគរបាលប៉ុស្តិ៍បានឱ្យដឹងថា នារី២នាក់ដែលរងរបួសក្នុងហេតុការណ៍គ្រោះថ្នាក់ចរាចរណ៍នេះ ម្នាក់ឈ្មោះ ឃួន ឈូករ័ត្ន អាយុ២១ឆ្នាំ និងម្នាក់ទៀតឈ្មោះ ចាន់ សុភ័ក្ត្រ អាយុ២០ឆ្នាំ ជានិស្សិតពេទ្យ បច្ចុប្បន្នស្នាក់នៅរាជធានីភ្នំពេញ និងមានស្រុកកំណើតនៅខេត្តបន្ទាយមានជ័យ ។ ប្រភពព័ត៌មាននៅកន្លែងកើតហេតុបានឱ្យដឹងថា នារីទាំង២នាក់ខាងលើ ជិះម៉ូតូឌុបគ្នាតាមផ្លូវលេខ២១B ពីជើងទៅត្បូង ពេលនោះមានរថយន្តម៉ាកហាយទ្បែនឌ័រមួយគ្រឿង ពាក់ស្លាកលេខភ្នំពេញ ២Y-៥៥៤៥ ដែលគេដឹងថា បើកបរដោយកូនប្រុសលោកផ្កាយមួយនគរបាលមួយរូប ដែលបើកពីត្បូងទៅជើង បានជ្រុលទៅបុកម៉ូតូបណ្តាលឱ្យដួល ។ ពេលបុកហើយ រថយន្តមិនឈប់នៅកន្លែងកើតហេតុទេ គឺបានព្យាយាមបើកយឺតៗទៅមុខ ពេលនោះមន្ត្រីនគរបាលប៉ុស្តិ៍ទឹកវិល ដែលនៅជិតនោះក៏បានទៅឃាត់រថយន្តនោះ ។
ប្រភពព័ត៌មានបន្តទៀតថា ពេលនោះអ្នកបើកបរបានចេញពីក្នុងរថយន្តមក ក្នុងសភាពស្រវឹងជោក ហើយបានឈ្លោះប្រកែកជាមួយមន្ត្រីនគរបាល ដែលទៅឃាត់រថយន្តនោះ និងបានដៀលត្មះមន្ត្រីនគរបាលប៉ុស្តិ៍យ៉ាងចាស់ដៃ ព្រមទាំងក្របួចកអាវមន្ត្រីនគរបាលប៉ុស្តិ៍ម្នាក់ឈ្មោះ សារិទ្ធ ម៉ាទ្បៃសក្តិ ថែមទៀត ។ ទោះជាយ៉ាងណាក៏ដោយ មន្ត្រីនគរបាលបានព្យាយាមហៅអ្នកបើកបររថយន្តមកដោះស្រាយគ្នានៅប៉ុស្តិ៍ ។ ពេលមកដល់ប៉ុស្តិ៍ហើយ គេនៅតែបញ្ចេញចរិតនិយាយមើលងាយមន្ត្រីនគរបាល ដោយអាងឪពុករបស់ខ្លួនជាឧត្តមសេនីយ៍ត្រីមួយរូប នៅអគ្គស្នងការដ្ឋាននគរបាលជាតិ ។ ដោយសារតែចរិតក្រអឺតក្រទម និងមានសភាពស្រវឹងជោកនិយាយស្តាប់គ្នាមិនបាន មន្ត្រីនគរបាលប៉ុស្តិ៍ក៏បានបញ្ជូនទៅដោះស្រាយនៅអធិការដ្ឋាននគរបាលស្រុកស្អាង ។ មន្ត្រីនគរបាលស្រុកស្អាងបានឱ្យដឹងថា អ្នកបើកបររថយន្តនោះ មិនបានប្រាប់ឈ្មោះរបស់ខ្លួនទ្បើយ គឺព្យាយាមលាក់អត្តសញ្ញាណ ហើយពេលនគរបាលធ្វើការវាស់ជាតិអាល់កុលឃើញមានកម្រិត៤០មីល្លីក្រាម ក្នុង១លីត្រខ្យល់ ដែលបើតាមផ្លូវច្បាប់អាចឃុំខ្លួនបាន ។ ប៉ុន្តែដោយសារតែមានការអន្តគមន៍ពីឪពុកបុរសនោះ នគរបាលបានធ្វើការដោះស្រាយសម្របសម្រួលជាមួយនារីរងគ្រោះទាំង២នាក់ គឺបញ្ចប់ដោយអ្នកបើករថយន្តនោះ សងទៅនារីរងគ្រោះចំនួន២០០ដុល្លារ ។
មន្ត្រីនគរបាលបានឱ្យដឹងទៀតថា ក្រោយពីដោះស្រាយចប់ ឪពុកក្នុងនាមជាឧត្តមសេនីយ៍ត្រី បានសុំទោសដល់មន្ត្រីនគរបាល ដែលត្រូវកូនទំនើងជេរប្រមាថ និងមើលងាយ ។ មន្ត្រីនគរបាលនិយាយថា កុំតែមានការអន្តគមន៍ពីឪពុកទាន់ កុំអីអ្នកបើកបររថយន្តនោះ ប្រាកដជាត្រូវឃុំខ្លួនពីបទបើកបរក្នុងស្ថានភាពស្រវឹង ដែលកម្រិតជាតិអាល់កុលតាមផ្លូវច្បាប់ គឺត្រូវតែឃុំខ្លួន និងបញ្ជូនទៅតុលាការកាត់ទោសតាមផ្លូវច្បាប់ ៕
ចែករំលែកព័តមាននេះ