ក្រុងប៉ោយប៉ែត ៖ ស្ត្រីវ័យ២៣ឆ្នាំ ឈ្មោះឈួន សុផា ជាពលការិនីបម្រើការងារតាមផ្ទះនៅប្រទេសម៉ាឡេសីុហើយត្រូវថៅកែជនជាតិម៉ាឡេសីុធ្វើបាបនិងចាប់បង្ខាំងមិនឱ្យវិលត្រឡប់មកស្រុកកំណើតវិញនោះ ត្រូវបានសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យធ្វើអន្តរាគមន៍រំដោះចេញពីក្រញាំដៃថៅកែម៉ាឡេសីុនោះ និងបានត្រឡប់មកដល់មាតុប្រទេសវិញដោយសុវត្ថិភាពហើយ ។
កញ្ញាឈួន សុផា បានរៀបរាប់ថា នាងបានចេញទៅធ្វើការនៅប្រទេសម៉ាឡេសីុតាំងតែពីនាងមានវ័យ១៨ឆ្នាំម្លេ៉ះ ។ ពោលគឺនៅក្នុងអំឡុងឆ្នាំ២០០៨ តាមរយៈក្រុមហ៊ុនPNP ដែលមានទីស្នាក់ការនៅរាជធានីភ្នំពេញដោយប្រាប់ថា ទទួលបានប្រាក់ឈ្នួលក្នុងមួយខែ១៨០ដុល្លារសហរដ្ឋអាមេរិក ។ នាងរៀបរាប់ថា នៅពេលទៅដល់ប្រទេសម៉ាឡេសីុ នាងត្រូវបានភាគីក្រុមហ៊ុនកាត់ប្រាក់ខែអស់រយៈពេល៦ខែ ។ ជីវិតជាស្ត្រីបម្រើការងារតាមផ្ទះនៅក្នុងប្រទេសម៉ាឡេសីុនាងត្រូវបង្ខំចិត្តធ្វើការចាប់ពីព្រលឹមដល់យប់ទើបបានសម្រាក គឺចាប់ពីម៉ោង៦ព្រឹករហូតដល់ម៉ោង៨យប់ ដូចជា ជូតសម្អាតផ្ទះ ដាំស្ល លាងម៉ូតូរថយន្ត បោកសម្លៀកបំពាក់ និងមើលថែ សត្វឆ្កែ ចំនួន៥ក្បាលទៀត ។ ល។
កញ្ញាឈួន សុផា បន្តថា ថៅកែរបស់នាងឈ្មោះកាន់ មិចឆែល ជាជនជាតិម៉ាឡេសីុតែងតែធ្វើទុក្ខបុកម្នេញរូបនាងគ្រប់ពេល នៅពេលណាដែលថៅកែរូបនោះមានបញ្ហានៅកន្លែងធ្វើការ ហើយត្រឡប់មកផ្ទះវិញគឺយកកំហឹងទាំងនោះមកជះដាក់លើរូបនាងជានិច្ច ។ នាងរៀបរាប់បន្តទៀតថា ក្រោយពេលធ្វើការចប់អាណត្តិគឺនៅថ្ងៃទី២ មករា នាងត្រូវវិលត្រឡប់មកស្រុកកំណើតវិញ ប៉ុន្តែថៅកែមិនអនុញ្ញាតឱ្យនាងវិលមកវិញទេ គឺគេរកលេសនេះលេសនោះគ្រប់បែបយ៉ាងមិនចេះចប់ ព្រមទាំងរើសអើង និងគំរាមរូបនាងទៀតផង ដោយមិនព្រមទិញសំបុត្រយន្តហោះឱ្យឡើយ ។ ដោយស៊ូទ្រាំនឹងការបង្ខាំងគ្មានសេរីភាព ព្រមទាំងការលំបាកគ្រប់បែបយ៉ាងនោះ នាងក៏លួចទាក់ទងតាមទូរស័ព្ទប្រាប់ដំណឹងនេះដល់ម្ដាយនៅស្រុកខ្មែរឱ្យជួយទាក់ទងប្ដឹងសមត្ថកិច្ចដើម្បីរំដោះរូបនាងឱ្យបានវិលត្រឡប់មកស្រុកវិញផង ។ អ្នកស្រីញឹក សុភា អាយុ៦០ឆ្នាំ ជាម្ដាយនារីរងគ្រោះបានរៀបរាប់ថា ក្រោយពីទទួលដំណឹងពីកូនស្រីភ្លាម គាត់មានចិត្តតក់ស្លុតឥតឧបមា ខណៈ ដែលកូនស្រីចាកចេញពីស្រុកតាំងតែពីវ័យ១៨ឆ្នាំម្លេ៉ះ ដោយមិនដឹងថា ស្លាប់ឬរស់ ។លុះពេលដឹងដំណឹងស្រាប់តែឮថាត្រូវគេបង្ខាំងមិនឱ្យមកស្រុកវិញគាត់ក៏បានទៅដាក់ពាក្យបណ្ដឹងនៅសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យ នៅថ្ងៃទី១០ មករា ឆ្នាំ២០១៤ ហើយនៅថ្ងៃទី២០ មករា នាងក៏បានត្រឡប់មកដល់ស្រុកវិញ ។
លោក ស៊ុំ ចាន់គា អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យ បានឱ្យដឹងនៅរសៀលថ្ងៃទី៧ កុម្ភៈ ថា បន្ទាប់ពីទទួលពាក្យបណ្ដឹងពីម្ដាយនារីរងគ្រោះភ្លាម អង្គការអាដហុកបានស្វះស្វែងរកការអន្តរាគមន៍ភ្លាមៗដោយទាក់ទងទៅខាងភាគីក្រុមហ៊ុនPNP នៅរាជធានីភ្នំពេញ ប៉ុន្តែខាងក្រុមហ៊ុនគ្មានចំណាត់ការនិងសហការជាមួយឡើយ ។ លោក ស៊ុំ ចាន់គា បន្តទៀតថា សមាគមអាដហុកបានទាក់ទងដៃគូនៅក្រៅប្រទេសព្រមទាំងថៅកែជនជាតិម៉ាឡេសីុដែលជាប់ពាក់ព័ន្ធនិងជនរងគ្រោះរហូតទាល់តែបានសម្រេចដោយរំដោះស្ត្រីរងគ្រោះចេញពីរណ្ដៅដ៏ខ្មៅងងឹត ហើយបានវិលត្រឡប់មកស្រុកកំណើតវិញប្រកបដោយសុវត្ថិភាព ។ នារីរងគ្រោះបានថ្លែងអំណរគុណយ៉ាងខ្លាំងចំពោះអង្គការអាដហុក ដែលខំប្រឹងប្រែងជួយរំដោះនាងបានវិលត្រឡប់មកដល់មាតុភូមិជួបជុំសាច់ញាតិបងប្អូនវិញ ។ នាងនិយាយថា ដូចបានកើតសាជាថ្មីអីុចឹង ហើយក្នុងក្ដីរីករាយបែបនេះនាងមិនបានដាក់ពាក្យប្ដឹងខាងក្រុមហ៊ុនឬថៅកែជនជាតិម៉ាឡេសីុឡើយ ។
ជាចុងក្រោយ នាងក៏បានផ្ដាំផ្ញើដល់បងប្អូនប្រុស ស្រីគ្រប់រូបមុននឹងចាកចេញពីប្រទេសទៅធ្វើការងារនៅស្រុកក្រៅ ត្រូវប្រយ័ត្នប្រយែងក្រែងចាញ់បោកជនខិលខូចឬក្រុមហ៊ុនមិនល្អនាំឱ្យខ្លួនយើងជួបគ្រោះថ្នាក់ផ្សេង ។ នាងបន្តថា ជាពិសេសត្រូវទាក់ទងអង្គការផ្សេងៗដែលការពារសិទ្ធិមនុស្សដូចជា សមាគមការពារសិទ្ធមនុស្សអាដហុកជាដើម ដើម្បីងាយស្រួលផ្ដល់ដំណឹងដល់ក្រុមគ្រួសារ និងជួយសង្គ្រោះយើងបានទាន់ពេលវេលា ៕
ចែករំលែកព័តមាននេះ