រាជធានីភ្នំពេញ ៖ នាយកដ្ឋាននគរបាលព្រហ្មទណ្ឌ ក្រោមឱវាទនាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃ នៅព្រឹកថ្ងៃចន្ទ ទី១០ កុម្ភៈ នឹងមានការរៀបចំធ្វើសន្និសីទសារព័ត៌មានមួយស្តីពីលទ្ធផលពិស្តារនៃកិច្ចប្រតិបត្តិការចាប់ចោរទមិឡលួចព្រះសុវណ្ណកោដ្ឋ តម្កល់ព្រះបរមសារីរិកធាតុជាទីសក្ការៈដ៏ខ្ពង់ខ្ពស់ ដែលតម្កល់នៅក្នុងព្រះបរមសក្យមុនីចេតិយលើភ្នំព្រះរាជទ្រព្យ
រាជធានីភ្នំពេញ ៖ នាយកដ្ឋាននគរបាលព្រហ្មទណ្ឌ ក្រោមឱវាទនាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃ នៅព្រឹកថ្ងៃចន្ទ ទី១០ កុម្ភៈ នឹងមានការរៀបចំធ្វើសន្និសីទសារព័ត៌មានមួយស្តីពីលទ្ធផលពិស្តារនៃកិច្ចប្រតិបត្តិការចាប់ចោរទមិឡលួចព្រះសុវណ្ណកោដ្ឋ តម្កល់ព្រះបរមសារីរិកធាតុជាទីសក្ការៈដ៏ខ្ពង់ខ្ពស់ ដែលតម្កល់នៅក្នុងព្រះបរមសក្យមុនីចេតិយលើភ្នំព្រះរាជទ្រព្យ ក្នុងស្រុកពញាឮ ខេត្តកណ្តាល ដើម្បីឱ្យព័ត៌មាននេះចាត់ទុកជាផ្លូវការ កុំឱ្យមានការផ្សព្វផ្សាយខុសគ្នា ដែលនាំឱ្យមានការយល់ច្រឡំពីមហាជន ។
ប្រភពព័ត៌មានឱ្យដឹងថា ការធ្វើសន្និសីទសារព័ត៌មាននេះ ស្ថិតក្រោមអធិបតីភាពលោកឧត្តមសេនីយ៍ឯក ម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ និងលោកឧត្តមសេនីយ៍ទោ អុិន បូរ៉ា ប្រធាននាយកដ្ឋាននគរបាលព្រហ្មទណ្ឌ ហើយក៏អាចមានការចូលរួមពីសំណាក់លោកស្នងការនគរបាលខេត្តតាកែវ និងលោកស្នងការនគរបាលខេត្តកណ្តាលផងដែរ ។ ប្រភពព័ត៌មានបន្តថា បានជាមានការរៀបចំសន្និសីទសារព័ត៌មាននេះឡើង មកពីកន្លងទៅប្រព័ន្ធផ្សព្វផ្សាយទាំងអស់មិនទាន់បានបញ្ជាក់ឱ្យចំគោលដៅពីលទ្ធផលនៃការបង្ក្រាបនេះនៅឡើយទេ និងមិនទាន់ច្បាស់ពីសភាពការណ៍មុននឹងឈានទៅដល់ចាប់ខ្លួនជនសង្ស័យ ព្រមទាំងដកហូតវត្ថុតាង ។
ប្រភពពីមន្ត្រីជំនាញស្រាវជ្រាវបទល្មើសព្រហ្មទណ្ឌក្រសួងមហាផ្ទៃ ឱ្យដឹងថា ក្រោយពីមានការបាត់បង់ព្រះសុវណ្ណកោដ្ឋភ្លាម លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដាក់វិធានការយ៉ាងក្តៅគគុកដល់នាយកដ្ឋានកណ្តាលនគរបាលយុត្តិធម៌ ដែលមានលោកឧត្តមសេនីយ៍ឯក ម៉ក់ ជីតូ ជាប្រធាន និងពិសេសនាយកដ្ឋានជំនាញនគរបាលព្រហ្មទណ្ឌក្រសួងមហាផ្ទៃ រួមទាំងស្នងការដ្ឋាននគរបាលខេត្តនានាផងដែរ ។
នៅពេលមានបទបញ្ជានោះ នាយកដ្ឋាននគរបាលព្រហ្មទណ្ឌ មិនបណ្តោយឱ្យពេលវេលាកន្លងហួសដោយឥតប្រយោជន៍នោះឡើយ គឺតែងតែចុះស៊ើបអង្កេតស្រាវជ្រាវ និងក្តាប់ព័ត៌មានតាមមូលដ្ឋានជាប់ជាប្រចាំ ។ លុះដល់ថ្ងៃទី៤ កុម្ភៈ នាយកដ្ឋានព្រហ្មទណ្ឌទទួលបានព័ត៌មានពីប្រជាពលរដ្ឋ នៅអធិការដ្ឋាននគរបាលស្រុកទ្រាំង ខេត្តតាកែវ សមត្ថកិច្ចក៏មានការសង្ស័យលើជនម្នាក់ ដែលអាចជាជនគួរឱ្យសង្ស័យបំផុត ។ តាមព័ត៌មាននោះ កម្លាំងជំនាញព្រហ្មទណ្ឌក្រសួងមហាផ្ទៃ ដែលដឹកនាំដោយលោកឧត្តមសេនីយ៍ត្រី ឡឹក វណ្ណៈ ក៏បានធ្វើការងារនេះភ្លាម គឺការតាមឃាត់ខ្លួនជនសង្ស័យរូបនោះ ដោយមានការព័ទ្ធចាប់ពីក្នុងរថយន្តដ៏ទំនើប១គ្រឿងមកសាកសួរ ព្រោះមុននេះ ជាជនញៀនថ្នាំរកបាយសុីមិនបានផង ម៉េចក៏ក្លាយជាអ្នកមានឆាប់ម៉្លេះ ។ ជនសង្ស័យឈ្មោះ កែវ រស្មី បានសារភាពពីរឿងលួចព្រះសុវណ្ណកោដ្ឋ និងព្រះបដិមាធ្វើពីមាសច្រើនទៀត នៅភ្នំព្រះរាជទ្រព្យ និងបានឈានទៅចាប់ខ្លួនស្ត្រីម្នាក់ទៀតដែលទទួលទិញដុំមាសពីជននេះ និងទាក់ទិនការរំលាយ និងធ្វើជាអលង្ការផងដែរ ។
ផ្តើមចេញពីបទបញ្ជាឱ្យឈានដល់ការឃាត់ខ្លួនជនសង្ស័យទាំង២នាក់នេះ អង្គហេតុគឺកាលពីយប់ថ្ងៃទី៩ ឈានចូលថ្ងៃទី១០ ធ្នូ ២០១៣ នៅវត្តព្រៃប្រសិទ្ធិ៍ ស្រុកទ្រាំង មានករណីចោរចូលលួចព្រះបដិមាអស់២ព្រះអង្គ និងកោដ្ឋធ្វើអំពីស្ពាន់មួយចំនួន ។ ករណីចោរលួចព្រះបដិមា និងកោដ្ឋនៅវត្តព្រៃប្រសិទ្ធិ៍នោះ ត្រូវបានព្រះចៅអធិការ និងអាចារ្យ គណៈកម្មការវត្តរួមគ្នាធ្វើពាក្យបណ្តឹងដាក់ទៅសមត្ថកិច្ច ដែលពាក្យបណ្តឹងនោះបានដាក់ការសង្ស័យទៅលើឈ្មោះ កែវ រស្មី ដែរ បុ៉ន្តែរកភស្តុតាងដាក់បន្ទុកគេមិនទាន់បាន ។ តាមការស្រាវជ្រាវ នៅថ្ងៃមួយ អធិការនគរបាលស្រុកទ្រាំង ខេត្តតាកែវ បានធ្វើលិខិតមួយកោះហៅឈ្មោះ កែវ រស្មី ឱ្យចូលបំភ្លឺជុំវិញបទសង្ស័យខាងលើនេះ ហើយនៅថ្ងៃទី៤ កុម្ភៈ ឈ្មោះ កែវ រស្មី បានចូលទៅអធិការដ្ឋាននគរបាលស្រុកទ្រាំង ក្នុងគោលបំណងទៅសួររកអត្តសញ្ញាណប័ណ្ណរបស់ខ្លួន ។ ពេលជនសង្ស័យចូលខ្លួនទៅដល់ហើយ នគរបាលព្រហ្មទណ្ឌស្រុកក៏បានភ្ជាប់ការសាកសួររឿងលួចព្រះបដិមានៅវត្តព្រៃប្រសិទ្ធិ៍នោះ ។
ប្រភពព័ត៌មានបន្តថា ខណៈពេលជនសង្ស័យចូលខ្លួនទៅកាន់អធិការដ្ឋាននគរបាលស្រុកទ្រាំងភ្លាម ប្រជាពលរដ្ឋ ដែលជាកម្លាំងសម្ងាត់ បានរាយការណ៍ទៅកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ស្របពេលបេសកកម្មរបស់លោកឧត្តមសេនីយ៍ត្រី ឡឹក វណ្ណៈ អនុប្រធាននាយកដ្ឋាននគរបាលព្រហ្មទណ្ឌ បានចុះទៅដល់គោលដៅនោះ ទើបមានការសហការជាមួយស្នងការនគរបាលខេត្តតាកែវ បើកវាំងននទម្លាយរឿងលួចព្រះសុវណ្ណកោដ្ឋ នៅភ្នំព្រះរាជទ្រព្យ ដែលជាព័ត៌មានគួរឱ្យរំភើប។
ក្រោយពីធ្វើកិច្ចការនេះចប់សព្វគ្រប់ លោកឧត្តមសេនីយ៍ត្រី ឡឹក វណ្ណៈ បានទទួលបញ្ជាពីនាយឧត្តមសេនីយ៍ អគ្គស្នងការនគរបាលជាតិ លោក នេត សាវឿន និងលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ឱ្យនាំជនសង្ស័យ រួមទាំងវត្ថុតាងទៅកាន់ស្នងការដ្ឋាននគរបាលខេត្តកណ្តាល ដែលជាមូលដ្ឋានចោរប្រព្រឹត្តបទ
ល្មើស ។
ចែករំលែកព័តមាននេះ