ខេត្តស្វាយរៀង ៖ មនុស្សប្រុស ស្រី៣នាក់បានស្លាប់ជាបន្តបន្ទាប់នៅកន្លែងផ្សេងគ្នាក្នុងថ្ងៃតែមួយ ដែល២ករណីស្លាប់ដោយសារខ្យល់គ និង១ករណីស្លាប់ដោយលង់ទឹក។
ករណីទី១ កើតឡើងកាលពីវេលាម៉ោង៨ព្រឹក ថ្ងៃទី៧ កុម្ភៈ ២០១៤ បុរសម្នាក់ឈ្មោះរស់ សាផាន អាយុ៥៣ឆ្នាំ រស់នៅភូមិខ្នុរ ឃុំរមាំងថ្កោល ស្រុកស្វាយទាបបានដេកស្លាប់នៅកណ្តាលវាលស្រែក្បែរចំណងគោរបស់ខ្លួនដោយសារខ្យល់គរ។ ករណីទី២ កើតឡើងកាលពីវេលាម៉ោង៣រសៀល ថ្ងៃទី៧ កុម្ភៈ ស្ត្រីទុរគតម្នាក់ឈ្មោះទិត្យ ណន អាយុ៧៤ឆ្នាំ រស់នៅភូមិថ្នា ឃុំគ្រួស ស្រុកស្វាយជ្រំ ត្រូវគេប្រទះឃើញដេកស្លាប់នៅក្នុងប្រឡាយទឹក សង្ស័យខ្យល់គរដួលចូលទឹកប្រឡាយលង់ស្លាប់។
ដោយឡែកករណីទី៣ កើតឡើងកាលពីវេលាម៉ោង៥ល្ងាច ថ្ងៃទី៧ កុម្ភៈ នៅក្នុងតំបន់សេដ្ឋកិច្ចពិសេសមេនហាតធេន នៅចំណុចភូមិថ្នាញ សង្កាត់បាទី ក្រុងបាវិត កម្មករសំណង់ម្នាក់ឈ្មោះសេង គា អាយុ៤៣ឆ្នាំ មានទីលំនៅភូមិចំរះ ឃុំគោកខ្ចក ស្រុកកំពង់ត្របែក ខេត្តព្រៃវែង ត្រូវគេប្រទះឃើញដេកស្លាប់នៅក្នុងកន្លែងស្នាក់នៅដោយសារខ្យល់គរដែរ៕
ចែករំលែកព័តមាននេះ