រាជធានីភ្នំពេញ ៖ បន្ទាប់ពីត្រូវចាប់ខ្លួន និងឃុំខ្លួនអស់រយៈពេល៣ឆ្នាំ ជនជាប់ចោទម្នាក់ឈ្មោះចាន់ សុផុន អាយុ៣៤ឆ្នាំ ដែលជាប់ពាក់ព័ន្ធក្នុងសំណុំរឿងឃាតកម្មសម្លាប់ប្រធានសហជីពសេរីកម្មករនៃព្រះរាជាណាចក្រកម្ពុជាប្រចាំរោងចក្រកាត់ដេរសាន់តិចត្រូវបានចៅក្រមសាលាដំបូងរាជធានីភ្នំពេញប្រកាសសាលក្រមដោះលែងឱ្យមានសេរីភាពវិញ កាលពីថ្ងៃទី៦ កុម្ភៈ ២០១៤ បន្ទាប់ពីរកឃើញថា គ្មានកំហុស។
ការដោះលែងនេះបានធ្វើឡើងបន្ទាប់ពីតុលាការលើកយកបណ្តឹងរបស់ជនជាប់ចោទប្រឆាំងនឹងការកាត់ទោសរបស់តុលាការដែលបានផ្តន្ទាទោសរូបគាត់ដាក់ពន្ធនាគារ១៨ឆ្នាំ កាលពីឆ្នាំ២០១១ ពីបទមនុស្សឃាតគិតទុកជាមុន ដែលមានជនរងគ្រោះឈ្មោះហ៊ី វុទ្ធី ។
ក្នុងសំណុំរឿងឃាតកម្មដ៏ស្មុគ្រស្មាញនេះ តុលាការបានលើកមកសវនាការចំនួន២លើកឡើងវិញ បន្ទាប់ពីជនជាប់ចោទបានដាក់ពាក្យបណ្តឹងឱ្យតុលាការបើកសវនាការកាត់ទោសឡើងវិញ។
យោងតាមតុលាការបានឱ្យដឹងថា កាលពីឆ្នាំ២០០៧ ជនរងគ្រោះឈ្មោះហ៊ី វុទ្ធី ប្រធានសហជីពសេរីកម្មករនៃព្រះរាជាណាចក្រកម្ពុជាប្រចាំនៅរោងចក្រសាន់តិចស្ថិតនៅតាមបណ្តោយផ្លូវវេងស្រេង ខណ្ឌពោធិ៍សែនជ័យ ត្រូវបានជនមិនស្គាល់មុខបាញ់ស្លាប់នៅនឹងកន្លែងនៅវេលាម៉ោង៥ និង៣០នាទីព្រឹក ខណៈជនរងគ្រោះចេញពីកន្លែងធ្វើការ។
មានសាក្សីជាច្រើនបានប្រាប់សមត្ថកិច្ចថា គេបានឃើញខ្មាន់កាំភ្លើងចំនួន២នាក់ជិះតាមពីក្រោយជនរងគ្រោះ និងបានបើកការបាញ់ប្រហារលើជនរងគ្រោះតែម្តង។
ចែករំលែកព័តមាននេះ