រាជធានីភ្នំពេញ ៖ កាកបាទក្រហមកម្ពុជាកាលពីថ្ងៃទី៧ កុម្ភៈ ២០១៤ បានបើកកិច្ចប្រជុំដំបូងនៃគណៈកម្មការ និងអនុគណៈកម្មការរៀបចំពិធីខួបលើកទី១៥១ ទិវាពិភពលោកកាកបាទក្រហម និងអឌ្ឍចន្ទក្រហម៨ ឧសភា ២០១៤ ក្រោមអធិបតីភាពសម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីព្រះបរមរាជវាំង និងជាប្រធានគណៈកម្មការរៀបចំពិធីខួបទី១៥១ ទិវាពិភពលោកកាកបាទក្រហម និងអឌ្ឍចន្ទក្រហម៨ ឧសភា នៅទីស្នាក់ការកណ្តាលកាកបាទក្រហមកម្ពុជាអូរបែកក្អម។
លោកស្រីពុំ ចន្ទីនី អគ្គលេខាធិការកាកបាទក្រហមកម្ពុជាបានអានសេចក្តីសម្រេចស្តីពីការចាត់តាំងគណៈកម្មការរៀបចំពិធីខួបទី១៥១ ទិវាពិភពលោកកាកបាទក្រហម និងអឌ្ឍចន្ទក្រហម៨ ឧសភា ២០១៤ ។ ដោយក្នុងសេចក្តីសម្រេចនេះមានបង្កើតគណៈកម្មការរៀបចំពិធីខួបទី១៥១ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា មានសម្តេចចៅហ្វាវាំង គង់ សំអុល ឧបនាយករដ្ឋមន្ត្រី ជាប្រធានគណៈកម្មការ និងបង្កើតអនុគណៈកម្មការចំនួន៤ទៀត គឺទី១-អនុគណៈកម្មការក្រុមប្រឹក្សាឯកសារពិព័រណ៍ និងផ្សព្វផ្សាយ ទី២-អនុគណៈកម្មការរដ្ឋបាលហិរញ្ញកិច្ច និងផ្គត់ផ្គង់ ទី៣-អនុគណៈកម្មការពិធីការបដិសណ្ឋារកិច្ច និងតុបតែង ទី៤-អនុគណៈកម្មការសន្តិសុខសណ្តាប់ធ្នាប់ និងសង្គ្រោះបឋម។
សម្តេចចៅហ្វាវាំងគង់ សំអុល បានគូសបញ្ជាក់ថា តាមសេចក្តីសម្រេចនេះអ្នកដែលត្រូវទទួលភារកិច្ចទាំងអស់ត្រូវចាប់ផ្តើមអនុវត្តបំពេញការងារតាមតួនាទីរៀងៗខ្លួនចាប់ពីពេលនេះតទៅ ។ សម្តេចបានជម្រុញឱ្យមានការផ្សព្វផ្សាយតាមប្រព័ន្ធសារព័ត៌មាន ទូរទស្សន៍ ជាពិសេសវិទ្យុពីសកម្មភាពមនុស្សធម៌របស់កាកបាទក្រហមកម្ពុជា និងការឆ្ពោះទៅរកខួបទី១៥១ ទិវាពិភពលោកកាកបាទក្រហម និងអឌ្ឍចន្ទក្រហម៨ ឧសភា ឱ្យបានដល់ស្រទាប់យុវជន និងប្រជាជននៅតាមតំបន់ឆ្ងាយៗឱ្យបានស៊ីជម្រៅថែមទៀត៕
ចែករំលែកព័តមាននេះ