រាជធានីភ្នំពេញ ៖ កម្មករអូសរទេះបន្លែនៅផ្សារដើមគរម្នាក់យករទេះទៅបញ្ចាំគេ ម្ចាស់រទេះឱ្យប្រាក់យកទៅលោះរទេះវិញ បែរជាឆក់យកលុយរត់ត្រូវម្ចាស់រទេះស្រែកចោរៗបង្កឱ្យមានការភ្ញាក់ផ្អើលដល់ប្រជាពលរដ្ឋនៅក្បែរនោះនាំគ្នាយកដុំឥដ្ឋគប់បែកក្បាលធ្វើពុតជាសន្លប់ ត្រូវបានគេហៅរថយន្តសង្គ្រោះមកដឹកយកទៅព្យាបាល លុះដឹកចេញបានចម្ងាយ២០០ម៉ែត្រសុំចុះពីរថយន្តត្រឡប់ទៅផ្សារដើមគរវិញធ្វើមិនដឹង។
ហេតុការណ៍នេះបានកើតឡើងកាលពីវេលាម៉ោង១១យប់ ថ្ងៃទី៨ កុម្ភៈ ២០១៤ នៅក្បែរក្រុមហ៊ុនហុងដាសាខាផ្សារដើមគរ ជិតផ្សារដើមគរ ស្ថិតក្នុងសង្កាត់ផ្សារដើមគរ ខណ្ឌទួលគោក។
ប្រភពព័ត៌មានពីស្ត្រីជាម្ចាស់រទេះបានឱ្យដឹងថា កម្មករអូសរទេះបន្លែ និងដឹកទំនិញគ្រប់ប្រភេទបានយករទេះរបស់គាត់ដែលទើបទិញក្នុងតម្លៃ២៥០ដុល្លារយកទៅបញ្ចាំគេលុះពេលគាត់ដឹងថាយកទៅបញ្ចាំ ក៏ហៅទៅសួរនាំ ហើយបានហុចប្រាក់ចំនួន២០ដុល្លារឱ្យយកទៅលោះយករទេះមកវិញ ស្រាប់តែកម្មកររូបនោះបានឆក់យកលុយពីដៃរបស់គាត់រួចរត់វឹងដោយមិននិយាយស្តីអ្វីទាំងអស់ គាត់ក៏ស្រែកចោរៗផ្អើលដល់អ្នកនៅជិតនោះនាំគ្នាយកដុំឥដ្ឋគប់បណ្តាលឱ្យបែកក្បាល កម្មកររូបនោះធ្វើពុតជាសន្លប់។
ប្រភពបន្តថា ពេលឃើញសន្លប់បែបនេះ អ្នកចោមរោមមើលនាំគ្នាទូរស័ព្ទហៅរថយន្តសង្គ្រោះមកដឹកយកទៅព្យាបាល។ ខណៈរថយន្តសង្គ្រោះដឹកចេញបានប្រមាណ២០០ម៉ែត្រកម្មកររូបនោះបានសុំឱ្យរថយន្តឈប់ ហើយដើរចុះត្រឡប់ទៅផ្សារដើមគរវិញធ្វើមិនដឹង ចំណែកស្ត្រីជាម្ចាស់រទេះត្រូវនគរបាលប៉ុស្តិ៍ផ្សារដើមគរនាំទៅសាកសួរ និងអប់រំឱ្យជួយចេញថ្លៃព្យាបាលរបួសជនរងគ្រោះផង ប៉ុន្តែពេលស្ត្រីម្ចាស់រទេះត្រឡប់មកវិញ ឃើញកម្មកររូបនោះកំពុងនៅផ្សារធ្វើឱ្យគាត់ហួសចិត្តនិយាយលែងចេញ៕
ចែករំលែកព័តមាននេះ