ខេត្តកំពង់ចាម ៖ លោកយាយវ័យ ៦៥ឆ្នាំ ម្នាក់បានស្លាប់បាត់បង់ជីវិតភ្លាមៗ និងចៅប្រុសអាយុ ៥ឆ្នាំ ម្នាក់ទៀតរងរបួសធ្ងន់ ត្រូវបានបញ្ជូនទៅសង្រ្គោះនៅមន្ទីរពេទ្យបង្អែកស្រុកពញាក្រែក ខណៈដែលអ្នកទាំងពីរដើរកាត់ផ្លូវថ្នល់ជាតិលេខ៧២ ត្រូវបានរថយន្តវីហ្គោ ពណ៌ស ១គ្រឿង ពាក់ស្លាកលេខ ភ្នំពេញ 2T-5797 បើកបុកយ៉ាងពេញទំហឹង ដែលហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង ៤ និង ៣០នាទី រសៀលថ្ងៃទី០៨ កុម្ភៈ ២០១៤ ស្ថិតនៅភូមិជីមាន់លិច ឃុំក្រែក ស្រុកពញាក្រែក។
លោកយាយដែលស្លាប់មានឈ្មោះ ហុក ស៊ីអេង អាយុ ៦៥ឆ្នាំ និងចៅប្រុសអាយុ ៥ឆ្នាំ រស់នៅភូមិជីមាន់លិច ឃុំក្រែក របួសធ្ងន់កំពុងស្ថិតនៅក្នុងការសង្រ្គោះនៅឡើយ។ តាមប្រភពពីនគរបាលចរាចរណ៍ស្រុកពញាក្រែក បានប្រាប់ឲ្យដឹងថា នៅពេលមុនកើតហេតុ លោកយាយ និងចៅប្រុស បានដើរឆ្លងថ្នល់ ហើយក៏មានរថយន្តម៉ាកវីហ្គោ ១គ្រឿង ពណ៌ស បើកបរក្នុងទិសដៅពីកើតមកលិច ក្នុងល្បឿនយ៉ាងលឿន លុះមកដល់ត្រង់ភូមីជីមាន់លិច ចាប់ហ្វ្រាំងមិនទាន់ ក៏ជ្រុលទៅបុកអ្នកថ្មើរជើងយ៉ាងពេញទំហឹងតែម្តង។
ចំណែករថយន្តមិនបានឈប់ទេ គឺរឹតតែបន្ថែមល្បឿនទៅមុខរហូតមកដល់ត្រង់ចំណុចផ្លូវបំបែកក្រែក អ្នកបើកបរមិនស្គាល់អត្តសញ្ញាណបានបើកទ្វាររថយន្តរត់គេចខ្លួនបាត់ស្រមោល បន្សល់ទុករថយន្តចោលត្រូវសមត្ថកិច្ចជំនាញអូសយកទៅរក្សាទុកនៅអធិការដ្ឋាននគរបាលស្រុកពញាក្រែក ដើម្បីស្រាវជ្រាវបន្ត។
លោកវរសេនីយ៍ត្រី ប្រាក់ ប៊ុនណុន អធិការនគរបាលស្រុកពញាក្រែក បានឲ្យដឹងថា រហូតមកដល់វេលាម៉ោង ៨ និង ៣០នាទី យប់ថ្ងៃដដែល សមត្ថកិច្ចជំនាញចរាចរណ៍បានស៊ើបអង្កេតដឹងថា រថយន្តបង្កនោះ ដឹកបាតស្បែកជើងមិនបង់ពន្ធមកពីប្រទេសវៀតណាម ហើយថែមទាំងស្គាល់មុខថៅកែរថយន្តនោះផងដែរ កំពុងបំពេញបែបបទបញ្ជូនទៅសាលាដំបូងខេត្ត ចាត់ការតាមច្បាប់៕
ចែករំលែកព័តមាននេះ