រាជធានីភ្នំពេញ ៖ លោក ម៉ម សូណង់ដូ ប្រធានវិទ្យុសំបុកឃ្មុំ លោកស្រី ធិតា ឃិះ អ្នកស្រី ទេព វន្នី អ្នកតវា៉ឆ្នើមមកពីបឹងកក់ សហគមន៍ថ្មគោល និងបុរីកីឡា តំណាងសហជីព និងមានសង្ឃខ្លះផងសរុបប្រមាណជាង១០០នាក់ បានមកជួបជុំគ្នានៅមុខព្រះអង្គដងកើលើកំណាត់វិថីព្រះសីុសុវត្ថិ (មុខព្រះបរមរាជវាំង)
រាជធានីភ្នំពេញ ៖ លោក ម៉ម សូណង់ដូ ប្រធានវិទ្យុសំបុកឃ្មុំ លោកស្រី ធិតា ឃិះ អ្នកស្រី ទេព វន្នី អ្នកតវា៉ឆ្នើមមកពីបឹងកក់ សហគមន៍ថ្មគោល និងបុរីកីឡា តំណាងសហជីព និងមានសង្ឃខ្លះផងសរុបប្រមាណជាង១០០នាក់ បានមកជួបជុំគ្នានៅមុខព្រះអង្គដងកើលើកំណាត់វិថីព្រះសីុសុវត្ថិ (មុខព្រះបរមរាជវាំង) សង្កាត់ជ័យជំនះ ខណ្ឌដូនពេញ កាលពីវេលាម៉ោង៨ព្រឹក ថ្ងៃទី៧ កុម្ភៈ ដើម្បីអុជធូបបួងសួងសុំឱ្យមានការដោះលែងមនុស្សចំនួន២៣នាក់ ដែលត្រូវបានចាប់និងឃុំខ្លួននៅពន្ធនាគារត្រពាំងផ្លុង កាលពីថ្ងៃទី២ទី៣ ខែមករា ឆ្នាំ២០១៤ កន្លងមកនេះ និងជាការអបអរក្នុងពេលដែលបានដឹងថា ព្រះបរមសារីរិកធាតុត្រូវបានរកឃើញវិញហើយ ។
តំណាងសង្គមសីុវិលមួយរូបបានឱ្យអ្នកសារព័ត៌មានដឹងថា គោលបំណងដែលសង្គមសីុវិល និងតំណាងសហជីព ព្រមទាំងព្រះសង្ឃមកជួបជុំគ្នានៅមុខព្រះអង្គដងកើ នាព្រឹកថ្ងៃសុក្រទី៧ កុម្ភៈ នេះ គឺនាំគ្នាអុជធូបបួងសួងឧទ្ទិសដល់រុក្ខទេវតាទាំងមួយម៉ឺនលោកធាតុ ដែលថែរក្សាទឹកដីនៃប្រទេសកម្ពុជា និងសុំឧទ្ទិសដល់លោកយាយម៉ៅលោកយាយពេញ និងព្រះអង្គដងកើដែលជាទីគោរពសក្ការៈនៃប្រជាពលរដ្ឋខ្មែរ សុំលោកបើកព្រះនេត្រមើលមកប្រជាពលរដ្ឋកម្ពុជាសុំជួយបំបាត់ឱ្យអស់នូវរឿងរា៉វហិង្សាទាំងឡាយ កុំឱ្យកើតមានឡើងតទៅទៀត ។ លោកនិយាយទៀតថា សុំជួយរំដោះអ្នកដែលត្រូវបានចាប់ខ្លួនទាំង២៣រូបដែលកំពុងជាប់នៅពន្ធនាគារក្នុងខេត្តកំពង់ចាម ឱ្យបានចាកផុតពីការចោទប្រកាន់នានា និងសុំឱ្យលោកបានរួចផុតពីទោសទណ្ឌកម្ម និងឱ្យបានមកជួបជុំសាច់ញាតិមិត្តភក្តិដោយសុវត្ថិភាព សុខសាន្ត និងសន្តិភាពជារៀងរហូត ។
មន្ត្រីសាលាខណ្ឌដូនពេញ ដែលឃ្លាំមើលសកម្មភាពនេះបាននិយាយថា ក្រោយពីអង្គការសង្គមសីុវិល តំណាងសហជីព អ្នកតវា៉មកពីបឹងកក់ សហគមន៍ថ្មគោល បុរីកីឡា និងព្រះសង្ឃមកពីសមាគមបណ្តាញព្រះសង្ឃឯករាជ្យដើម្បីសន្តិភាពនាំគ្នាអុជធូបរួចមក ពួកគេក៏បានបង្ហោះប៉េងប៉ោងភ្ជាប់នឹងពាក្យស្លោកព្រមទាំងលែងចាបឱ្យរួចទុក្ខទោស ។ មន្ត្រីរូបនោះនិយាយថា ការប្រមូលផ្តុំនេះមិនមានការអនុញ្ញាតពីសាលារាជធានីភ្នំពេញនោះទេ តែក៏មិនត្រូវបានសមត្ថកិច្ចរារាំងដែរ ។ បន្ទាប់មកទៀត ពួកគេបាននាំគ្នារំសាយនៅវេលាម៉ោងជាង១០ព្រឹក ថ្ងៃដដែល ក្រោមការឃ្លាំមើលពីអាជ្ញាធរមូលដ្ឋានផងដែរ ។ មន្ត្រីតវា៉ដដែលបានបញ្ជាក់ថា នៅព្រឹកថ្ងៃទី១០ ខែកុម្ភៈ ឆ្នាំ២០១៤ ខាងមុខនេះ នឹងមានការជួបជុំគ្នារវាងតំណាងសហជីពប្រមាណជាង១០០ មកពីបណ្តារោងចក្រនៅមុខព្រះអង្គដងកើ ដើម្បីអុជធូបបួងសួង បង្ហោះប៉េងប៉ោង និងលែងសត្វព្រមទាំងដាក់ញត្តិតាមបណ្តាស្ថានទូតមួយចំនួនដូចជាអាមេរិក ចិន បារាំង អង់គ្លេស និងសុំឱ្យមានការដោះលែងមនុស្ស២៣នាក់ ដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ចាម និងស្នើឱ្យមានការចរចាពីប្រាក់ឈ្នួលកម្មករឡើងវិញ ។
ចំពោះវត្ថុដែលប្រជាពលរដ្ឋទូទាំងប្រទេសគោរពបូជា ជាទីសក្ការៈគឺ ព្រះបរមសារីរិកធាតុ ត្រូវបានរកឃើញវិញ សង្គមសីុវិលដែលបានអះអាងថាមានប្រមាណជាង២០អង្គការ រួមទាំងព្រះសង្ឃនៅព្រឹកថ្ងៃទី៧ កុម្ភៈ បានសាទរ និងស្នើឱ្យរាជរដ្ឋាភិបាលដង្ហែទៅតម្កល់នៅកន្លែងដើមវិញ ។ ព្រះសង្ឃ ប៊ុត ប៊ុនទីញ ដែលតាងនាមថាជាបណ្តាញសង្ឃឯករាជ្យដើម្បីយុត្តិធម៌សង្គមមានថេរដីកាថា ការរកឃើញនេះជាគុណសម្បត្តិមួយដែលរដ្ឋាភិបាលខិតខំប្រឹងប្រែងក្នុងការរុករកស្រាវជ្រាវ។ ប៉ុន្តែរដ្ឋាភិបាលគួរតែបង្ហាញឱ្យមហាជនឃើញទាំងអស់គ្នាដឹងឮ តាមរយៈប្រព័ន្ធផ្សព្វផ្សាយនានា ហើយរដ្ឋាភិបាលគួរតែដង្ហែព្រះសុវណ្ណកោដ្ឋ ព្រះបរមសារីរិកធាតុទៅតម្កល់នៅភ្នំព្រះរាជទ្រព្យ ។ ជាមួយនេះ រដ្ឋាភិបាលគួរតែដោះលែងមនុស្ស២៣នាក់ដែលកំពុងជាប់ពន្ធនាគារព្រោះថាពួកគាត់មិនមានកំហុសនោះទេ ៕
ចែករំលែកព័តមាននេះ