រាជធានីភ្នំពេញ ៖ កម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដូនពេញ សហការជាមួយនគរបាលប៉ុស្តិ៍រដ្ឋបាលស្រះចកបានធ្វើការឃាត់ខ្លួនជនសង្ស័យជួញដូរនិងប្រើប្រាស់គ្រឿងញៀន០៦នាក់ជាបន្តបន្ទាប់ នៅចំណុចមុខផ្ទះលេខ៥៤ ផ្លូវលេខ៧០ ស្ថិតក្នុងភូមិទី១ សង្កាត់ស្រះចក និងនៅក្នុងភូមិទី១០ ផ្លូវលេខ៥១ សង្កាត់ផ្សារថ្មីទី៣ ខណ្ឌដូនពេញ កាលពីវេលាម៉ោង៤និង៣០នាទីរសៀលថ្ងៃទី០៦ មករា ២០១៤ ។
យោងតាមរបាយការណ៍នគរបាលខណ្ឌដូនពេញបានឲ្យដឹងថា ជនសង្ស័យដែលត្រូវសមត្ថកិច្ចឃាត់ខ្លួនពីបទជួញដូរ និងប្រើប្រាស់ដោយខុសច្បាប់នូវសារធាតុញៀនមាន ទី១-ឈ្មោះទៀង ប៉ូលីន ភេទប្រុស អាយុ៤៩ឆ្នាំ ស្នាក់នៅផ្ទះលេខ២៦៨អឺ០ហ្សិត ផ្លូវលេខ៥១ ភូមិ១០ សង្កាត់ផ្សារថ្មីទី៣ ខណ្ឌដូនពេញ (សង្ស័យជួញដូរនិងផ្តល់ទីតាំងឲ្យប្រើប្រាស់ដោយខុសច្បាប់នូវសារធាតុញៀន) ,ទី២-ឈ្មោះរ័ត្ន សុវណ្ណារ៉ា ភេទប្រុស អាយុ២០ឆ្នាំ ស្នាក់នៅផ្ទះក្នុងភូមិ១០ សង្កាត់ផ្សារថ្មីទី៣ ខណ្ឌដូនពេញ ,ទី៣-ឈ្មោះ សាន សុនី ភេទប្រុស អាយុ២០ឆ្នាំ ស្នាក់នៅផ្ទះលេខអ៊ែរ៨ ផ្លូវលេខ២៦៤ សង្កាត់ចតុមុខ ខណ្ឌដូនពេញ ,ទី៤-ឈ្មោះឃឹម យ៉ាម៉ង់ ភេទប្រុស អាយុ១៧ឆ្នាំ ស្នាក់នៅផ្ទះលេខ៥៨អឺ០ ផ្លូវលេខ២០០ សង្កាត់បឹងរាំង ខណ្ឌដូនពេញ ,ទី៥-ឈ្មោះពូន រ៉ាវី ភេទប្រុស ស្នាក់នៅផ្ទះលេខ៦៨អឺ០ ផ្លូវលេខ២៤២ សង្កាត់វាលវង់ ខណ្ឌ៧មករា និងទី៦-ឈ្មោះ ប៉ាវ គន្ធសុធា ភេទប្រុស អាយុ៣០ឆ្នាំ ស្នាក់នៅផ្ទះលេខ១៦អឺ០ ផ្លូវលេខ៥១ សង្កាត់ផ្សារថ្មីទី៣ ខណ្ឌដូនពេញ ទាំង០៥នាក់សង្ស័យប្រើប្រាស់ដោយខុសច្បាប់នូវសារធាតុញៀន ។
ក្នុងកិច្ចប្រតិបត្តិការបង្រ្កាបជនសង្ស័យខាងលើនេះ សមត្ថកិច្ចដកហូតបាន គ្រឿងញៀនក្រាមពណ៌សថ្លា ប្រភេទមេតំហ្វេតាមីនចំនួន០៣កញ្ចប់តូច ,ជញ្ជីងសម្រាប់ថ្លឹងគ្រឿងញៀនចំនួន០២ ,ថង់ប្លាស្ទិកសម្រាប់ច្រកគ្រឿងញៀនមួយចំនួន និងឧបករណ៍ប្រើប្រាស់គ្រឿងញៀនមួយចំនួនទៀត។
បច្ចុប្បន្នជនសង្ស័យទាំង០៦នាក់ត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ៕
ចែករំលែកព័តមាននេះ