បង្ហាញមុខជនសង្ស័យ២២នាក់ ដែលបង្ក្រាបរយៈពេល៣ថ្ងៃ១៦ករណី
- ភ្នំពេញ
រាជធានីភ្នំពេញ ៖ ជនសង្ស័យចំនួន២២នាក់ ដែលបានប្រព្រឹត្តបទល្មើសលួច ឆក់ ប្លន់ ហិង្សា និងរំលោភទំនុកចិត្ត រួមនឹងវត្ថុតាងជាច្រើន ត្រូវបានកម្លាំងនគរបាលព្រហ្មទណ្ឌកម្រិតស្រាល…
រាជធានីភ្នំពេញ ៖ ជនសង្ស័យចំនួន២២នាក់ ដែលបានប្រព្រឹត្តបទល្មើសលួច ឆក់ ប្លន់ ហិង្សា និងរំលោភទំនុកចិត្ត រួមនឹងវត្ថុតាងជាច្រើន ត្រូវបានកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ និងនៅតាមបណ្ដាខណ្ឌនានា យកមកបង្ហាញមុខជាសាធារណៈរួមគ្នា កាលពីវេលាម៉ោង៩ព្រឹក ថ្ងៃទី០៣ ខែកញ្ញា ឆ្នាំ២០២៥ បន្ទាប់ពីបង្ក្រាបបានជាបន្តបន្ទាប់ក្នុងរយៈពេល៣ថ្ងៃ មានចំនួន១៦ករណី ។
តាមនគរបាលព្រហ្មទណ្ឌនៃស្នងការដ្ឋានរាជធានីភ្នំពេញបានឱ្យដឹងថា ដោយទទួលបទបញ្ជាដ៏ម៉ឺងម៉ាត់ពីលោកឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កម្លាំងនគរបាលការិយាល័យព្រហ្មទណ្ឌកម្រិតស្រាល បានសហការជាមួយអធិការដ្ឋានខណ្ឌទាំង១៤ ធ្វើការស្រាវជ្រាវបង្ក្រាបបទល្មើសជាក់ស្តែងជាបន្តបន្ទាប់ ។
តាមរបាយការណ៍របស់នគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញបានឱ្យដឹងថា ដោយមានការស្រាវជ្រាវបង្ក្រាប និងបង្ក្រាបជាក់ស្តែងរយៈពេល៣ថ្ងៃ គិតពីថ្ងៃទី៣១ ខែសីហា រហូតដល់ថ្ងៃទី០៣ ខែកញ្ញា ឆ្នាំ២០២៥ ជាលទ្ធផល បង្ក្រាបបានសរុបចំនួន១៦ករណី ឃាត់ជនសង្ស័យបាន២២នាក់ ។ ក្នុងនោះជនសង្ស័យដែលមានសារធាតុញៀន ១០នាក់ ។
យោងតាមរបាយការណ៍បានឲ្យដឹងទៀតថា នៅក្នុងចំណោមជនសង្ស័យទាំង២២នាក់ ក្នុងនោះមានករណីប្លន់ម៉ូតូ(ជិះម៉ូតូធាក់វាយ)៤ករណី ឃាត់ខ្លួនបាន៨នាក់, ករណីលួច(ម៉ូតូ-ទូរស័ព្ទ-ខ្សែកមាស)៦ករណី ឃាត់ខ្លួន៧នាក់(មានសារធាតុញៀន), ករណីហិង្សាដោយចេតនា១ករណី ឃាត់ខ្លួន២នាក់, ករណីឆក់ខ្សែក២ករណី ឃាត់ខ្លួន២នាក់(មានសារធាតុញៀន), ករណីធ្វើឱ្យខូចខាតដោយចេតនា២ករណី ឃាត់ខ្លួន៣នាក់(មានសារធាតុញៀន១នាក់) ។
មន្ត្រីនគរបាលបានឱ្យដឹងទៀតថា នៅក្នុងចំណោមជនសង្ស័យទាំង២២នាក់នេះ នគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បង្ក្រាបបាន៥ករណី ឃាត់ខ្លួនបាន៩នាក់ ក្នុងនោះមានករណីប្លន់ម៉ូតូ(ជិះម៉ូតូដេញធាក់)ចំនួន៤ករណី ឃាត់ខ្លួន៨នាក់ និងករណីលួចម៉ូតូ១ករណី ឃាត់ខ្លួន១នាក់ ។
នគរបាលខណ្ឌពោធិ៍សែនជ័យ បង្ក្រាបបាន២ករណី ឃាត់ខ្លួន២នាក់ ។
នគរបាលខណ្ឌមានជ័យ បង្ក្រាបបាន៤ករណី ឃាត់ខ្លួន៤នាក់ ។
នគរបាលខណ្ឌ៧មករា បង្ក្រាបបាន២ករណី ឃាត់ខ្លួន២នាក់ ។
នគរបាលខណ្ឌឫស្សីកែវ បង្ក្រាបបាន២ករណី ឃាត់ខ្លួន៣នាក់ ។
នគរបាលខណ្ឌកំបូល បង្ក្រាបបាន១ករណី ឃាត់ខ្លួន១នាក់ ។
បច្ចុប្បន្នជនសង្ស័យទាំង២២នាក់ ត្រូវបានកម្លាំងនគរបាលព្រហ្មទណ្ឌកម្រិតស្រាល និងកម្លាំងនគរបាលខណ្ឌទាំង៦ដែលជាម្ចាស់ករណី កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់បន្ទាប់ពីធ្វើការបង្ហាញមុខ ៕
ចែករំលែកព័តមាននេះ