រាជធានីភ្នំពេញ ៖ ក្រុមយុវជនស្ទាវចំនួន៤នាក់ ដែលបង្កហិង្សាវាយគ្នានៅតាមដងផ្លូវសាធារណៈនៅក្នុងសង្កាត់បឹងកក់ទី២ នៅពេលភ្លៀងធ្លាក់ជន់លិចផ្លូវ ត្រូវបានកម្លាំងនគរបាលខណ្ឌទួលគោកស្រាវជ្រាវឃាត់ខ្លួនបានហើយ។ ជនសង្ស័យដែលបង្កហិង្សា:១-ឈ្មោះ ម៉ៅ ប្រុសហ៊ុល អាយុ១៥ឆ្នាំ…
រាជធានីភ្នំពេញ ៖ ក្រុមយុវជនស្ទាវចំនួន៤នាក់ ដែលបង្កហិង្សាវាយគ្នានៅតាមដងផ្លូវសាធារណៈនៅក្នុងសង្កាត់បឹងកក់ទី២ នៅពេលភ្លៀងធ្លាក់ជន់លិចផ្លូវ ត្រូវបានកម្លាំងនគរបាលខណ្ឌទួលគោកស្រាវជ្រាវឃាត់ខ្លួនបានហើយ។
ជនសង្ស័យដែលបង្កហិង្សា:១-ឈ្មោះ ម៉ៅ ប្រុសហ៊ុល អាយុ១៥ឆ្នាំ ,២-ឈ្មោះ បោយ រ៉ាទី ភេទប្រុស អាយុ១៥ឆ្នាំ ,៣-ឈ្មោះ វ៉ាន់ មករា ភេទប្រុស អាយុ១៥ឆ្នាំ និង៤-ឈ្មោះ អូន ផានិត ភេទប្រុស អាយុ១៥ឆ្នាំ។ អ្នកទាំង៤នាក់ មុខរបរមិនពិតប្រាកដ ស្នាក់នៅបន្ទប់ជួល ផ្លូវរថភ្លើង ក្រុមទី១០៩ ភូមិ២៣ សង្កាត់បឹងកក់ទី២ ខណ្ឌទួលគោក ។ ចំណែកជនរងគ្រោះចំនួន០២នាក់ពុំស្គាល់អត្តសញ្ញាណឡើយ ជិះម៉ូតូ០១គ្រឿងម៉ាក Honda ស៊េរី2022 ពណ៍ខ្មៅ មិនចាំផ្លាក ក្រោយពេលកើតហេតុជិះម៉ូតូចាកចេញទៅបាត់ ហើយសមត្ថកិច្ចកំពុងធ្វើការស្រាវជ្រាវមកដាក់ពាក្យបណ្ដឹង។
តាមនគរបាលខណ្ឌទួលគោកបានឲ្យដឹងថា ដោយអនុវត្តតាមបទបញ្ជាផ្ទាល់ពីឯកឧត្តម ឧត្តមសេនីយ៍ឯក ជូន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី៣ ខែកញ្ញា ឆ្នាំ២០២៥ នៅវេលាម៉ោងប្រហែល២១:០០នាទី កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវឃាត់ខ្លួនជនសង្ស័យ០៤នាក់ជាបន្តបន្ទាប់ពីបទហិង្សាដោយចេតនាមានស្ថានទម្ងន់ទោសដោយជនសង្ស័យបាន ប្រើមួកការពារសុវត្ថិភាពនិងប្រើដៃ, ជើងវាយនិងធាក់លើជនរងគ្រោះ០២នាក់បណ្ដាលឲ្យរងរបួសក្បាលនិងដងខ្លួនកាលការពារវេលាម៉ោង ១៩និង៣៦នាទីយប់ថ្ងៃទី០៣ខែកញ្ញាឆ្នាំ២០២៥នៅចំណុចលើដងផ្លូវលេខ៦០៨ ក្រុមទី១០៩ ភូមិ២៣ សង្កាត់បឹងកក់ទី២ ខណ្ឌទួលគោក។
គួរបញ្ជាក់ថា អំពើហិង្សានេះបានកើតឡើង ខណៈពេលដែលភ្លៀងធ្លាក់និងជនលិចផ្លូវ ហើយជនសង្ស័យមួយក្រុមមានគ្នា៤នាក់បាននាំគ្នាព្រួតវាយទៅលើយុវជនពីរនាក់ដូចនៅក្នុងរឿងកុនហើយត្រូវបានប្រជាពលរដ្ឋថតបង្ហោះនៅក្នុងបណ្ដាញសង្គម។
លុះរំលងបានប្រមាណជាង១ម៉ោង ត្រូវបានសមត្ថកិច្ចខណ្ឌទួលគោក និងនគរបាលប៉ុស្តិ៍បឹងកក់ទី ២ស្រាវជ្រាវឃាត់ខ្លួនបានជាបន្តបន្ទាប់។
បច្ចុប្បន្ន ជនសង្ស័យខាងលើកំពុងឃាត់ខ្លួនជាបណ្ដោះអាសន្ននៅ អធិការដ្ឋាននគរបាលខណ្ឌទួលគោក ដើម្បីធ្វើការសាកសួរនិងចាត់ការបន្តតាមនីតិវិធី៕
ចែករំលែកព័តមាននេះ