ខេត្តបាត់ដំបង ៖ បុរសវ័យ៥៣ឆ្នាំ ឈ្មោះ យ៉ាន់ ឆេត រស់នៅក្នុងភូមិទួលច្រនៀង ឃុំបាយដំរំា ស្រុកបាណន់ បានត្រូវសមត្ថកិច្ចឃាត់ខ្លួនកាលពីម៉ោង១០ព្រឹកថ្ងៃទី០៥ កុម្ភៈ ២០១៤ ដោយសង្ស័យជាប់ពាក់ព័ន្ឋនឹងការស្លាប់របស់ស្រ្តីម្នាក់ដែលគេប្រទះឃើញក្នុងគុម្ពោតព្រៃ ។
គួររំលឹកថា សពស្ត្រីម្នាក់ ត្រូវបានគេប្រទះឃើញនៅក្នុងគុម្ពោតព្រៃកណ្តាលវាលស្រែ ដោយមានគ្របចំបើងពីលើ និងបង្កឱ្យមានការភ្ញាក់ផ្អើល កាលពីវេលាម៉ោង៣រសៀលថ្ងៃទី០៣ កុម្ភៈ ២០១៤ ស្ថិតក្នុងភូមិទួលច្រនៀង ឃុំបាយដំរាំ ស្រុកបាណន់ ។
បើតាមសេចក្តីរាយការណ៍បានឱ្យដឹងថា ស្ត្រីរងគ្រោះឈ្មោះ ហូ ហួច អាយុ៤៣ឆ្នាំ ស្នាក់នៅភូមិកើតហេតុ ។
តាមក្រុមគ្រួសារបានឱ្យដឹងថា កាលពីវេលាម៉ោង៦ព្រឹកថ្ងៃខាងលើ ស្ត្រីរងគ្រោះបានដឹកគោទៅចងនៅវាលស្រែ លុះដល់ម៉ោង១១ក៏បាត់មិនឃើញត្រឡប់មកផ្ទះវិញ ។ ដោយមានការសង្ស័យ ក្រុមគ្រួសារបាននាំគ្នាដើររក ស្រាប់តែឃើញស្ត្រីរងគ្រោះដេកស្លាប់ផ្កាប់មុខ មានគ្របចំបើងពីលើ នៅក្នុងគុម្ពោតព្រៃ និងធ្វើឱ្យមានការភ្ញាក់ផ្អើលឡើងតែម្តង ។
បើតាមអធិការស្រុកបាណន់ លោក ប៊ុត សំបូរ បានឱ្យដឹងថា ករណីខាងលើ សង្ស័យជាឃាតកម្មដោយគំនុំ ។
យ៉ាងណាក៏ដោយ នៅចំពោះមុខសមត្ថកិច្ច បុរសសង្ស័យខាងលើបានបដិសេធថា មិនមានការពាក់ព័ន្ឋនោះទេ តែសមត្ថកិច្ចបានឃាត់ខ្លួនដោយសំអាងលើភស្តុតាងពូថៅដៃ និង អាវរបស់ជនសង្ស័យមានប្រឡាក់ឈាម ។
បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឲ្យដឹងទៀតថា នៅពេលនេះ សមត្ថកិច្ចស្រុកបាណន់ បានបញ្ជូនជនសង្ស័យមកកាន់ស្នងការដ្ឋាននគរបាលខេត្តបាត់ដំបងហើយ ដើម្បីសាកសួរបន្ថែម និងបន្តចាត់ការតាមនីតិវិធីច្បាប់ ៕
ចែករំលែកព័តមាននេះ