ខេត្តកំពង់ស្ពឺ ៖ បុរសម្នាក់ត្រូវបានកម្លាំងមូលដ្ឋានកងរាជអាវុធហត្ថឃាត់ខ្លួន ដោយសារតែរឿងសុំលុយមិនបាន តែងតែប្រើហិង្សាលើឪពុកម្តាយ រុះរើផ្ទះសម្បែង និងវាយបំផ្លាញម៉ូតូរងការខូចខាត រហូតម្តាយទ្រាំលែងបានក៏ទូរស័ព្ទប្តឹងទៅសមត្ថកិច្ចតែម្តង ។ ការឃាត់ខ្លួនកូនប្រុសបំផ្លាញទ្រព្យសម្បត្តិឪពុកម្តាយខ្លួនឯងនេះ…
ខេត្តកំពង់ស្ពឺ ៖ បុរសម្នាក់ត្រូវបានកម្លាំងមូលដ្ឋានកងរាជអាវុធហត្ថឃាត់ខ្លួន ដោយសារតែរឿងសុំលុយមិនបាន តែងតែប្រើហិង្សាលើឪពុកម្តាយ រុះរើផ្ទះសម្បែង និងវាយបំផ្លាញម៉ូតូរងការខូចខាត រហូតម្តាយទ្រាំលែងបានក៏ទូរស័ព្ទប្តឹងទៅសមត្ថកិច្ចតែម្តង ។
ការឃាត់ខ្លួនកូនប្រុសបំផ្លាញទ្រព្យសម្បត្តិឪពុកម្តាយខ្លួនឯងនេះ កាលពីថ្ងៃទី២៤ ខែសីហា ឆ្នាំ២០២៥ នៅក្នុងភូមិស្នោទី១ សង្កាត់រកាធំ ក្រុងច្បារមន ខេត្តកំពង់ស្ពឺ ។
មន្ត្រីកងរាជអាវុធហត្ថក្រុងច្បារមនបានឱ្យដឹងថា កាលពីវេលាម៉ោង១០និង៣០នាទីព្រឹក ថ្ងៃទី២៤ ខែសីហា ឆ្នាំ២០២៥ ដោយបានទទួលពាក្យបណ្តឹង តាមរយ:លេខអន្តរាគមន៍បន្ទាន់១២៩២ ពីឈ្មោះ ផាន់ សុីណាត ភេទស្រី អាយុ៦៧ឆ្នាំ មានទីលំនៅបច្ចុប្បន្នភូមិស្នោទី១ សង្កាត់រកាធំ ក្រុងច្បារមន ខេត្តកំពង់ស្ពឺ ។
ភ្លាមៗនោះ កម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំដោយលោកវរសេនីយ៍ត្រី ធី ឆៃ បានចុះទៅដល់កន្លែងកើតហេតុ នៅវេលាម៉ោង១០និង៥០នាទីថ្ងៃដដែល បានឃាត់ខ្លួនជនសង្ស័យឈ្មោះ បុិល ពិសី ភេទប្រុស អាយុ៣១ឆ្នាំ មុខរបរមិនពិតប្រាកដ មានទីលំនៅបច្ចប្បន្នភូមិស្នោទី១ សង្កាត់រកាធំ ក្រុងច្បារមន ខេត្តកំពង់ស្ពឺ ។ ជនសង្ស័យខាងលើ បានយកពូថៅវាយទៅលេីម៉ូតូម៉ាកហុងដាសេ១២៥ ស៊េរីឆ្នាំ២០២០ ពណ៌ខ្មៅ ពាក់ផ្លាកលេខ កំពង់ស្ពឺ ១R-៧៤៧៨ បណ្តាលឱ្យរងខូចខាតម៉ូតូ១គ្រឿង ។
មន្ត្រីកងរាជអាវុធហត្ថក្រុងច្បារមនបានបន្តថា កន្លងទៅជនសង្ស័យជាកូនប្រុសខាងលើ តែងតែធ្វើបាបឪពុកម្តាយ គំរាមកំហែង និងរុះរើផ្ទះសម្បែងថែមទៀតផង ដោយឪពុកម្តាយទ្រាំលែងបាន ក៏សម្រេចចិត្តដាក់ពាក្យបណ្តឹងឱ្យកម្លាំងកងរាជអាវុធហត្ថក្រុងច្បារមនឃាត់ខ្លួនតែម្តង ។
បច្ចុប្បន្ន ជនសង្ស័យជាកូនធ្វើបាបឪពុកម្តាយខាងលើ ត្រូវបានបញ្ជូនទៅកាន់ទីបញ្ជាការកងរាជអាវុធហត្ថខេត្ត ដើម្បីកសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ