រាជធានីភ្នំពេញ ៖ បុរសអ្នករើសអេតចាយម្នាក់ បានដុតធូបមូសនៅក្នុងផ្ទះ ក្រោយមកក៏បានចាកចេញទៅរើសអេតចាយ នៅខាងក្រៅ ដោយពុំបានពន្លត់ភ្លើងធូបមូសនោះឡើយ ជាហេតុធ្វើឲ្យភ្លើងធូបមូសនេះ ឆេះរាលដល់សម្ភារៈ ព្រមទាំងអេតចាយ…
រាជធានីភ្នំពេញ ៖ បុរសអ្នករើសអេតចាយម្នាក់ បានដុតធូបមូសនៅក្នុងផ្ទះ ក្រោយមកក៏បានចាកចេញទៅរើសអេតចាយ នៅខាងក្រៅ ដោយពុំបានពន្លត់ភ្លើងធូបមូសនោះឡើយ ជាហេតុធ្វើឲ្យភ្លើងធូបមូសនេះ ឆេះរាលដល់សម្ភារៈ ព្រមទាំងអេតចាយ ដែលភាគច្រើនគឺជាគ្រឿងជ័រទុកនៅក្នុងផ្ទះនោះសន្ធោសន្ធៅ រួមទាំងផ្ទះអស់ទាំងស្រុងតែម្ដង ។
ឧប្បត្តិហេតុនោះបានកើតឡើងបង្កឲ្យមានការភ្ញាក់ផ្អើលនៅវេលាម៉ោង៥ល្ងាចថ្ងៃទី២៧ ខែសីហា ឆ្នាំ២០៥ ហើយផ្ទះ ដែលភ្លើងឆាបឆេះនោះ មានទីតាំងស្ថិតនៅតាមបណ្ដោយផ្លូវ៥០ម៉ែត្រ ភូមិអន្លូងគងថ្មី សង្កាត់ព្រៃស ខណ្ឌដង្កោ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា ផ្ទះ១ខ្នងនោះ សាងសង់ពីឈើ បិទបាំងជញ្ជាំងស័ង្កសី និងប្រក់ដំបូលស័ង្កសីដែរ ហើយសង់នៅក្នុងដីឡូត៌មួយកន្លែងទំហំ ៨ម៉ែត្រ គុណនឹង១០ម៉ែត្រ ។ ផ្ទះនោះ ផ្ទុកទៅដោយអេតចាយ ដែលភាគច្រើន គឺជាគ្រឿងជ័រ ងាយនឹងឆាបឆេះខ្លាំងណាស់ ដោយឡែកបុរសម្ចាស់ផ្ទះឈ្មោះ ម៉ៅ អាយុ៤០ឆ្នាំ មុខរបររើសអេតចាយ ។
សមត្ថកិច្ចបានប្រាប់ឲ្យដឹងបន្តទៀតថា នៅមុនពេលកើតហេតុ បុរសជាម្ចាស់ផ្ទះខាងលើនេះ បានដុតធូបមូសនៅក្នុងផ្ទះរបស់ខ្លួន ហើយក្រោយមកគាត់ក៏ចាកចេញទៅរើសអេតចាយបាត់ដោយភ្លេចពន្លត់ភ្លើងធូបមូសនោះចេញ ។ លុះក្រោយមកក៏ស្រាប់តែភ្លើងធូបមូសបានឆេះរាលដល់សម្ភារៈនៅក្នុងផ្ទះ ហើយឆេះឆ្លងដល់អេតចាយ ព្រមទាំងផ្ទះទាំងមូលយ៉ាងសន្ធោសន្ធៅតែម្ដង ដោយអ្នកជិតខាងមិនអាចជួយពន្លត់ទាន់ឡើយ ។
សមត្ថកិច្ចបានបញ្ជាក់ប្រាប់បន្ថែមថា ខណៈនោះ ប្រជាពលរដ្ឋបានរាយការណ៍ទៅកាន់អាជ្ញាធរខណ្ឌដង្កោ ឲ្យជួយអន្តរាគមន៍ ដោយពួកគាត់មានការភិតភ័យខ្លាំងណាស់ ព្រោះខ្លាចឆេះរាលដល់ផ្ទះពួកគាត់ ដែលស្ថិតនៅក្បែរគ្នានោះ ហើយអ្នកខ្លះបានជញ្ជូនអីវាន់ចេញពីផ្ទះរបស់ខ្លួនថែមទៀតផង។ ក្រោយពេលទទួលបានដំណឹងនេះភ្លាម សមត្ថកិច្ច និងអាជ្ញាធរខណ្ឌដង្កោ បានចេញអន្តរាគមន៍ភ្លាមៗ ហើយក៏មានរថយន្តពន្លត់អគ្គិភ័យចំនួន៣គ្រឿង បានចេញទៅបាញ់ពន្លត់ ទើបភ្លើងរលត់ទៅវិញទាំងស្រុង មិនបានរាលដល់ផ្ទះផ្សេងទៀតឡើយ ៕
ចែករំលែកព័តមាននេះ