កិច្ចព្រមព្រៀងបង្កើតចំណងសម្ព័ន្ធមេត្រីភាពរវាងរាជធានីភ្នំពេញ និងរដ្ឋធានីវៀងចន្ទន៍
- ភ្នំពេញ
រាជធានីភ្នំពេញ ៖ កាលពីរសៀលថ្ងៃទី១៥ ខែកញ្ញា ឆ្នាំ២០២៥កន្លងទៅ ឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តម…
រាជធានីភ្នំពេញ ៖ កាលពីរសៀលថ្ងៃទី១៥ ខែកញ្ញា ឆ្នាំ២០២៥កន្លងទៅ ឯកឧត្តម ឃួង ស្រេង អភិបាលរាជធានីភ្នំពេញ និងឯកឧត្តម អាត់សាផាងថុង ស៊ីផាដុន អភិបាលរដ្ឋធានីវៀងចន្ទន៍ បានជួបសម្តែងការគួរសម និងចុះហត្ថលេខាលើកិច្ចព្រមព្រៀងស្តីពីការបង្កើតចំណងសម្ព័ន្ធមេត្រីភាពរវាងរាជធានីភ្នំពេញ នៃព្រះរាជាណាចក្រកម្ពុជា និងរដ្ឋធានីវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ ។
ពិធីចុះហត្ថលេខានេះ ប្រារព្ធធ្វើនៅសាលារាជធានីភ្នំពេញ ដើម្បីជំរុញឱ្យទំនាក់ទំនងកិច្ចសហប្រតិបត្តិការរវាង ទីក្រុងនៃប្រទេសទាំង២ កម្ពុជា និងឡាវ កាន់តែមានភាពរឹងមាំល្អប្រសើរមួយកម្រិតថែមទៀត ជាពិសេសជំរុញដល់វិស័យពាណិជ្ជកម្ម វិនិយោគ ទេសចរណ៍ និងផ្លាស់ប្តូរការអប់រំ និងវប្បធម៌ ព្រមទាំងវិស័យផ្សេងៗទៀត សម្រាប់ផលប្រយោជន៍របស់ភាគីទាំងពីរ ។ឯកឧត្ដម ឃួង ស្រេង នៅក្នុងឱកាសនោះ បានលើកឡើងពីភាពរីកចម្រើនរបស់ប្រទេសកម្ពុជា ក៏ដូចជារាជធានីភ្នំពេញ ដែលនៅពេលចុងក្រោយនេះ កម្ពុជាបានកសាងហេដ្ឋារចនាសម្ព័ន្ធជាច្រើន សម្រាប់អភិវឌ្ឍន៍ប្រទេសជាតិឲ្យកាន់តែរីកចម្រើនបន្ថែមទៀត ក្នុងនោះមានដូចជា ការស្ថាបនាព្រែកជីកហ្វូណនតេជោ ការកសាងស្ពានឆ្លងកាត់ទន្លេមេគង្គ ការស្តារទន្លេ ការកសាងអាកាសយានដ្ឋានអន្តរជាតិតេជោ ដែលបានដាក់ឲ្យដំណើរការកាលពីប៉ុន្មានថ្ងៃកន្លងទៅនេះជាដើម ។
កឧត្ដម ឃួង ស្រេង បានបញ្ជាក់ថា រាជធានីភ្នំពេញបានទទួលភ្ញៀវទេសចរប្រមាណ១០លាននាក់នៅក្នុងឆ្នាំ២០២៤ ដែលនេះពិតជាបានបង្ហាញឱ្យឃើញពីការកើនឡើងភ្ញៀវទេសចរ បើប្រៀបធៀបទៅនឹងឆ្នាំ២០២៣ ។ដើម្បីជំរុញឱ្យវិស័យទេសចរណ៍កាន់តែមានការកើនឡើងថែមទៀត រដ្ឋបាលរាជធានីភ្នំពេញ បានបង្កើតឱ្យមានផ្លូវថ្មើរជើងចតុមុខ ។ ផ្លូវថ្មើរជើងថ្មីនេះ បានទទួលភ្ញៀវទេសចរជាតិ-អន្តរជាតិ ក្នុងមួយថ្ងៃប្រមាណ៨មុឺនទៅ១០ម៉ឺននាក់សម្រាប់ថ្ងៃសៅរ៍ និងថ្ងៃអាទិត្យ រហូតធ្វើឱ្យរាជធានីភ្នំពេញជាប់ចំណាត់ថ្នាក់លេខ២លើពិភពលោក ឈ្មោះថាជាទីក្រុងប្រជុំដោយភាពរីករាយនៅពេលរាត្រី ។
ឯកឧត្តម អាត់សាផាងថុង ស៊ីផាដុន អភិបាលរដ្ឋធានីវៀងចន្ទន៍ បានសម្ដែងនូវការសាទរចំពោះការរីកចម្រើនរបស់រាជធានីភ្នំពេញ ដោយឯកឧត្តមបានលើកឡើងថា រាជធានីភ្នំពេញ មានការរីកចម្រើនល្អណាស់ ហើយនៅតាមបណ្ដាខេត្តក៏មានការរីកចម្រើនព្រមៗគ្នាដែរ ។ ឯកឧត្តមបន្តថា ទំនាក់ទំនងកិច្ចសហប្រតិបត្តិការរវាងកម្ពុជានិងឡាវ គឺកាន់តែមានភាពល្អប្រសើរ ដោយថ្មីៗនេះ ថ្នាក់ដឹកនាំកំពូលនៃប្រទេសកម្ពុជា បានទៅធ្វើទស្សនកិច្ចនៅប្រទេសឡាវ ហើយរដ្ឋមន្ត្រីក្រសួងការបរទេសរបស់ប្រទេសឡាវ ក៏បានមកបំពេញទស្សនៈកិច្ចនៅប្រទេសកម្ពុជាដែរ ។ នេះជាការពូនជ្រំទំនាក់ទំនងនៃប្រទេសទាំងពីរឲ្យកាន់តែល្អប្រសើរ និងកាន់តែមានភាពរឹងមាំបន្ថែមទៀត ។ក្នុងឱកាសនោះ ឯកឧត្តម អាត់សាផាងថុង ស៊ីផាដុន ក៏បានអញ្ជើញឯកឧត្ដម ឃួង ស្រេង ដឹកនាំប្រតិភូរដ្ឋបាលរាជធានីភ្នំពេញ ទៅបំពេញទស្សនកិច្ចនៅទីក្រុងវៀងចន្ទន៍ផងដែរ ។
ជាការឆ្លើយតប ឯកឧត្ដម ឃួង ស្រេង បានបញ្ជាក់ថា តបតាមការអញ្ជើញនេះ ឯកឧត្ដម នឹងពិនិត្យលទ្ធភាពទៅបំពេញទស្សនកិច្ចនៅទីក្រុងវៀងចន្ទន៍ នៅពេលវេលាណាមួយសមស្របខាងមុខនេះ ។ សូមជម្រាបថា រាជធានីភ្នំពេញ និងរដ្ឋធានីវៀងចន្ទន៍ ធ្លាប់បានចុះហត្ថលេខាចងសម្ព័ន្ធមេត្រីភាពជាមួយគ្នាម្តងរួចហេីយ កាលពីថ្ងៃទី៦ ខែកុម្ភៈ ឆ្នាំ២០១៤ កន្លងមក ។ ការចុះកិច្ចព្រមព្រៀងចងសម្ព័ន្ធមេត្រីភាពឡើងវិញនៅថ្ងៃនេះធ្វើឡើងក្រោយពីទទួលបានគោលការណ៍ឯកភាពពីសម្តេចធិបតី ហ៊ុន ម៉ាណែត នាយករដ្ឋមន្ត្រី និងឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាពេលថ្មីៗនេះ តាមរយៈការស្នើសុំរបស់រដ្ឋបាលរាជធានីភ្នំពេញ ដេីម្បីឆ្លើយតបនឹងភាពរីកចម្រើន និងការអភិវឌ្ឍគ្រប់វិស័យរបស់រាជធានីភ្នំពេញ និងទីក្រុងវៀងចន្ទន៍ នាពេលបច្ចុប្បន្ននេះ ។
អ្វីដែលត្រូវកត់សម្គាល់រួមមាន ៖១-កិច្ចព្រមព្រៀងកន្លងមក គឺដេីម្បីផ្លាស់ប្ដូរគណៈប្រតិភូជាន់ខ្ពស់របស់ភាគីទាំង២ តែពេលនេះ ការផ្លាស់ប្តូរគណៈប្រតិភូនឹងធ្វើឡើងគ្រប់កម្រិត ទាំងគណៈប្រតិភូជាន់ខ្ពស់ មន្ដ្រីជំនាញ និងប្រតិភូគ្រប់វិស័យ ។ ២-ភាគីទាំងពីរនឹងសហការគ្នា លើការផ្លាស់ប្ដូរប្រជាជននិងប្រជាជន ការផ្លាស់ប្ដូរព័ត៌មាន ដូចជា ទីក្រុងវៃឆ្លាត ចំណេះដឹងឌីជីថល និងកិច្ចប្រជុំបណ្តាញនានា ។ ៣-ភាគីទាំងពីរ នឹងផ្តល់ការគាំទ្រ និងសម្របសម្រួលដល់មន្ទីរ អង្គភាពពាក់ព័ន្ធ នៃរដ្ឋធានីវៀងចន្ទន៍ និងរាជធានីភ្នំពេញ ព្រមទាំងជំរុញដល់វិស័យពាណិជ្ជកម្ម វិនិយោគ ទេសចរណ៍ និងផ្លាស់ប្តូរការអប់រំ និងវប្បធម៌ ព្រមទាំងវិស័យផ្សេងៗទៀត សម្រាប់ផលប្រយោជន៍របស់ភាគីទាំងពីរ ។ ៤-ប្រសិនបើមានភាពខុសគ្នាកើតឡើង ក្នុងការបកស្រាយ ឬអនុវត្តកិច្ចព្រមព្រៀងនេះ ត្រូវដោះស្រាយដោយមិត្តភាព តាមរយៈការពិគ្រោះយោបល់រវាងភាគីទាំងពីរ ។ ៥-រាល់អត្ថបទទាំងឡាយណាដែលមានខ្លឹមសារផ្ទុយពីកិច្ចព្រមព្រៀងនេះ ត្រូវទុកជានិរាករណ៍ ដោយស្ថិតក្រោមច្បាប់គ្រប់គ្រង និងបទប្បញ្ញត្តិនៃប្រទេសទាំងពីរ ៕
ចែករំលែកព័តមាននេះ