ទីក្រុងហ្សាការតា ៖ អំឡុងឆ្នាំដំបូងនៃការដឹកនាំរបស់ប្រធានាធិបតី ប្រាបូវូ ស៊ូប៊ៀនតូ (Prabowo Subianto) ប្រទេសឥណ្ឌូណេស៊ីយកបានមកវិញដោយជោគជ័យ នូវទឹកប្រាក់ចំនួន ១,៧ទ្រីលានរូពី…
ទីក្រុងហ្សាការតា ៖ អំឡុងឆ្នាំដំបូងនៃការដឹកនាំរបស់ប្រធានាធិបតី ប្រាបូវូ ស៊ូប៊ៀនតូ (Prabowo Subianto) ប្រទេសឥណ្ឌូណេស៊ីយកបានមកវិញដោយជោគជ័យ នូវទឹកប្រាក់ចំនួន ១,៧ទ្រីលានរូពី ឬ ១០២,៥លានដុល្លារអាមេរិកពីករណីកិបកេងថវិការដ្ឋពី សំណាក់បណ្តាជនសង្ស័យប្រព្រឹត្តអំពើពុករលួយ។ នេះបើតាមប្រភពពីសារព័ត៌មាន Vietnam Plus ចេញផ្សាយនៅថ្ងៃទី២១ ខែតុលា ឆ្នាំ២០២៥។
យោងតាមរបាយការណ៍ស្រាវជ្រាវឆ្នាំទី១ នៃរដ្ឋបាលលោក ប្រាបូវូ ស៊ូប៊ៀនតូ ដោយទីភ្នាក់ងារស្រាវជ្រាវ និងបោះពុម្ពផ្សាយ NEXT Indonesia កាលពីនៅថ្ងៃទី១៨ ខែតុលា ឆ្នាំ២០២៥ បានឱ្យដឹងថា ទឹកប្រាក់សរុបទទួលបានពីការរឹបអូសយកពីមូលនិធិដែលត្រូវបានកេងប្រវ័ញ្ច ក៏ដូចជាការដេញថ្លៃវត្ថុដែលត្រូវបានរឹបអូស និងការស្ដារឡើងវិញនូវតំបន់ព្រៃឈើ។ NEXT Indonesia បានអះអាងថា ក្នុងរយៈពេលដូចគ្នានេះ អំពើពុករលួយចំនួន ៤៣ ករណី ត្រូវបានស៊ើបអង្កេតដោយគណកម្មាធិការលុបបំបាត់អំពើពុករលួយ (KPK) និងការិយាល័យអគ្គមេធាវី ដោយបានជួយការពារការបាត់បង់ថវិការដ្ឋរហូតដល់ ១៩,៣ពាន់លានដុល្លារ។
ទីភ្នាក់ងារនេះបានរាយការណ៍ថា អំពើពុករលួយក្នុងការគ្រប់គ្រងប្រេងឆៅនៅក្រុមហ៊ុនរដ្ឋ Pertamina អំឡុងពេល ២០១៨-២០២៣ គឺជាករណីពុករលួយដ៏ធំបំផុត ដែលត្រូវបានស៊ើបអង្កេតដោយរដ្ឋាភិបាល ព្រោះវាបណ្តាលឱ្យមានការខាតបង់ដែលអាចកើតមានប្រមាណ ១៧,១ពាន់លានដុល្លារ។
លោកប្រធានាធិបតី ប្រាបូវូ ស៊ូប៊ៀនតូ បានប្រាប់ប្រធាន និងជានិពន្ធនាយកក្រុមហ៊ុន Forbes Media លោក Steve Forbes ថា ការគិតរបស់លោក អំពើពុករលួយគឺជាជំងឺមួយ ដែលនឹងឈានដល់ដំណាក់កាលទី៤ ដូចជា ជំងឺមហារីកដែរ។ លោកបានបន្តថា តាមការអាន និងសិក្សាប្រវត្តិសាស្ត្ររបស់លោក អំពើពុករលួយនឹងបំផ្លាញប្រទេសជាតិ ប្រជាជាតិ និងរបបដឹកនាំ។
លោកប្ដេជ្ញាថានឹងព្យាយាមកាត់បន្ថយអំពើពុករលួយក្នុងប្រទេសរបស់លោក ហើយពេលខ្លះ មធ្យោបាយតែមួយគត់ គឺត្រូវធ្វើសកម្មភាពជាឧទាហរណ៍គំរូមួយ៕ ប្រភព ៖ Vietnam Plus
ចែករំលែកព័តមាននេះ