ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី បានអំពាវនាវទៅបណ្ដាប្រទេសនៅប៉ែកអឺរ៉ុបសូមផ្ដល់ខែលការពារដែនអាកាសបន្ថែមទៀតដើម្បីទប់ទល់នឹងការវាយប្រហាររបស់រុស្ស៊ី។ ថ្មីៗនេះរុស្ស៊ីវាយប្រហារទីក្រុងហ្សាប៉ូរីហ្សៀបណ្ដាលឱ្យរបួសមនុស្ស១៣នាក់។ លោកហ្សេឡិនស្គីស្នើសុំឱ្យថ្នាក់ដឹកនាំអឺរ៉ុបបង្កើតប្រព័ន្ធសុវត្ថិភាពសម្រាប់ទ្វីបនេះទាំងមូលដោយបង្កើតសំណាញ់មេឃាទ្រង់ទ្រាយធំទើបអាចទប់ទល់បាន។
ចាប់តាំងពីសង្គ្រាមអ៊ុយក្រែនផ្ទុះឡើងដំបូង រុស្ស៊ីពុំដែលបន្ធូរដៃម្ដងណាឡើយក្នុងការវាយសង្គ្រប់ទៅលើអ៊ុយក្រែន។ ជាពិសេសទីតាំងរបស់ជនស៊ីវិល។ តាមមើលទៅ កិច្ចព្រមព្រៀងសន្តិភាពដើម្បីបញ្ចប់សង្គ្រាមហាក់ដូចជានៅឆ្ងាយហួសជើងមេឃនៅឡើយទេទោះបីលោកត្រាំខិតខំប្រើប្រាស់វិធានការសរុបទាំងការប្រើប្រាស់ភាសាទន់ភ្លន់ និងភាសាទ្រគោះបោះបោកដាក់មេដឹកនាំអ៊ុយក្រែន និងរុស្ស៊ីយ៉ាងណាក្ដី។ គោលបំណងរបស់លោកចង់ឃើញការបញ្ចប់សង្គ្រាមឆាប់ៗ។
លោកត្រាំធ្លាប់ព្រមានចាត់វិធានការក្ដៅម្ដងជាពីរដងរួចមកហើយបើសិនភាគីទាំង២មិនអាចសម្រេចបានកិច្ចព្រមព្រៀងនៅក្នុងរយៈពេលកំណត់ណាមួយ។ ប៉ុន្តែជាការឥតប្រយោជន៍ព្រោះបន្ទាប់ពីឱសានវាទទាំងនោះកន្លងផុតទៅ រុស្ស៊ីនៅតែមិនធ្វើតាមការព្រមាននោះដដែល។ ឧទាហរណ៍ លោកត្រាំព្រមានថាក្រោយពេលជួបគ្នានៅអាឡាស់ស្កា២សប្ដាហ៍ បើរុស្ស៊ីមិនធ្វើអ្វីម៉្យាងទេ លោកនឹងដាក់ទណ្ឌកម្ម។ ប៉ុន្តែនៅទីបញ្ចប់ លោកមិនបានធ្វើដូចការសន្យាទេ។
លោកហ្សេឡិនស្គីបង្ហោះសារនៅលើតេឡេក្រាមថារយៈពេលជាង២សប្ដាហ៍ចុងក្រោយនេះ រុស្ស៊ីវាយប្រហារអ៊ុយក្រែនដោយដ្រូនជាង៣៥០០គ្រឿង, គ្រាប់បែកបញ្ជាពីចម្ងាយ២៥០០គ្រាប់ និងមីស៊ីលជិត២០០គ្រាប់។ គ្រាប់បែកបញ្ជាពីចម្ងាយរបស់រុស្ស៊ីច្រើនទម្លាក់ពីលើយន្តហោះនៅរយៈកម្ពស់ដ៏សែនខ្ពស់ និងឆ្ងាយពីសមរភូមិប្រយុទ្ធ។
ការដែលរុស្ស៊ីបញ្ជូនដ្រូនទៅវាយប្រហារម្ដងៗច្រើនដល់រាប់រយគ្រឿងធ្វើឱ្យប្រព័ន្ធការពារដែនអាកាសរបស់អ៊ុយក្រែនពិបាកចាត់ការ។ ជានិច្ចកាល គ្រាប់បែកបញ្ជាពីចម្ងាយទម្លាក់មិនសូវចំគោលដៅល្អទេ។ មិនតែប៉ុណ្ណោះវាបង្កើតជារណ្ដៅ ឬក្រហូងធំៗនៅលើដី។ អ៊ុយក្រែនមិនអាចវាយបកទៅលើគ្រាប់បែកប្រភេទនេះប្រកបដោយប្រសិទ្ធភាពនៅឡើយទេ។
ឥឡូវនេះ គេឮតែអ៊ុយក្រែនរងការវាយប្រហារឡើងសាំត្រចៀកទៅហើយ។ ប៉ុន្តែអ្វីដែលថ្មីគឺប៉ូឡូញរងការរំលោភបំពានដែនអាកាសខណៈដែលប្រទេសនេះជាសមាជិកពេញសិទ្ធិរបស់អង្គការណាតូ។ ហេតុនេះ ណាតូចាប់ផ្ដើមពង្រឹងប្រព័ន្ធការពារដែនអាកាសនៅទ្វីបអឺរ៉ុបជាបណ្ដើរៗហើយ។ លោកហ្សេឡិនស្គីយល់ថានេះជាពេលដែលត្រូវពង្រឹងការការពារដែនអាកាសរួមគ្នានៅក្នុងចំណោមប្រទេសប៉ែកអឺរ៉ុប។ លោកថាអឺរ៉ុបមានបច្ចេកវិទ្យាសម្រាប់ដោះស្រាយបញ្ហានេះ។ យើងត្រូវការការវិនិយោគ និងឆន្ទៈក្នុងការធ្វើរឿងនេះ។ យើងត្រូវតែចាត់វិធានការប្រកបដោយភាពម៉ឺងម៉ាត់ និងការសម្រេចចិត្តពីគ្រប់ប្រទេសជាដៃគូ។
ក្រឡេកទៅមើលសមរភូមិនៅហ្សាប៉ូរីហ្សៀឯណោះវិញ រុស្ស៊ីវាយប្រហារអគារជាងម្ភៃខ្នងបណ្ដាលឱ្យមានភ្លើងឆេះ។ នេះបើតាមអ្វីដែលលោកអ៊ីវ៉ាន ហ្វេដូរ៉ូស (Ivan Fedorov) ជាអភិបាលតំបន់នេះថ្លែងប្រាប់ទូរទស្សន៍ជាតិ។ លោកថ្លែងបន្តទៀតថាការវាយប្រហាររបស់រុស្ស៊ីធ្វើឱ្យខូចខាតយ៉ាងដំណំកាលពីថ្ងៃទី៣០ ខែសីហាមិនទាន់បានជួសជុលឱ្យស្អាតឡើងវិញផង។ ឥឡូវនេះរុស្ស៊ីវាយប្រហារថែមទៀត។ ខាងលើនេះជាការដកស្រង់ប្រភពពីអេភី (AP) និងប្រភពដទៃទៀត៕
ចែករំលែកព័តមាននេះ