ខេត្តសៀមរាប ៖ មន្ត្រីជានខ្ពស់ក្រសួងសាធារណការ និងដឹកជញ្ជូន បានអំពាវនាវដល់អ្នកធ្វើអាជីវកម្មដឹកជញ្ជូនតាមផ្លូវគោកទាំងអស់ ឱ្យមានការគោរពច្បាប់ ដោយមិនត្រូវដឹកទំនិញលើសទម្ងន់ ដែលច្បាប់កំណត់នោះទេ ព្រោះការដឹកជញ្ជូនលើសទំងន់គឺមិនមែនមានតែផលប៉ះពាល់ដល់ផ្លូវប៉ុណ្ណោះទេ ប៉ុន្តែប៉ះពាល់ដល់សុវត្ថិភាពអាយុជីវិត…
ខេត្តសៀមរាប ៖ មន្ត្រីជានខ្ពស់ក្រសួងសាធារណការ និងដឹកជញ្ជូន បានអំពាវនាវដល់អ្នកធ្វើអាជីវកម្មដឹកជញ្ជូនតាមផ្លូវគោកទាំងអស់ ឱ្យមានការគោរពច្បាប់ ដោយមិនត្រូវដឹកទំនិញលើសទម្ងន់ ដែលច្បាប់កំណត់នោះទេ ព្រោះការដឹកជញ្ជូនលើសទំងន់គឺមិនមែនមានតែផលប៉ះពាល់ដល់ផ្លូវប៉ុណ្ណោះទេ ប៉ុន្តែប៉ះពាល់ដល់សុវត្ថិភាពអាយុជីវិត និងសេដ្ឋកិច្ចសង្គមទាំងមូល ។ នេះបើយោងតាមផេក មន្ទីរព័ត៌មានខេត្តសៀមរាប បានប្រកាសនារសៀលថ្ងៃទី១៦ ខែកញ្ញានេះ ។
ក្នុងកិច្ចប្រជុំផ្សព្វផ្សាយអំពីច្បាប់ និងលិខិតបទដ្ឋានគតិយុត្តនានា ពាក់ព័ន្ធនឹងការដឹកជញ្ជូនលើសទម្ងន់កម្រិតកំណត់ ជូនអ្នកពាក់ព័ន្ធក្នុងខេត្តសៀមរាប នាថ្ងៃទី១៦ ខែកញ្ញា ឆ្នាំ២០២៥ ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៍ថា ការដឹកលើសទម្ងន់នៅតែជាបញ្ហាប្រឈម ខណៈដែលសមត្ថកិច្ចពាក់ព័ន្ធបានខិតខំគ្រប់វិធីសាស្ត្រនៅក្នុងការទប់ស្កាត់ ដូចជា ការផ្សព្វផ្សាយអប់រំអំពីច្បាប់ លិខិតបទដ្ឋានគតិយុត្តនានាដែលពាក់ព័ន្ធ ការចាប់ពិន័យជាថវិកា ការដកហូតយានយន្តទុកជាដើម ដែលវិធានការទាំងអស់នេះ ឃើញថាបញ្ហាដឹកលើសទម្ងន់នេះមានការថមថយចុះជាបណ្តើរៗ។
ឯកឧត្តម សេង ឈួន បន្តថា ការដឹកលើសទម្ងន់វាបានជះឥទ្ធិពលអាក្រក់ ក្រៅពីការបំផ្លាញផ្លូវថ្នល់ វាបានបង្កជាផលប៉ះពាល់ដល់សុវត្ថិភាពអាយុជីវិតប្រជាជន និងសេដ្ឋកិច្ចសង្គមជាតិទាំងមូល ។ បើទោះបីជាយ៉ាងនេះក្តី រាជរដ្ឋាភិបាលកម្ពុជា នៅតែរក្សាឥរិយាបថទន់ភ្លន់នៅក្នុងការផ្សព្វផ្សាយអប់រំដល់ប្រជាពលរដ្ឋអំពីច្បាប់គតិយុត្តនានា ដោយសំដៅធ្វើយ៉ាងណាមិនឲ្យប៉ះពាល់ដល់ការប្រកបអាជីវកម្មទទួលទានចិញ្ចឹមជីវិតរបស់ប្រជាពលរដ្ឋ ។
លោក ឌី រ៉ាដូ អភិបាលរងខេត្ដសៀមរាប បានណែនាំដល់មន្ដ្រីជំនាញពាក់ព័ន្ធនឹងវិស័យដឹកជញ្ជូននៅក្នុងខេត្ដសៀមរាបទាំងអស់ ត្រូវក្ដាប់ឲ្យបាននូវទិន្នន័យនៃការដឹកជញ្ជូនរបស់រថយន្ដធន់ធ្ងន់លើសកម្រិត និងចាត់វិធានការណ៍ទៅតាមផ្លូវច្បាប់ចំពោះរថយន្តណាដែលផ្ទុកលើសទម្ងន់កម្រិតកំណត់ ។
ជាមួយគ្នានេះ ក៏សូមអ្នកពាក់ព័ន្ធ ទាំងអស់ត្រូវយកចិត្តទុកដាក់គោរពច្បាប់ ស្ដីពីចរាចរណ៍ផ្លូវគោកឱ្យបានខ្ជាប់ខ្ជួន សំដៅរួមគ្នាកាត់បន្ថយគ្រោះថ្នាក់ចរាចរណ៍ឲ្យមកនៅកម្រិតទាប ដែលនេះគឺជាផ្នែកមួយដ៏សំខាន់ ដើម្បីឈានទៅចូលរួមលុបបំបាត់សកម្មភាពអនាធិបតេយ្យនៃការធ្វើចរាចរណ៍តាមដងផ្លូវសាធារណៈ និងជំរុញការអនុវត្តច្បាប់ឲ្យទទួលបានលទ្ធផលជាវិជ្ជមាន។
លោក លឿម រស្មី ប្រធានមន្ទីរសាធារណការ និងដឹកជញ្ជូនខេត្តសៀមរាប បានឱ្យដឹងថា ក្នុងឆមាសទី១ ឆ្នាំ២០២៥ ការអនុវត្តច្បាប់អនុគណៈកម្មការសុវត្ថិភាពចារចរណ៍ផ្លូវគោកខេត្តសៀមរាប បានត្រួតពិនិត្យយានយន្តសរុប១ ០២២គ្រឿង ក្នុងនោះរថយន្តខុសលក្ខណៈបច្ចេកទេស២៩៤គ្រឿង ៕
ចែករំលែកព័តមាននេះ