អភិបាលរងខេត្តតាកែវ ជំរុញឱ្យគ្រប់មន្ទីរ-អង្គភាព ពន្លឿនការធ្វើបណ្ណកម្មសិទ្ធិលើអចលនទ្រព្យរដ្ឋ
ខេត្តតាកែវ ៖ ក្រសួងមហាផ្ទៃបានប្រកាសនារសៀលថ្ងៃទី១៦ ខែកញ្ញា ឆ្នាំ២០២៥នេះថា ៖ លោក ម៉ម កាយ អភិបាលរងខេត្តតាកែវ…
ខេត្តតាកែវ ៖ ក្រសួងមហាផ្ទៃបានប្រកាសនារសៀលថ្ងៃទី១៦ ខែកញ្ញា ឆ្នាំ២០២៥នេះថា ៖ លោក ម៉ម កាយ អភិបាលរងខេត្តតាកែវ បានជំរុញឱ្យគ្រប់មន្ទីរ អង្គភាព រដ្ឋបាលក្រុង-ស្រុក និងឃុំ-សង្កាត់ទាំងអស់ ត្រូវយកចិត្តទុកដាក់ពន្លឿនការធ្វើបណ្ណកម្មសិទ្ធិលើអចលនទ្រព្យរបស់រដ្ឋដែលខ្លួនកំពុងគ្រប់គ្រង ដើម្បីធានាប្រសិទ្ធភាពក្នុងការគ្រប់គ្រងទ្រព្យសម្បត្តិរដ្ឋឱ្យបានត្រឹមត្រូវ និងទាន់ពេលវេលា ។
ការថ្លែងជំរុញនេះ បានធ្វើឡើងនៅក្នុងកិច្ចប្រជុំស្តីពីការពិនិត្យ និងវាយតម្លៃលើការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋប្រចាំឆ្នាំ២០២៤ ដែលប្រារព្ធធ្វើនៅវិទ្យាស្ថានពហុបច្ចេកទេសភូមិភាគតេជោសែនតាកែវ កាលពីព្រឹកថ្ងៃអង្គារ ទី១៦ ខែកញ្ញា ឆ្នាំ២០២៥ ។ កិច្ចប្រជុំនេះ មានការចូលរួមពីលោក យូទី អគ្គនាយករងវិទ្យាស្ថានសេដ្ឋកិច្ចនិងហិរញ្ញវត្ថុ និងមន្ត្រីពាក់ព័ន្ធសរុបជាង ៥០០នាក់ ។
លោកអភិបាលរងខេត្ត បានកត់សម្គាល់ថា មន្ទីរ-អង្គភាព និងរដ្ឋបាលមូលដ្ឋានមួយចំនួននៅមានបញ្ហាប្រឈម ពាក់ព័ន្ធនឹងការគ្រប់គ្រងអចលនទ្រព្យរដ្ឋ ដែលបណ្តាលឱ្យលទ្ធផលនៃការងារចុះបញ្ជីនៅមិនទាន់បានល្អប្រសើរនៅឡើយ ។ បញ្ហានេះរួមមាន ដីមួយចំនួននៅមិនទាន់បានចុះក្នុងបញ្ជីសារពើភណ្ឌ និងដីខ្លះទៀតបានចុះបញ្ជីហើយ តែមិនទាន់បានស្នើសុំធ្វើបណ្ណកម្មសិទ្ធិ។
ដើម្បីដោះស្រាយបញ្ហាប្រឈមទាំងនេះ លោក ម៉ម កាយ បានស្នើឱ្យមន្ទីរ-អង្គភាព និងរដ្ឋបាលថ្នាក់ក្រោមជាតិទាំងអស់ សហការដាក់ពាក្យស្នើសុំចុះបញ្ជី និងធ្វើបណ្ណកម្មសិទ្ធិលើដីរដ្ឋដែលខ្លួនកាន់កាប់ ទៅកាន់មន្ទីររៀបចំដែនដី នគរូបនីយកម្ម សំណង់ និងសុរិយោដី ។
ជាមួយគ្នានេះ ក៏ត្រូវធ្វើការជម្រះបញ្ជី ឬកែតម្រូវឯកសារឱ្យបានត្រឹមត្រូវ ដើម្បីសម្រេចបាននូវលទ្ធផល ១០០% ទាំងការងារបញ្ជីសារពើភណ្ឌ និងការចុះបញ្ជីធ្វើបណ្ណកម្មសិទ្ធិក្នុងឆ្នាំ ២០២៥ នេះ ។
លោកក៏បានបន្ថែមថា គ្រប់មន្ទីរ-អង្គភាព និងរដ្ឋបាលពាក់ព័ន្ធត្រូវធ្វើរបាយការណ៍បច្ចុប្បន្នភាពស្តីពីការចុះបញ្ជីដីធ្លីរបស់ខ្លួនទៅមន្ទីរសេដ្ឋកិច្ច និងហិរញ្ញវត្ថុខេត្ត ដើម្បីឱ្យមន្ទីរមានមូលដ្ឋានរាយការណ៍ជូនថ្នាក់ដឹកនាំ៕
ចែករំលែកព័តមាននេះ