រយៈពេល៣ថ្ងៃចុងក្រោយនេះ រថយន្តជាង៤ម៉ឺន ៥ពាន់គ្រឿងចូលទស្សនាអាកាសយានដ្ឋានអន្តរជាតិតេជោ
រាជធានីភ្នំពេញ ៖ រយៈពេល៣ថ្ងៃចុងក្រោយនេះ ពោលគិតចាប់ពីម៉ោង៦ព្រឹក ថ្ងៃទី១៣ ខែកញ្ញា ដល់ម៉ោង៦ព្រឹក ថ្ងៃទី១៥ ខែកញ្ញា ឆ្នាំ២០២៥…
រាជធានីភ្នំពេញ ៖ រយៈពេល៣ថ្ងៃចុងក្រោយនេះ ពោលគិតចាប់ពីម៉ោង៦ព្រឹក ថ្ងៃទី១៣ ខែកញ្ញា ដល់ម៉ោង៦ព្រឹក ថ្ងៃទី១៥ ខែកញ្ញា ឆ្នាំ២០២៥ យ៉ាងហោចណាស់ មានរថយន្តរបស់បងប្អូនប្រជាពលរដ្ឋចំនួន៤៥ ៦០៦គ្រឿងបានចូលទស្សនា អាកាសយានដ្ឋានអន្តរជាតិតេជោ ដែលសមិទ្ធផលថ្មីដ៏អស្ចារ្យរបស់កម្ពុជា ។ ចំនួនទាំងនេះ រាប់តែរថយន្ត មិនទាន់រាប់ម៉ូតូកង់៣ និងម៉ូតូនៅឡើយទេ ។
សូមជម្រាបថា អាកាសយានដ្ឋានអន្តរជាតិតេជោ ដែលបានឱ្យដំណើរការ កាលពីថ្ងៃទី៩ ខែកញ្ញា ឆ្នាំ២០២៥ ទទួលបានការចាប់អារម្មណ៍យ៉ាងខ្លាំងពីភ្ញៀវជាតិ និងអន្តរជាតិ ដោយសារមានទំហំធំ និងរចនាបទដ៏ស្រស់ស្អាត ។
អាកាសយានដ្ឋាននេះ ត្រូវបានអនុញ្ញាតឱ្យសាធារណជនចូលទស្សនាដោយសេរី និងមិនគិតថ្លៃចំណតសម្រាប់យានយន្តគ្រប់ប្រភេទឡើយ សម្រាប់រយៈពេល១សប្តាហ៍ ចាប់ពីថ្ងៃទី៩ ដល់ ថ្ងៃទី១៥ ខែកញ្ញា ឆ្នាំ២០២៥ ។
តាមការបញ្ជាក់របស់អ្នកនាំពាក្យក្រសួងអាកាសចរស៊ីវិលកម្ពុជា បានឲ្យដឹងថា ចាប់ពីថ្ងៃទី១៦ ខែកញ្ញាតទៅ ចំណតយានយន្តគ្រប់ប្រភេទ (កង់ ម៉ូតូ ឡាន) នៅអាកាសយានដ្ឋានអន្តរជាតិតេជោ នឹងគិតប្រាក់ទៅតាមម៉ោងកំណត់ ។
ជាមួយគ្នានេះទាំងក្រុមហ៊ុនវិនិយោគ និងអាកាសចរស៊ីវិល បង្ហាញការសប្បាយរីករាយ ដែលបានឃើញប្រជាពលរដ្ឋខ្មែរ ចាប់អារម្មណ៍ និងចង់ទស្សនាអាកាសយានដ្ឋានអន្តរជាតិតេជោ ដ៏អស្ចារ្យនេះ ។ តែយ៉ាងណា សូមអំពាវនាវដល់ប្រជាពលរដ្ឋ សូមមេត្តារក្សាសណ្តាប់ធ្នាប់ឱ្យបានល្អ ស្តាប់ការសមត្ថកិច្ចដែលរៀបចំសណ្តាប់ធ្នាប់ ធ្វើយ៉ាងណាកុំប៉ះពាល់ដល់ភ្ញៀវ ដែលត្រូវធ្វើដំណើរតាមផ្លូវអាកាសចេញចូលកម្ពុជា ៕
ចែករំលែកព័តមាននេះ