ខេត្តកំពង់ស្ពឺ ៖ ផាវគ្រាប់បែក និងគ្រឿងរំសេវផ្ទុះ ដែលតែងតែបង្កគ្រោះថ្នាក់ដល់អ្នកលេង ជាពិសេសក្មេងៗនោះ ត្រូវបាននគរបាលស្រុកសំរោងទង ធ្វើការសហការ ដកហូតប្រមូលពីក្រុមអ្នកលួចលក់ លួចលាក់បានប្រមាណ២៨៥គ្រាប់…
ខេត្តកំពង់ស្ពឺ ៖ ផាវគ្រាប់បែក និងគ្រឿងរំសេវផ្ទុះ ដែលតែងតែបង្កគ្រោះថ្នាក់ដល់អ្នកលេង ជាពិសេសក្មេងៗនោះ ត្រូវបាននគរបាលស្រុកសំរោងទង ធ្វើការសហការ ដកហូតប្រមូលពីក្រុមអ្នកលួចលក់ លួចលាក់បានប្រមាណ២៨៥គ្រាប់ ដើម្បីកំទេចចោល។
ការដើរប្រមូលផាវគ្រាប់បែក និងគ្រឿងរំសេវផ្ទុះ ពីអ្នកលួចលក់ដូរនេះដោយបានការដឹកនាំបញ្ជាដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កងកម្លាំងនគរបាលទូទាំងស្រុកសំរោងទង បានចុះពិនិត្យនិងណែនាំដល់បងប្អូនអាជីវករលក់ដូរទំនិញគ្រប់ប្រភេទ មានទាំងអ្នកលក់របស់ដែលច្បាប់ហាមឃាត់ដូចជាគ្រឿងផ្ទុះមួយចំនួនដែលជា រំសេវផ្ទុះអាចបង្កឱ្យមានគ្រោះថ្នាក់។
បើយោងតាមការឱ្យដឹងពីលោក វរសេនីយ៍ឯក ឃុត សុផល អធិការនគរបាលស្រុកសំរោងទង បានបញ្ជាក់ថា÷ក្រោយមានការណែនាំបន្ថែមពីលោកឧត្ដមសេនីយ៍ស្នងការនគរបាលខេត្ដកំពង់ស្ពឺ លោកក៏បានឱ្យមន្ដ្រីនគរបាលនៅតាមប៉ុស្ដិ៍នគរបាលរដ្ឋបាលឃុំត្រូវចុះសហការជាមួយលោកមេភូមិ កំលាំងគណៈបញ្ជាការឃុំ ផ្សព្វផ្សាយលើករណីលួចលក់និងលេងគ្រឿងផ្ទុះដែលជាមូលហេតុប៉ះពាល់ដល់សុវត្ថិភាពសង្គមនិងគ្រោះថ្នាក់ដល់មនុស្ស ជាក់ស្ដែងរកឃេីញត្រូវតែធ្វេីការដកហូតនិងធ្វេីកិច្ចសន្យាបញ្ឍប់ការលក់ដូរ ក្នុងករណីអ្នកលក់ដូរនៅតែបន្ត និងមិនរាងចាលទេនោះត្រូវអនុវត្ដវិធានការច្បាប់។
នគរបាលខេត្តកំពង់ស្ពឺធ្វើការអំពាវនាវដល់ប្រជាពលរដ្ឋ អាជីវករ ដើម្បីអបអរសាទរនិងការចូលរួមធ្វើបុណ្យ ភ្ជុំបិណ្ឌឆ្នាំថ្មីនេះ! សូមបងប្អូនប្រជាពលរដ្ឋមេត្ដាចូលរួមសហការជាមួយសមត្ថកិច្ចឱ្យបានល្អ ឈប់លក់របស់របរដែលច្បាប់បានហាមឃាត់ ៕
ចែករំលែកព័តមាននេះ