លោក ញឹក បានខេង និងលោក អ៊ុយ សុធាវី ប្រកាសឱ្យចូលកាន់មុខតំណែងជាអភិបាលរងខេត្តពោធិ៍សាត់
ខេត្តពោធិ៍សាត់ ៖ ថ្ងៃទី១៥ ខែកញ្ញា ឆ្នាំ២០២៥ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់…
ខេត្តពោធិ៍សាត់ ៖ ថ្ងៃទី១៥ ខែកញ្ញា ឆ្នាំ២០២៥ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតី ក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តពោធិ៍សាត់ ចំនួនពីររូប ដែលបានប្រារព្ធធ្វើនៅសាលប្រជុំសាលាខេត្តពោធិ៍សាត់។
លោក ខូយ រីដា អភិបាល នៃអភិបាលខេត្តពោធិ៍សាត់ បានសម្តែងការស្វាគមន៍យ៉ាងកក់ក្តៅ ចំពោះវត្តមានរបស់ឯកឧត្តមរដ្ឋលេខាធិការក្រសួងមហាផ្ទៃ ដែលបានចំណាយពេលវេលាដ៏មានតម្លៃ ផ្តល់កិត្តិយស អញ្ជើញប្រកាសចូលកាន់មុខតំណែងអភិបាលរងខេត្តថ្មីចំនួនពីររូប នាពេលនេះ ។
យោងអនុក្រឹត្យលេខ ៦០១ អនក្រ.តត របស់រាជរដ្ឋាភិបាល ចុះថ្ងៃទី២២ ខែកក្កដា ឆ្នាំ២០២៥ ត្រូវបានសម្រេចផ្ទេរភារកិច្ច មន្ត្រីរាជការចំនួន ២រូប ៖ ទី១. លោក ញឹក បានខេង ឋានន្តរស័ក្តិ ឧត្តមមន្ត្រីថ្នាក់លេខ៤ ពីអភិបាលរងខេត្តកំពង់ធំ ឱ្យមកកាន់មុខតំណែងជាអភិបាលរងខេត្តពោធិ៍សាត់។ ទី២.លោក អ៊ុយ សុធាវី ឋានន្តរស័ក្តិ ឧត្តមមន្ត្រីថ្នាក់លេខ១ ពីអភិបាលរងខេត្តបាត់ដំបង ឱ្យមកកាន់មុខតំណែងជាអភិបាលរងខេត្តពោធិ៍សាត់ ។
បន្ទាប់ពីពិធីប្រគល់អនុក្រិត្យរួចមក លោក ញឹក បានខេង និងលោក អ៊ុយ សុធាវី អភិបាលរងខេត្តពោធិ៍សាត់ថ្មី បានឡើងប្ដេជ្ញាចិត្ត ដោយបានសម្ដែងនូវអំណរគុណយ៉ាងជ្រាលជ្រៅ ចំពោះសម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៍ដូចឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីក្រសួងមហាផ្ទៃ ដែលមានទំនុកចិត្ត តែងតាំងរូបលោកទាំងពីរ ឲ្យមកកាន់មុខតំណែងជាអភិបាលរងខេត្តពោធិ៍សាត់ នាពេលនេះ ។
លោកបានប្ដេជ្ញាចិត្ត ៖ ស្មោះត្រង់និងមានភក្ដីភាព ចំពោះជាតិ សាសនា ព្រះមហាក្សត្រ, ខិតខំពង្រឹងកិច្ចសហការនិងអនុវត្តភារកិច្ច ដើម្បីសម្រេចបាននូវសមិទ្ធផលធំៗបន្ថែមទៀត។ ចូលរួមពង្រឹងអនុវត្តគោលនយោបាយភូមិឃុំសង្កាត់មានសុវត្ថិភាព, ចូលរួមអនុវត្តការងារប្រកបដោយស្មារតីទទួលខុសត្រូវខ្ពស់ គោរពច្បាប់ ប្រកាន់ខ្ជាប់ក្រមសីលធម៌វិជ្ជាជីវៈ និងពង្រឹងសាមគ្គីឯកភាពផ្ទៃក្នុងឲ្យរឹងមាំ ក្នុងជួរគណៈអភិបាលខេត្ត។ ប្ដេជ្ញាអនុវត្ត និងប្រតិបត្តិការយ៉ាងខ្ជាប់ខ្ជួន តាមបទបញ្ជា និងគោលការណ៍ណែនាំ របស់រាជរដ្ឋាភិបាល ក្រសួងមហាផ្ទៃ ក្រុមប្រឹក្សាខេត្ត និងគណៈអភិបាលខេត្ត ។
មានប្រសាសន៍ក្នុងឱកាសនោះ លោក ប៊ុន ហុន បានអបអរសាទរ និងមានសេចក្តីសង្ឃឹម ជឿជាក់យ៉ាងមុតមាំថា លោក ញឹក បានខេង និងលោក អ៊ុយ សុធាវី ដែលបានប្រកាសចូលកាន់មុខតំណែង ជាអភិបាលរងថ្មី នៃខេត្តពោធិ៍សាត់ ថ្ងៃនេះ នឹងអនុវត្តនូវតួនាទីភារកិច្ច និងការទទួលខុសត្រូវរបស់ខ្លួន ប្រកបដោយកិច្ចសហការ សាមគ្គីភាព និងឯកភាពផ្ទៃក្នុងឲ្យបានល្អប្រសើរ។ លោកសូមឲ្យលោកអភិបាលរងថ្មីទាំង២ ចូលរួមចំណែកធ្វើឱ្យការអនុវត្តការងារ ក្នុងជួរគណៈអភិបាលខេត្ត កាន់តែមានប្រសិទ្ធភាព ដើម្បីជំរុញការអនុវត្តកម្មវិធីកំណែទម្រង់នានា របស់រាជរដ្ឋាភិបាល ជាពិសេស ការលើកកម្ពស់ការផ្តល់សេវាសាធារណៈ ជូនប្រជាពលរដ្ឋ និងការអភិវឌ្ឍខេត្ត ឱ្យកាន់តែមានការរីកចម្រើនប្រកបដោយបរិយាប័ន្ន និងសមធម៌សង្គម ឆ្លើយតបទៅនឹងសេចក្តីត្រូវការ និងសំណូមពរជាក់ស្តែងពិតប្រាកដ របស់ប្រជាពលរដ្ឋនៅមូលដ្ឋាន ៕
ចែករំលែកព័តមាននេះ