រាជធានីភ្នំពេញ ៖ នារសៀលថ្ងៃទី១៥ ខែកញ្ញានេះ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក…
រាជធានីភ្នំពេញ ៖ នារសៀលថ្ងៃទី១៥ ខែកញ្ញានេះ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោក អាត់សាផាងថុង ស៊ីផាដុន អភិបាលរដ្ឋធានីវៀងចន្ទន៍ បានជួបសម្តែងការគួរសម និងចុះហត្ថលេខាលើកិច្ចព្រមព្រៀងស្តីពីការបង្កើតចំណងសម្ព័ន្ធ មេត្រីភាព រវាងរាជធានីភ្នំពេញ នៃព្រះរាជាណាចក្រកម្ពុជា និងរដ្ឋធានីវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ នៅសាលារាជធានីភ្នំពេញ ។
ការចុះហត្ថលេខានេះ គឺដើម្បីជំរុញឲ្យទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ កម្ពុជា និងឡាវ កាន់តែមានភាពរឹងមាំល្អប្រសើរមួយកម្រិតថែមទៀត ពិសេសជំរុញដល់វិស័យពាណិជ្ជកម្ម វិនិយោគ ទេសចរណ៍ ការផ្លាស់ប្ដូរការអប់រំ និងវប្បធម៌ ព្រមទាំងវិស័យផ្សេងៗទៀតសម្រាប់ផលប្រយោជន៍របស់ភាគីទាំងពីរ ។
លោក ឃួង ស្រេង ក្នុងឱកាសនោះ ក៏បានលើកឡើងពីភាពរីកចម្រើនរបស់ប្រទេសកម្ពុជា ក៏ដូចជារាជធានីភ្នំពេញ ដោយនៅពេលចុងក្រោយនេះ កម្ពុជាបានកសាងហេដ្ឋារចនាសម្ព័ន្ធជាច្រើនសម្រាប់អភិវឌ្ឍន៍ប្រទេសជាតិឲ្យកាន់តែរីកចម្រើនបន្ថែមទៀត ។ ក្នុងនោះមានដូចជាការស្ថាបនាព្រែកជីកហ្វូណនតេជោ ការកសាងស្ពានឆ្លងកាត់ទន្លេមេគង្គ ការស្តារទន្លេ និងការកសាងអាកាសយានដ្ឋានអន្តរជាតិតេជោដែលបានដាក់ឲ្យដំណើរការកាលពីប៉ុន្មានថ្ងៃកន្លងមកនេះជាដើម ។
លោក ឃួង ស្រេង បានបញ្ជាក់ផងដែរថា រាជធានីភ្នំពេញ បានទទួលភ្ញៀវទេសចរប្រមាណ១០លាននាក់ ក្នុងឆ្នាំ២០២៤ ដែលនេះពិតជាបានបង្ហាញពីការកើនឡើងភ្ញៀវទេសចរ បើប្រៀបធៀបនឹងឆ្នាំ២០២៣។ ដើម្បីជំរុញឲ្យវិស័យទេសចរណ៍កាន់តែមានភាពរីកចម្រើនបន្ថែមទៀត រដ្ឋបាលរាជធានីភ្នំពេញ បានបង្កើតឲ្យមានផ្លូវថ្មើរជើងចតុមុខ។ ផ្លូវថ្មើរជើងថ្មីនេះ បានទទួលភ្ញៀវទេសចរជាតិ-អន្តរជាតិ ក្នុងមួយថ្ងៃប្រមាណ៨ទៅ១០ម៉ឺននាក់ សម្រាប់ថ្ងៃសៅរ៍ និងថ្ងៃអាទិត្យ រហូតធ្វើឲ្យរាជធានីភ្នំពេញ ជាប់ចំណាត់ថ្នាក់លេខ២ លើពិភពលោក ក្នុងនាមជាទីក្រុងប្រជុំដោយភាពរីករាយនៅពេលរាត្រី ។
លោក អាត់សាផាងថុង ស៊ីផាដុន អភិបាលរដ្ឋធានីវៀងចន្ទន៍ ក្នុងឱកាសនោះបានសម្តែងការសាទរចំពោះការអភិវឌ្ឍរីកចម្រើនរបស់រាជធានីភ្នំពេញ ។
លោកបានលើកឡើងថា រាជធានីភ្នំពេញ មានការអភិវឌ្ឍរីកចម្រើនល្អណាស់ ហើយនៅតាមបណ្ដាខេត្តក៏មានការរីកចម្រើនព្រមៗគ្នាផងដែរ ។
លោកបន្តថា ទំនាក់ទំនងកិច្ចសហប្រតិបត្តិការរវាងកម្ពុជា និងឡាវ គឺកាន់តែមានភាពល្អប្រសើរ ដោយថ្មីៗនេះថ្នាក់ដឹកនាំកំពូល នៃប្រទេសកម្ពុជា បានទៅធ្វើទស្សនកិច្ចនៅប្រទេសឡាវ ហើយរដ្ឋមន្ត្រីក្រសួងការបរទេសរបស់ប្រទេសឡាវ ក៏បានមកបំពេញទស្សនកិច្ចនៅប្រទេសកម្ពុជាផងដែរ។ នេះជាការពូនជ្រុំទំនាក់ទំនង នៃប្រទេសទាំងពីរឲ្យកាន់តែល្អប្រសើរ និងកាន់តែមានភាពរឹងមាំបន្ថែមទៀត។
ក្នុងឱកាសនោះដែរ លោក អាត់សាផាងថុង ស៊ីផាដុន ក៏បានអញ្ជើញលោក ឃួង ស្រេង ដើម្បីដឹកនាំប្រតិភូរដ្ឋបាលរាជធានីភ្នំពេញ ទៅបំពេញទស្សនកិច្ចនៅទីក្រុងវៀងចន្ទន៍ផងដែរ ។
ជាការឆ្លើយតប លោក ឃួង ស្រេង បានបញ្ជាក់ថា នឹងពិនិត្យលទ្ធភាពទៅបំពេញទស្សនកិច្ចនៅទីក្រុងវៀងចន្ទន៍ នៅពេលវេលាណាមួយសមស្របខាងមុខនេះ ។
សូមជម្រាបថា រាជធានីភ្នំពេញ និងទីក្រុងវៀងចន្ទន៍ ធ្លាប់បានចុះហត្ថលេខាចងសម្ព័ន្ធមេត្រីភាពជាមួយគ្នាម្តងរួចហើយ កាលពីថ្ងៃទី៦ ខែកុម្ភៈ ឆ្នាំ២០១៤ កន្លងមក។ ការចុះកិច្ចព្រមព្រៀងចងសម្ព័ន្ធមេត្រីភាពឡើងវិញ នៅថ្ងៃនេះ ធ្វើឡើងក្រោយទទួលបានគោលការណ៍ឯកភាពពីសម្តេចធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ នាពេលថ្មីៗនេះ តាមរយៈការស្នើសុំរបស់រដ្ឋបាលរាជធានីភ្នំពេញ ដើម្បីឆ្លើយតបនឹងភាពរីកចម្រើន និងការអភិវឌ្ឍគ្រប់វិស័យរបស់រាជធានីភ្នំពេញ និងទីក្រុងវៀងចន្ទន៍ នាពេលបច្ចុប្បន្ននេះ ។
អ្វីដែលត្រូវកត់សម្គាល់រួមមាន ៖
១. កិច្ចព្រមព្រៀងកន្លងមកគឺដើម្បីផ្លាស់ប្ដូរគណៈប្រតិភូជាន់ខ្ពស់របស់ភាគីទាំងពីរ តែពេលនេះការផ្លាស់ប្ដូរគណៈប្រតិភូនឹងធ្វើឡើងគ្រប់កម្រិត ទាំងគណៈប្រតិភូជាន់ខ្ពស់ មន្ត្រីជំនាញ និងប្រតិភូគ្រប់វិស័យ។
២. ភាគីទាំងពីរនឹងសហការរួមគ្នាលើផ្នែកការផ្លាស់ប្ដូរប្រជាជននិងប្រជាជន ការផ្លាស់ប្ដូរព័ត៌មានដូចជា ៖ ទីក្រុងវៃឆ្លាត ចំណេះដឹងឌីជីថល និងកិច្ចប្រជុំបណ្តាញនានា ។
៣. ភាគីទាំងពីរនឹងផ្តល់ការគាំទ្រ និងសម្របសម្រួលដល់មន្ទីរអង្គភាពពាក់ព័ន្ធនៃរដ្ឋធានីវៀងចន្ទន៍ និងរាជធានីភ្នំពេញ ព្រមទាំងជំរុញដល់វិស័យពាណិជ្ជកម្ម វិនិយោគ ទេសចរណ៍ ការផ្លាស់ប្ដូរការអប់រំ និងវប្បធម៌ ព្រមទាំងវិស័យផ្សេងៗទៀតសម្រាប់ផលប្រយោជន៍របស់ភាគីទាំងពីរ។
៤. ប្រសិនបើមានភាពខុសគ្នាកើតឡើងក្នុងការបកស្រាយ ឬអនុវត្តកិច្ចព្រមព្រៀងនេះ ត្រូវដោះស្រាយដោយមិត្តភាព តាមរយៈការពិគ្រោះយោបល់រវាងភាគីទាំងពីរ។
៥. រាល់អត្ថបទទាំងឡាយណាដែលមានខ្លឹមសារផ្ទុយពីកិច្ចព្រមព្រៀងនេះ ត្រូវទុកជានិរាករណ៍ ដោយស្ថិតក្រោមច្បាប់គ្រប់គ្រង និងបទបញ្ញត្តិនៃប្រទេសទាំងពីរ៕
ចែករំលែកព័តមាននេះ